Maatiyos 20 - Saaho Cusub Cahde

Cinab dhageh shaqqaala

¹ Yeesus malammih: “Amayim lel carshi nigsinna, ishi cinab dhageh shaqqaala yayshaqhalo dhaxiine ifanih yewce cari-manabottah higgidamhi sabbatah kinni.

² Amaa shaqqaalah lellecille babbarhi diinaar akah abo yensemeemeceh, ishi cinab dhage fanah ten dhirhiye.

³ Yewce gedda lel dhaxiinit saaca sagalah shuqhle hin aki mari cadaagalle daw-arhxuk ten yuble,

⁴ tenak lel: ‘Atin gantah amaa cinab dhage fanah aduwa, eeddam sinah axawo kiyo’ akko yerhxe.

⁵ Usun lel yedeyin. Lellecti abrha kee kasit saaca adoxuh yewceh amayim balih abe.

⁶ Kasit saaca koonuh yewceh lel aki mara daw-arhxuk ten geye. ‘Aymih talle shuqhle hinnim muluu lellec daw-arhxuk taniini?’ akko yerhxe.

⁷ Usun lel: ‘Walaa inketti ni mayshaqhalinnamhi sabbatah kinni’ akko yerhxin. Usuk: ‘Atin gantah amaa cinab dhage fanah aduwa’ akko yerhxe.

⁸ Kasi yekke gedda, amaa cinab dhageh wanna kaa shaqqaalat masxadaadarak: ‘Shaqqaalah inkoh akah deecimteh, sarroorimat tiyaako erherhishsheh afti tiya fanah ten casbe akah ikfil’ akko yerhxe.

⁹ Amaa kasit saaca koonuh tushtuqhulem yemeetin gedda babbarhi diinaar kabbaaten.

¹⁰ Kado amaa afti mari yemeetin gedda, ziyaada kabbaatoona lon sinne yekkeliinih yinin, laakin usun gantah babbarhi diinaar kabbaaten.

^11-12 Kabbaaten gedda lel: ‘Ta inki saaca yushtuqhule sarrat mara, lellecti tanto kee sirii harur cureh ase nottaalih ten agaagishshe’ arhxuk amaa cari-manabottalle alle yongoroozomin.

¹³ Usuk laakin: ‘Nangali, ku mazlamiyo. Inki diinaarah yottaalih mansamaamacito?

¹⁴ Ishim bishshitaaki aduu. Ta sarrat khaddaamah kottah oxoyem akah axawo farheh ane.

¹⁵ Innimik farhinnannim akko abo mirhiica? Hido lel anu xinda-mece ekkemih yolle ashshiinak tanito?’

¹⁶ Amaydo, sarrat mari afadde, afti mari lel sarradde gaxoona kinon” akko yerhxe.

Yeesus maddaxih ishi rabi yaakumeh warisha

¹⁷ Yeesus aganalle Yerusaalem fanah awcuk, amaa lamman kee taman katattayniya ulah araxko iscirhii-isheh:

¹⁸ “Taykinna, Yerusaalem fanah awcuk nane. Xiyawti Barhi lel sheekhat manabottit kee sercat dhiiceenitih kaa yasxawna kinon, usun lel rabih kaa yaqhtsacoona kinon,

¹⁹ usun lel alle tsaggarowoona kee khormaajah kaa sabaceenih masqalakke kaa takaroona Aki-marah kaa yasxawna kinon, usuk lel maddaxit lellec rabaako uguto kinni” akko yerhxe.

Inat essero

²⁰ Sarrah Zibdit cindhamhi ina ishi cindhamlih alle temeeteyaako kaa nifille gululluubuyteh akkinnannim kaa esserte.

²¹ Usuk lel: “Ayim fadhdhe?” akko yerhxe. Ishi lel: “Ta yi lamma barhi ku nigsinnadde, wuliti mizgaako, wuliti lel guraako, defeyoona kinon erhex” akko terhxe.

²² Yeesus: “Ayim esserak taniinim aarhiguk mitaniini. Tamaa anu aacabo liyo kobbaaya taacaboona dhictaana?” arhxuk alle yedebbe. Usun lel: “Dhicna” akko yerhxin.

²³ Usuk: “Yi kobbaaya taacaboona kitin, yi mizga kee yi guraakohi defeena laakin, yi Abba akah yisqirribe marah kibah, anu maki axayem” akko yerhxe.

²⁴ Amaa tamana katattayni tayim yoobbin gedda, amaa lamma sacalalle alle kurrayen.

²⁵ Yeesus laakin ishelle akah deecimeh: “Aki-mara, ten reezon ten bukalle maddarit yakkiinim kee ten naba mari ten yagziinim taarhigin.

²⁶ Sin fanadde tayim takko alle mitane. Laakin sinadde naba tiya akkinnanti sin khaddaam yakko alle tane.

²⁷ Sinadde erhedhdho akkinnanti sin garuzzo yakko alle tane,

²⁸ Xiyawti Barhi gantah akah yakhdamoona makiiki, yakhdamo kee mango marih muucah ishi aniina tillaabisho kinni yemeetem” akko yerhxe.

Yeesus lamma inti-male urusa

²⁹ Usun Yerikhooko awcuk lel, mango xiyaw kaa katayen.

³⁰ Taykinna lel, lamma inti-mali arax afakke defeyenya, Yeesus tillaabak yoobbin gedda: “Maddara, Dawud Barha nolle raxmat!” arhxuk zeereenih andhaxen.

³¹ Amaa mango xiyaw, sik-yarhxoona ten yoskoolofin, usun laakin: “Maddara, Dawud Barha nolle raxmat” arhxuk amayimko ziyaada zeereenih andhaxen.

³² Daw-yerhxeyaako, Yeesus akah deecimeh: “Ayim sinah abo yok fadhdhaana?” akko yerhxe.

³³ Usun: “Maddara, ni intit noh fakkitoo” akko yerhxin.

³⁴ Yeesus lel raxmah uluc akko xarheenih ten intit dhagandhaageh, akkanih ten mablo akah gaxteyaako kaa katayen.