Maatiyos 18 - Saaho Cusub Cahde

Ummannimko nabati miyatto kinni?

¹ Amaa saacadde katattaynit Yeesusulle alle yemeetiinih: “Carshi nigsinnadde ummannimko nabati miyatto kinni?” akko yerhxin.

² Yeesus lel wuli cindhookah ishelle akah deecimeyaako ten fanadde kaa hayeh,

³ tahe akko yerhxe: “Gaxe wayteenimko kee balih cindham akke wayteenimko, carshi nigsinnadde caduruh orobtoona makitiinim rummah sinak arhxiyuk ane.

⁴ Ta cindhooka balih ishe ascundhdhuwinnanti carshi nigsinnadde ummannimko naba tiya kinni.

⁵ Yi migacalle amah iggidin cindhooka kabbaatinnanti yotta kabbaata.

⁶ Ta yottah yaamine cindha-maraako inketta zambedde sayshe tiyah, naba marhxan fillak akko tumudhdhuweh badti baaxatadde yamundhucem akah ashshe dhadhdhe.

Zambedde sayaanam

⁷ Xiyaw zambedde sayishshamhi zacabah caalam ku careyta! Zambedde sayishsham tamaato raacinnixem kinni. Amaa zambedde sayishsham kaa sabbatah akko takko leti laakin kaa careyta!

⁸ Ku gaba hido ku ibi zambedde ku sayshemko, tigriceyaako cid. Lamma gaba kee lamma ibaalih umman geedit giradde ciddittamko, ishi amankas hido xankiishoolih aniinadde orobtam koh tashshe.

⁹ Ku intit zambedde ku sayshemko, eyyecaaki cid. Lamma intiilih jahannab giradde ciddittamko, inki intiilih aniinadde orobtam koh tashshe.

Telee ciidoh aymassal

¹⁰ Ta cindha-maraako walaa inketta ilactaanak, selita. Amayim lel ten malaykut carshelle umman gedda carshelle geytima yi Abbah nif yabliinimhi sabbatah kinam sinak arhxiyuk ane. [

¹¹ Xiyawti Barhi teleem gargeero yemeetemhi sabbatah kinni.]

¹² Ayim takkaliini? Bool ciidottiya leti, amayimko inketta akko teleemko, amaa boolsagla kee sagal koomamalle xabah, amaa telee inkettahi goronuh yadiyeh makiho?

¹³ Geyemko lel, amaa caduruh alayinnixe boolsagla kee sagalko ziyaada teyah xedenam rummah sinak arhxiyuk ane.

¹⁴ Amaydo, ta cindha-maraako walaa inketti yalayem, carshelle geytima yi Abbah farhi maki.

Ku sacal zambe kok abemko

¹⁵ Ku sacal zambe kok abemko, aduwaaki kaa zambe ulah ishe kee kaahi fanadde akah warish. Ku yoobbemko ishi sacal tiksibeh tanito.

¹⁶ Aabbe wayemko laakin, akkinnan gondo lamma hido adooxa shaahid-hi seththeeh dhishshimtamhi sabbatah, wuli aki inketta hido lamma isheelih bee.

¹⁷ Tena yaabbo xinemko, kaniisah warish. Kaniisa gantah yaabbo xinemko lel Aki-mara kee miiri yaskatte kolle yakkoo.

¹⁸ Baarholle tarhuynim carshelle gantah yamadhdhaw kinni, baarholle taftixiinim lel carshelle yamfattaxo kinam rummah sinak arhxiyuk ane.

¹⁹ Malammih, lammik baarholle alle tensemeemeciinih esserteenim carshelle geytima yi Abbah araxah akah takko kinam sinak arhxiyuk ane.

²⁰ Amayim lel, lamma hido adox yi migacalle alle yekettinille, anu ten fanadde aniyomhi sabbatah kinni.”

Bixilla-arhxinnixe khaddaamhi aymassal

²¹ Sarrah Bithroos yemeeteyaako tahe akko yerhxe: “Maddara, yi sacal ayidhdhale gedda zambe yok abemko kinni, anu alle xabo liyom? Malxina gedda fanah?”

²² Yeesus akko yerhxe: “Malxintomon kee malxin kibah malxina gedda kok maarhxe.

²³ Amaydo, carshi nigsinna, ishi garuuzaalih xisaab abo farha nugusuh higgida.

²⁴ Xisaab abo erherhishe gedda, tamana shiix talantoonya adde le tiya alle baahen.

²⁵ Yadabbo taane gedda lel kaa maddari, ishe kee ishi numa, kee ishi cindhamlih inkoh lem yeebexeh yadabbo kaa yeemere.

²⁶ Amaymih amaa garuzzi gulubulle akko radeyaako: ‘Dagum yolle cur kibah, inkoh koh adabbo kiyo’ yerhxeh kaa dhaacime.

²⁷ Amaa maddari lel raxmah uluc akko xarheyaako, kaa dhirhiyeh cida inkoh akah xabe.

²⁸ Amaa garuzzi amakkeeko yewce gedda, wuli bool diinaariya adde luuk yine kaa zoobatto kin garuzzo geyeyaako: ‘Kodde liyom yoh edebba’ arhxuk yibbirheh kaa yisniqhe.

²⁹ Amaymih amaa kaa zoobatto kin garuzzi: ‘Dagum yolle cur kibah, inkoh adabbo kiyo’ yerhxeh radeyaako kaa dhaacime.

³⁰ Usuk lel xineyaako yedeyih aykee kaa cida akah yadabbendah kaa yurhuwe.

³¹ Amaa kaa zoobit kin garuuza tekkem inkoh yublin gedda, mangum yixziniinih, yedeyinyaako amaa tekkem inkoh sinni maddarah warishen.

³² Kaa maddari lel akah deecimeyaako: ‘Ko uma garuzzo! Yi dhaacimtemhi sabbatah amaa cida inkoh koh xabe.

³³ Anu akah kolle naxruuruteekah, ishi zoobatto kin garuzzolle naxrurto kolle mitane?’ akko yerhxe.

³⁴ Kaa maddari lel kurrayeyaako ishi cida inkoh yadabbendah, kaa yacizzibe maralle yoxoye.

³⁵ Amaydo, sinni sacalalle sinni afcaadooko alle xabe wayteenimko, carshelle geytima yi Abba gantah umbuka sinak amayim balih sinak abo kinni.”