Maatiyos 21 - Saaho Cusub Cahde

Yeesus Nugus balih Yerusaalem oroba

¹ Kado Yerusaalemih kab-yerhxiinih Oolac koomalle geytimta Beetfagille yemeetin gedda, Yeesus lamma katattayna dhirhiyeyaako:

² “Ta sin nifidde yane dik fanah aduwa, akkanih lel tumudhdhuwe xera ishi culluttaalih geytoona kitin. Tiftixiinih yoh baha.

³ Akkinnanti wulim sinak yerhxemko: ‘Maddari ten farheh kinni’ akko erhexa, usuk lel akkanih ten dhirhiyo kinni” akko yerhxe.

⁴ Tayim tekkem lel tamaa nabii:

⁵ “Tsiyoon barhäk tahe akko erhexa: ‘Taykinna, amnonobba hin ku nugus xerakke, tamarremhi barha kin culluttakke gaxeh kolle amiituk yane’” yerhxeh yinem takmalo ciloh kinni.

⁶ Amaa katattaynit lel tamaa Yeesus akah ten yeemereekah aben.

⁷ Amaa xera kee cullutta akah baahen, sinni natsul guzguzuh alle hayenih usuk alle defeye.

⁸ Amaa xiyawko mango mari sinni natsul araxadde akah sidishen, gari lel xorhti xakuk yigriciinih araxadde akah sidishen.

⁹ Amaa afa kee sarradde akko aduuk tine mango xiyaw lel: “Yalla xamdishinna! Dawud Barhah! Maddari migacalle yamiiteti dhaacole kinni! Yalla xamde takkoo agani carshelle!” arhxuk zeerak yinin.

¹⁰ Usuk Yerusaalem orobe gedda: “Tati miyatto kinni?” arhxuk amaa daafo inkoh saxximte.

¹¹ Amaa mango xiyaw lel: “Tati Galiilaati Naazretko yemeete nabii Yeesus kinni” yerhxin.

Yeesus maqhdas care yatsrige

¹² Yeesus maqhdas caredde orobeh, amaa maqhdas caredde aabixuk kee dhaamak tine xiyaw inkoh yeyyeeceh, solaadi yaybiddile marih thawlal kee xamaama aabixuk yine marahi kuraasi yeydedebbe.

¹³ “‘Yi cari salaat careh decsiimo kinni’ yarhxiinim tunkuttubeh tane, atin laakin garaacenti gonna akko abten” akko yerhxe.

¹⁴ Inti-malit kee tumunkusem maqhdas caredde alle yemeetinyaako ten uruse.

¹⁵ Sheekhat manabottit kee sercat dhiiceenit laakin, ta usuk abe cibra kin xaaja yublinya kee cindham maqhdas caredde zeereenih: “Yalla xamdishinna! Dawud Barhah!” arhxuk yoobbin gedda mangum kurrayen:

¹⁶ “Ta mari arhxuk yaniinim aabbituk tane?” akko yerhxin. Yeesus lel: “Yoo, ‘Zabul kee angu dhowa laatsenti afko fayla tisqirribeh tanito’ yarhxiinim maqhrayinnitiiniho?” akko yerhxe.

¹⁷ Ten xabeyaako lel, amaa daafooko yewceh Beetcaniya fanah yedeeyaako amalle dhiine.

Yeesus indacarto abaara

¹⁸ Dhaxiine, daafo fanah gaxak, safriite.

¹⁹ Arax afak wuli indacartö yubleyaako, alle yemeete gedda dharhaako bextih walaa inkim akko migeyinna. “Kamboh daro akko yarhxiinim kooko geytime waytoo” akko yerhxe. Amaa indacartö lel akkanih kafte.

²⁰ Katattaynit amayim yublinyaako: “Indacartö akkanih aaginah kafte?” arhxuk cibrah raben.

²¹ Yeesus: “Atin imaan teelliinih, lammaa-garbite wayteenimko, ta indacartolle tekkeh tanem bisa maki abtoona litiinim, ta koomak lel: ‘Bukkutaaki badadde ciddit’ akko terhxiinimko, amayim takko kinam rummah sinak arhxiyuk ane.

²² Teemeniinih dhaacitinninnim lel kabbattoona kitin” akko yerhxe.

Yeesus reeza esseriman

²³ Maqhdas caredde orobe gedda, aydurusuk sheekhat manabottit kee xiyawko naba mari alle yemeetiinih: “Awlih reezah kinni tayim abak tanitom, ta reeza koh toxoyem lel miya kinni?” akko yerhxin.

²⁴ Yeesus: “Anu lel wuli essero sin essero kiyo, radde yoh tedebbiinimko, anu lel tayim awlih reezah abak aniyom sinah warisho kiyo.

²⁵ Yohannis aythammaq awlaako yemeete? Carsheeko, woole xiyawko?” yerhxeh alle yedebbe. Usun lel sinne-sinneh taginah waanishak yinin: “‘Carsheeko’ akko nerhxemko: ‘Aymih kaa aamine wayteeni?’ nok yarhxo kinni.

²⁶ ‘Xiyawko’ akko nerhxemko lel ta mango xiyaw Yohannis inkoh nabiih kaa yabliinimhi sabbatah, tenko mashshinna.”

²⁷ Amaymih Yeesusuk: “Minaarhige” akko yerhxin. Usuk lel: “Anu gantah tayim awlih reezah abak aniyom sinah warisho makiyo” akko yerhxe.

Lamma barhih aymassal

²⁸ “Aymih sinalle higgida? Wuli xiyawti lamma barha luuk yine. Afti tiyalle yemeeteh: ‘Yi barha, kaafa aduwaaki cinab dhagedde ukhdum’ akko yerhxe.

²⁹ Usuk lel: ‘Maadiye’ yerhxeh alle yedebbe, sarrah laakin yeththeeceseh yedee.

³⁰ Malammit barhalle yedeeh lel amahe akko yerhxe. Usuk lel: ‘Maddara, adaw kiyo’ akko yerhxe, laakin maadayinna.

³¹ Ta lammaako awlihti abbat farhi abe?” akko yerhxe. Usun: “Aftiti” akko yerhxin. Yeesus lel: “Miiri yaskattit kee sharaamuth sinko yaakumiinih Yallih nigsinnadde oroboona kinoonim rummah sinak arhxiyuk ane.

³² Amayim lel, Yohannis xaqqi araxah sinalle yemeeteh, atin kaa maamanitiini, miiri yaskattit kee sharaamuth laakin kaa yeemeniinimhi sabbatah kinni. Tayim tubliinimko sarrah lel taamanoona ciloh maththaacasitiini.

Cinab dhageh baclaysheenitti aymassal

³³ Aki aymassal lel oobbaanta. Wuli cinab dhage yitkile cari-manabotti yine, yekeeyeyaako lel cinab adde yatsmuqhinikke akah faraaceh, dhawrheeni qobba akah siraaxeyaako, baclaysheenitidde yeskeereeh, aki baarho kallaaxe.

³⁴ Orbat waqhti kab-yerhxe gedda lel kaa cinab daro akah baahoona ciloh baclaysheenit fanah ishi garuuza fare.

³⁵ Amaa baclaysheenit kaa garuuza yibbirhiinih, tiya akko yootokin, tiya akko yigdifin, tiyalle dhayit alle ciden.

³⁶ Malammih lel tamaa afti maraako mango aki garuuza fare. Tenak lel amayim balih akko aben.

³⁷ Abayshimalle: ‘Yi barha xishmatoona kinon’ yerhxeh ishi barha fare.

³⁸ Amaa baclaysheenit laakin amaa barha yublin gedda sinne-sinneh: ‘Tati waarish kinni. Amowa, kaa nigdifeh kaa miiraas akko beynoo’ yerhxin.

³⁹ Kaa yibbirhiinih lel amaa cinab dhageeko irolle kaa cideenih kaa yigdifin.

⁴⁰ Amaydo, amaa cinab dhageh wanna yamiite gedda, ta baclaysheenitik ayim akko abo kinni?” akko yerhxe.

⁴¹ Usun: “Amaa uma mara uma liyah ten yeylee, amaa cinab dhage lel cinab daro waqhte-waqhteh akah yaxaye aki baclaysheenitidde yaskeere” akko yerhxin.

⁴² Yeesus lel: “‘Siraaxa mari ilaacen dhayitti ongolot dhaa yekkeh yane; tayim Maddari abitto kinni, ni intidde lel mangum carha mece’ yarhxiinim Kutuubudde caduruh maqhrayinnitiini?

⁴³ Amaydo, Yallih nigsinna sinak beyoona kinoonim kee, tee daro yayfiriye aki marah tamxawo kinam sinak arhxiyuk ane.

⁴⁴ Ta dhayittolle radati yeggedeedeleh butur yakko kinni; akkinnan tiyalle rademko lel kaa yachaflaqho kinni” akko yerhxe.

⁴⁵ Sheekhat manabottit kee Faarisiin kaa aymassal yoobbin gedda, ten zacabah waanishak yanem yeerhegin.

⁴⁶ Kaa yabbarhoona farhak yinin hanuk, amaa mango xiyaw nabiih kaa abluk yiniinimhi sabbatah, tena mashshiiten.