Maatiyos 12 - Saaho Cusub Cahde

Yeesus Sambat Maddara kinni

¹ Amaa geddadde Yeesus Sambatah ilaw dhageh fantaako tillaabak yine. Kaa katattaynit lel safriitenyaako ilaw zalaala yiqhinthibinyaako beetoona erherhishen.

² Faarisiin amayim yublinyaako: “Ubul, ku katattaynit Sambatah takko ammissilinnixem abak yanin” akko yerhxin.

³ Usuk lel: “Dawud safriite gedda kaalih yine mara kee isheh ayim abem maqhrayinnitiini?

⁴ Yallih caredde orobeh, sheekhaako bextih farhinnanti beeto masmuux akkinnexe yisiddiqhin folo beyeh beeteyaako kaalih tinemih yoxoye.

⁵ Sheekha maqhdas caredde, Sambat Sambatah yiscirinyaako cagab malit yekkiinim Sercatadde maqhrayinnitiini?

⁶ Maqhdas careeko nabati talle yanem lel sinak arhxiyuk ane.

⁷ ‘Anu farham raxma kibah sadaqha maki’ yarhxiinimhi macna teerhegiinih takkindo, cagab male cadale mirhaarhitiini.

⁸ Amayim lel Xiyawti Barhi Sambat Maddara kinamhi sabbatah kinni” akko yerhxe.

Kafte gaba le xiyawto

⁹ Usuk amakkeeko tillaabeh ten sunagoogedde orobe.

¹⁰ Amadde lel wuli gaba akko kafte xiyawti yine. Usun lel kaa yaksasoona ciloh: “Sambatah urusaanam masmuux kinni?” yerhxiinih kaa esseren.

¹¹ Usuk: “Sinko miyatto kinni, ciidotta leti, Sambatah boozodde rada gedda, yibbirheyaako kaa ayyaacinnixeti?” akko yerhxe.

¹² “Ciidottaako xiyawti ayidhdhah minabaho? Amaydo, Sambatah mecaani abaanam masmuux kinni” akko yerhxe.

¹³ Sarrah amaa xiyawtok: “Ishi gaba iyfiddig” akko yerhxe. Amaa xiyawti lel yiyfiddigeyaako amaa gaba akah tineekah gaxteh, malammit gaba balih tekke.

¹⁴ Faarisiin laakin yewcinyaako aaginah kaa yaylaynimhi xagaradde zatteyen.

Doorime Yallih khaddaam

¹⁵ Yeesus tayim yeerhegeyaako amakkeeko yicrhiye. Mango mari kaa katattayenyaako lel usuk inkoh ten uruse,

¹⁶ akko warishaanamko lel sirii ginah ten asuuse.

¹⁷ Tayim lel nabii Isayas:

¹⁸ “Taykinna, anu doore yi khaddaam, yi rooxi alle xedena yi kaxantooli. Inni Ufaye kayyakke oobisho kiyo, usuk lel Aki-marah xaqqe warisho kinni.

¹⁹ Usuk yanzaagaxo maki hido zeero maki, kaa dhaw lel shawaaricille walaa inketti yaabbo maki.

²⁰ Xaqqe sariigalla gudduusekkah, yimchifliqhe shambuqqotta yagdalo maki; tikkaa shimcatti tufulta lel badisho maki;

²¹ kaa migacalle lel Aki-mari cag abitoona kinon” yerhxeyaako waanishem takmalo ciloh tekkem kinni.

Quddus kin Ufayehi waato

²² Amaymik sarrah, wuli yimjinnine inti-male kin naxar-male alle baahenyaako, waanisho kee yablo akah dhiicaakah kaa uruse.

²³ Inkoh amaa xiyaw cibrah rabeenih lel: “Tati Dawud Barha yakkeho?” yerhxin.

²⁴ Tayim Faarisiin yoobbin gedda laakin: “Ta xiyawti junuun ayyaacuk yanem, junuun manabotta kin Beelzebuuluh abeh kinni” yerhxin.

²⁵ Ten xisaab yeerhegeh laakin tahe akko yerhxe: “Umman nigsinna ishe-isheh xazziiminnaniya zibboyta, isheh xazxaazimte daafo hido cari lel daw-yarhxo maki.

²⁶ Sheethan Sheethan yeyyeecemko, ishe-isheh xazxaazimeh yane. Kaa nigsinna aaginah daw-tarhxo kinni?

²⁷ Anu Beelzebuuluh junuun ayyaaceh ekkemko, sin cindham aymih abaanah yayyaaciini? Amaydo, usun sin daaniya yakkoona kinon.

²⁸ Laakin anu junuun akah ayyaacem Yallih Ufayeh yekkemko, amaydo Yallih nigsinna sin bukalle temeeteh tane.

²⁹ Hido lel akkinnanti sirii xiyawtih caredde orobah aaginah kaa nuwaa baysha, yookomeh amaa sirii xiyawto yurhuweh akke wayemko? Amayek sarrah kaa care baysho dhiica.

³⁰ Yottaalih akkinnixeti yi didde kinni, yottaalih askattinnixeti lel faax-isha.

³¹ Amaydo, umbuka zambe kee waato xiyawah xabbot geyo kinni, laakin Ufayi diddeh aban waato mixabbimtam sinak arhxiyuk ane.

³² Xiyawti Barhih diddeh waanitta waanishinnanti xabbot geyo kinni. Quddus kin Ufayi diddeh uma waani waanisha tiyah laakin hido ta waqhtedde, hido lel yamiite waqhtedde xabbot geyo maki.

Xarha ishi daroh tamidhdhige

³³ Xarha ishi daroh tamidhdhigemhi sabbatah, xarha eymeca, tee daro lel tamce, hido lel xarha oshshooma, tee daro lel taamo kinni.

³⁴ Ko datali zarawo, temmeege afcaadooko af waanishamhi sabbatah, uma mara kitin hanuk mecem aaginah waanishshoona?

³⁵ Mece xiyawti mece cukraako mecem yayyaace, uma xiyawti lel uma ishi cukraako umaani yayyaace.

³⁶ Amaa firdi max xiyaw inkoh amficinnixe waani waanishanyah xisaab geyoona kinon.

³⁷ Amayim lel sinni waanih sinne asxiqqiqhe kee sin waanih cadalime takkoona kitiinimhi sabbatah kinni.”

Yoonaas tuumar

³⁸ Sarrah, sercat dhiiceenit kee Faarisiin: “Mucallim, kottaako wuli ishaara nablo fandha” yerhxiinih alle yedebbin.

³⁹ Usuk laakin: “Ta uma am-immine wayta ijo ishaara tablo farhak tanehaaki, nabii Yoonaas ishaaraako bextih, walaa inki ishaara akah tamxawo maki.

⁴⁰ Yoonaas naba caasattih garbadde adooxa lellec kee adooxa bar akah sugeekah, Xiyawti Barhi lel baarhot garbadde adooxa lellec kee adooxa bar kalo kinni.

⁴¹ Nineweehti xiyaw, Yoonaas warroyishnan yoobbiinih yotoobiinimhi sabbatah firdelle ta ijoolih uguteenih ten yaqtsacoona kinon. Taykinna lel Yoonaasko nabam talle tane.

⁴² Junuub nigisti, Suleymaan xikma taabbo baarhot abayshimaako temeetemhi sabbatah, amaa firdi max ta ijoolih ugutteh tee taqtsaco kinni. Taykinna lel Suleymaanko nabam talle tane.

Najaasa-le ufayehi gaxnan

⁴³ Najaasa-le ufayi xiyawtooko yawce gedda, kafin baarhooko yadiyeh alle yacrufekke wagiyah, inkim migeya.

⁴⁴ Sarrah lel: ‘Amaa akko ewce inni care fanah gaxo kiyo’ yarhxe. Yamiite gedda lel, foyya kin, fiyyiimeh yemxeedere care geya.

⁴⁵ Sarrah yadiyeh isheelih kaako uma aki malxina ufaye baaha, usun lel orobaanah amadde sigan. Amaa xiyawtih gondo lel awwalko taame. Ta uma ijoolih lel amayim balih takko kinni.”

Yeesus ina kee kaa sacul

⁴⁶ Usuk kaddih xiyawlih waanishak anih, taykinna, kaa ina kee kaa sacul kaalih waanishoona farheenih, irolle daw-yerhxiinih yinin.

⁴⁷ [Wuli xiyawti lel: “Ku ina kee ku sacul kottaalih waanishoona farheenih, irolle daw-yerhxiinih yinin” akko yerhxe.]

⁴⁸ Yeesus laakin amah akko yerhxe tiyak: “Miyattö kinni yi ina? Miya kinni yi sacul?” akko yerhxe.

⁴⁹ Ishi gaba ishi katattaynitille yiyfiddigeh: “Ta mara kinni yi ina kee yi sacul” yerhxe.

⁵⁰ Amayim lel yi sacal, yi sacla kee yi ina kinam carshelle geytima yi Abbah farhi abinnantiya kinamhi sabbatah kinni.