Maatiyos 11 - Saaho Cusub Cahde

Farto Yaythimmiqhe Yohannisko

¹ Yeesus ishi lamman kee taman katattayniya yaamirem abayshe gedda, ten daafofulle yaydaraso kee mece ware warroysho amakkeeko tillaabe.

² Kado Yohannis amaa Masiix abittot hi sabbatah xabshedde yoobbe gedda ishi katattaynit fareh:

³ “Amaa yamaato leti kotta kinni woole aketto ilalno nolle tane?” akko yerhxe.

⁴ Yeesus lel: “Aduwantaaki Yohannisih taabbiinim kee tabliinim akah warisha:

⁵ inti-malit yablin, xankiishinam yadiin, saknittem yamsiffiin, cokka-malit lel yaabbin, rabtem ugutan, baaxentit Mece Ware yambissirin.

⁶ Yi sabbatah xoolashshiitinnixeti lel baraka-letiya kinni” akko yerhxe.

⁷ Yohannis luuktit yedeyin gedda, Yeesus amaa mango xiyawlih Yohannis zacabah waanisho erherhishe: “Ayim tabloona zibolle tewciini? Xaaxatti waxwax-isha shambuqqo?

⁸ Laakin ayim tabloona tewciini? Carha mece sara sarite xiyawto? Taykinna, amaa carha mece sara sarite mari nuguusat carwadde yanin.

⁹ Amaydo, ayim tabloona zibolle tewciini? Nabii? Yoo, usuk rummah nabiiko aganalle kinam sinak arhxiyuk ane.

¹⁰ ‘Taykinna, ku basolle ku arax yasqarrabo le inni luukta ku nifidde dhirhiyak aniyo’ yarhxiinim kaa sabbatah akko tunkuttubeti kayya kinni.

¹¹ Saymaraako toobokemidde Yaythimmiqhe Yohannisko nabati adde maamaatinnam, rummah sinak arhxiyuk ane. Yakko kibah, carshi nigsinnadde ummannimko cindhati kaako naba.

¹² Yaythimmiqhe Yohannis maxko kado fanah carshi nigsinna umaatih tane, amaa xayla-le mari lel tee simbaacak yanin.

¹³ Amayim lel inkoh Nobowa kee Sercat Yohannis fanah Yallih farto akah baaheeniikah,

¹⁴ amayim lel kabbattoona fadhdheenimko, usuk tamaa yamaato yaarhige Eliyaas kinni.

¹⁵ Yaabbe cokkak leti yaabboo!

¹⁶ Ta ijo laakin miyaalih aybalaalawo liyo? Cadaagalle defeyeenih sinni carkitih deecima irroh kinni higgidam.

¹⁷ ‘Machambara sinah nootoke, margaditiini, xazanah sinah zerne, mizeeritiini.’

¹⁸ Yohannis beetak hido aacubuk maamaatinna, usun lel: ‘Jinnetta leya’ yarhxin.

¹⁹ Xiyawti Barhi beetak kee aacubuk yemeete, usun lel: ‘Kaa ubula! Beeteena, sakraan, miiri yaskattit kee zambi-wannunhi carke’ yarhxin. Xikma laakin ishi ciyyoh titxiqqiqhe.”

Atoobinnixe daafofuk sin careyta!

²⁰ Amaymik sarrah, maataabinnoonimhi sabbatah tamaa kaa xayla-le abittot mangih alle tekke daafof taginah ten cadalo erherhishe:

²¹ “Korazin ku careyta! Beet-sayda ku careyta! Amayim lel ta sinalle yekke xayla-le abittot Tsoor kee Tsiidoonulle yekkeh yineh yakkeedo, mece geddaakoh toobat ishaarah guula sariteenih mombots sinnelle hayenyaako yotoobiinih anniye dhaarhen.

²² Laakin amaa firdi max sinko ziyaada Tsoor kee Tsiidoonuh yar-haw kinam sinah warisha.

²³ Atu lel Kafarnaxuumo, carshe fanah korto kito? Hadeesadde kinni guballe cidditto kitom. Amayim lel kottalle yekke xayla-le abittot Sodomulle yekkeh yineh yakkeedo, kaafa fanah anniye dhadhdhe.

²⁴ Laakin amaa firdi max sinko ziyaada Sodom baarhoh yar-haw kinam sinah warisha.”

Curfen sinah axawo kiyok yottalle amowa

²⁵ Yeesus amaa waqhtedde: “Abba, carshe kee baarhoh Maddara, ta xaajuj xikma-le mara kee maarhagitko sucusseh cindhaa cindham tiyshidhdhigemih, koh axmuduk aniyo.

²⁶ Yoo Abba, tayim lel ku mece farhi kinamhi sabbatah kinni!

²⁷ Yi Abbaako ummanna yoh tomxowweh tane, Abbaako bextih Barha yaarhigeti miyane. Barha kee Barhi yayshadhdhago doorime tiyaako bextih Abba yaarhigeti miyane.

²⁸ Xawala mara kee cuuki akko yiclishe marak curfen sinah axawo kinnik yottalle amowa.

²⁹ Yi arcot uqhuca, yottaako lel udrusa, anu sabre-le tiya kee addaako amnanabbinnixe tiya kiyomhi sabbatah, sinni nabseh curfen geytoona kitin.

³⁰ Amayim lel yi arcot yaaqhacoona sahiila, yi cuuki lel sissik tiya kinamhi sabbatah kinni” yerhxe.