Maatiyos 10 - Saaho Cusub Cahde

Lamman kee taman fartottittiya

¹ Yeesus amaa ishi katattaynit kin lamman kee tamanah akah deecimeh najaasa-le ufayit yayyaacoona kee, umbuka laxuu kee waaxelta urusoona reeza akah yoxoye.

² Amaa lamman kee taman fartottit-hiyahi migoc lel tayim kuuk yine: aftiti Bithroos akko yarhxin Simcoon kee Indiryaas kaa sacal; Zibdit barha kin Yacqoob, kaa sacal Yohannis;

³ Filibboos, Bartolomaayos; Toomaas, miiri yaskatte kin Maatiyos; Alfaayos barha kin Yacqoob, Taddayos;

⁴ wathan-kixin kin Simcoon kee kaa yosxoye Yahuuda Iskariyoot kinon.

Yeesus lamman kee taman fartottittiya fara

⁵ Yeesus lel ta lamman kee tamanah ta amre akah yoxoyeh ten fare: “Aki-marih fanadde maadayna, Samaariyaati dikidde lel moorobinantaaki,

⁶ too Israa-eel carehi ciido teleya fanah aduwa.

⁷ Adiitin lel: ‘Carshi nigsinna kab-terhxeh tane’ arhxitin warroysha.

⁸ Laxuttem urusa, rabtem ugusa, saknittem iysiffiya, junuun lel eyyeca. Akfilekkah kabbattenki, ankiffilekkah uxuwa.

⁹ Sinni gamarah dahab, fidda hido naxas maaqhacina.

¹⁰ Shaqqaalattoh folo akah eeddamhi sabbatah, kallaaxi lakoota, lamma qamish, hido kabel, hido lel ilo maaqhacina.

¹¹ Akkinnan daafodde hido dikidde orobtan gedda, miyattoolih sinah eeddam essertenyaako, aykee tadiinindah amalle suganta.

¹² Caredde orobak alle iysillima.

¹³ Amaa cari akah missil tiya yekkemko, sin salaam alle ooboo, akah missil care akke wayemko laakin, sin salaam sinah gaxoo.

¹⁴ Akinnanti sin kabbaate wayemko hido sin waani aabbe wayemko, amaa care hido amaa daafooko awcitin sinni ibih dorona alle urgufa.

¹⁵ Firdi max, amaa daafooko, Sodom kee Camoraati baarhoh yar-haw kinam, rummah sinak arhxiyuk ane.

Hadaano tamaato kinni

¹⁶ Taykinna, ciido balih suulalti fanadde sin farak aniyok, siixo caror balih, gar-he lel xamaama balih abita.

¹⁷ Araballe sin baaheenih sinni sunagoogitidde lel sin sabacoona kinoonimhi sabbatah, xiyawko zeelita.

¹⁸ Ten kee Aki-marah shaahid takkoona ciloh, yottah arhxuk masxadaadarit kee nuguusalle sin baahoona kinon.

¹⁹ Sin yasxayin gedda, amaa saacadde ayim tarhxiinim sinah tamxawo kinamhi sabbatah, aaginah waanishshaanam kee ayim tarhxiinimih manshaaqhalina.

²⁰ Amayim lel waanishsho lem sin araxah sin Abbahi Ufaye kibah sina makinamhi sabbatah kinni.

²¹ Sacal ishi sacal yasgadafo kinni, abba lel ishi barha, cindham lel sinni dhaltoyyah didde ugutoona kinon, ten yagdafoona kinon.

²² Yi migac hi sabbatah umman tiyah tamnaccaboona kitin. Abayshima fanah curinnanti laakin gargeerimo kinni.

²³ Wuli daafooko sin hadaneenimko, aki daafo fanah kudanta, Xiyawti Barhi yamiitendah umbuka Israa-eel daafof guftoona makitiinim rummah sinak arhxiyuk ane.

²⁴ Katattayni ishi mudarrisko minaba, khaddaam lel ishi manabottaako minaba.

²⁵ Katattayni ishi mudarrisih, garuzzi lel ishi maddarah yammingidem kaa dhicta. Cari-manabottak Beelzebuul akko yerhxiinimko, kaa xawazak amayimko mangum umam akko yarhxoona kinon.

Mimashshiitina

²⁶ Amaydo, caddoyto kinam agoogitteyah, tammadhdhago kinam sucutteya mitaneeki tenko mimashshiitina.

²⁷ Anu ditedde sinah warisham, ifolle erhexa, xushukshukuh taabbiinim, cari amolle gaxteenih warroysha.

²⁸ Rooxe kee irot nabse inkoh jahannabadde yaylawo dhiica tiyaako mashshita kibah, irot nabse yagdifeh rooxe yagdafo taana maraako mimashshiitina.

²⁹ Lamma cindhaa kimbiro inki santiimih tamibbixeh makiho? Sin Abbah farhi hinnim, tenko baarholle walaa inketta akko raddo maki.

³⁰ Laakin sin amoh dagar yakkeedo inkoh loyyiimeh yane.

³¹ Atin mango cindhaa kimbirko ziyaada limo litinki, mimashshiitina.

³² Amaydo, xiyaw nifille yoh aaliminnan tiya, anu gantah carshelle geytima yi Abbah nifille akah aalamo kiyo.

³³ Xiyaw nifille yi xina tiya laakin, anu gantah carshelle geytima yi Abbah nifille kaa xino kiyo.

Sef kibah, salaamah maki emeetem

³⁴ Anu ta baarholle salaam baaho emeete makkalina. Sef kibah, salaam baaho emeeteh maaniyo.

³⁵ Amayim lel, xiyawto ishi abbah diddeh, barhä ishi inahi didde, barhi numa ishi ballöh diddeh uguso emeetemhi sabbatah kinni.

³⁶ Xiyawti nacabtoolit lel kaa xawaz yakkoona kinon.

³⁷ Abba hido ina yottaako mangum kixinti yottah meeda, barha hido barhä yottaako mangum kixinti yottah meeda.

³⁸ Ishi masqal yooqhoceh yi katayinnixeti yottah meeda.

³⁹ Ishi aniina geyinnanti tee wayo kinni, ishi aniina aylayinnanti lel tee geyo kinni.

Casbe

⁴⁰ Sina kabbaatinnanti yi kabbaata, yotta kabbaatinnanti lel yotta fare tiya kabbaata.

⁴¹ Nabii kabbaatinnanti, nabii kinamhi sabbatah nabii casbe geya, xaqqi-wanna kabbaatinnanti lel xaqqi-wanna kinamhi sabbatah xaqqi-wannat casbe geya.

⁴² Ta cindhadhdhaa maraako inkettah, walaa dhamxin layeh kobbaaya yoxoyeti, usuk katattayna kinamhi sabbatah, ishi casbe caduruh wayo makinam rummah sinak arhxiyuk ane” yerhxe.