Maatiyos 15 - Saaho Cusub Cahde

Xiyaw cayda kee amrit

¹ Sarrah Faarisiin kee sercat dhiiceenit Yerusaalemko yemeetiinih Yeesusuk:

² “Aymihi ku katattaynit kalxit marih cayda yagdiliinim? Folo beetan gedda gaba miyadhdhooliini” akko yerhxin.

³ Usuk: “Atin lel aymihi sinni caydah arhxitin Yallahi amre tagdiliinim?

⁴ Amayim lel Yallih amri: ‘Ishi abba kee ishi ina xishmat’ kee ‘Ishi abba kee ishi inah waatimati rummah rabo alle tane’ yarhxemhi sabbatah kinni.

⁵ Atin laakin: ‘Ishi abbak hido ishi inak: “Sinah xato takko taarhigem Yallah tomxowweh tane” yerhxemko,

⁶ ishi abba xishmatam kaa mifarhshishsha’ tarhxin. Amaydo, sinni caydah arhxitin Yallih amre ciddan.

⁷ Ko munaafiqhiino, nabii Isayas sin sabbatah akah waanisheekah:

⁸ ‘Ta xiyaw afah kinni yi xishmataanam, ten afcaado laakin yottaako mirixtah tane.

⁹ Xiyaw amrit kin labcad aydurusuk, fayda maleh yoh yacbudin’ yerhxem meceetih yane” yerhxeh alle yedebbe.

Xiyawto masxishsham

¹⁰ Mango xiyawah ishelle akah deecimeh lel: “Toobbiinih ifhima;

¹¹ kaa afko saytam makiiki xiyawto masxishsham, kaa afko tawcem kinni xiyawto masxishsham” akko yerhxe.

¹² Sarrah katattaynit yemeetiinih: “Ta marhxo yoobbin gedda Faarisiin yissimingidiinim taarhige?” akko yerhxin.

¹³ Usuk: “Akkinnan xarha carshelle geytima yi Abba atkilinnixeya bukkutto kinni.

¹⁴ Ten xaba; usun inti-malit kin santisheenit kinon. Inti-mali, inti-male santishemko inkoh kinni boozodde radaanam” akko yerhxe.

¹⁵ Bithroos laakin: “Ta aymassal noh caddos” akko yerhxe.

¹⁶ Usuk lel: “Atin gantah kaddih afhimekkah taniini?

¹⁷ Afko sayinnannim garballe tillabtah irolle awcuk mitabliini?

¹⁸ Afko awcinnannim laakin afcaadooko tamiite, tayim kinni lel xiyawto masxishsham.

¹⁹ Amayim lel afcaadooko, uma xisaab, gidfo, zina, uma-xibar, garca, zirabah yashhidiinim kee waato tawcemhi sabbatah kinni.

²⁰ Tayim kinni xiyawto masxishsham. Adhdhoolinnixe gabah beetaanam walaa inketta mimasxishsha” akko yerhxe.

Kancaan numahi imaan

²¹ Yeesus amakkeeko yewceh Tsoor kee Tsiidoon manthiqhalle hirgiime.

²² Taykinna lel wuli Kancaan baarhoh numa amaa zoobäako temeeteh weecak: “Maddara, Dawud Barha, yi barhä dhacumaatih timjinnineh tanek yolle raxmat” arhxuk wecte.

²³ Usuk laakin walaa inki waanitta alle maadabbinna. Kaa katattaynit yemeetiinih: “Sarradde nokko weecak tanek, tee hadan” arhxuk kaa dhaacimen.

²⁴ Usuk: “Tamaa telee Israa-eel carih ciidoh bisa kinni farritimem” yerhxeh alle yedebbe.

²⁵ Ishi laakin: “Maddara, yi xat” arhxuk temeeteyaako kaa nifille gululluubuyte.

²⁶ Usuk lel: “Cindhamti folo beyaanah kaarah cidaanam mecem maki” yerhxeh alle yedebbe.

²⁷ Ishi lel: “Yoo, Maddara, kaara gantah maka ten wannunhi thawlaako rade butur beetaanam” akko terhxe.

²⁸ Yeesus lel: “Te numa, ku imaan naba tiya kinni. Atu akah fadhdheekah lel koh yakkoo” yerhxeh alle yedebbe. Tee barhä lel amalle anuk urte.

Yeesus mango mara urusa

²⁹ Yeesus amakkeeko yedeeh Galiilaati igilhi gimamalle gerhe. Koomalle yewceh lel amalle defeye.

³⁰ Amalle lel xankiishinam, inti-malit, tumunkusem, naxar-malit, kee aki mango mara baaheenih mangum mango xiyaw alle yemeetinyaako kaa ibadde hayen, usuk lel ten uruse.

³¹ Amaymih naxar-malit waanishak, tumunkusem urak, tixinkishem gerhak, inti-malit lel abluk yublin gedda lel amaa mango xiyaw cibrah raben. Usun lel Israa-eel Yalla yeynebin.

Yeesus affara shiix bettiisha

³² Sarrah Yeesus ishi katattaynitih akah deecimeh: “Ta xiyaw adooxa lellec yottaalih kaleenih yaniinimhi sabbatah, beetaanam lel maloonimhi sabbatah, raxmah uluc yok xarhak yanin. Araxadde safrah radaanamko lel safradde ten dhirhiyo mifarha” akko yerhxe.

³³ Amaa katattaynit lel: “Ta gina-le zibolle, tayidhdha mango xiyaw bettishsho dhicta folo awlaako geyno?” akko yerhxin.

³⁴ Yeesus lel: “Ayidhdhale kinnas litiini?” akko yerhxe. Usun lel: “Malxina kinnas kee daguu cindha caasa” akko yerhxin.

³⁵ Amaa xiyaw lel baarholle defeyoona ten yeemereh,

³⁶ amaa malxina kinnas kee caasa beyeyaako, dhaaco abeh, yigdileyaako amaa katattaynitih yoxoye, katattaynit lel amaa mango xiyawah yoxoyin.

³⁷ Usun lel beeteenih inkoh xayten. Amaa raace yeggedeedele kinnosko lel malxina jambiil yooqhocin.

³⁸ Amaa beete mari lel sayyo kee cindhamko bextih affara shiix labhattiya kuuk yinin.

³⁹ Amaa mango xiyaw dhirhiyek sarrah, jalbadde koreh Magadan zooba fanah yedee.