Luukas 9 - Saaho Cusub Cahde

Yeesus lamman kee taman fartottittiya fara

¹ Yeesus lel, amaa lamman kee tamanah inkidde akah deecimeh, xayla kee reeza umbuka jinnit hi bukalle, amayim balih laxuu urusoona akah yoxoye.

² Yallahi nigsinna warroyshoona kee laxuttem urusoona ten fare.

³ Usuk lel: “Kallaaxelle walaa inkim sinneelih mibeytaana: ilo, woole lakoota, woole folo, woole fiddat solaadi, malammit qamish yakkeedo mitaalliini.

⁴ Tadiinindah, adde orobinnan caredde suganta.

⁵ Sin kabbaate waynimko, amaa daafooko awcitin, tenah shahaada akah takko ciloh, sinni ibih dorona urgufa” akko yerhxe.

⁶ Usun lel yewciinih dikko dikille, Mece Ware aybissiruk kee ummanille urusak yuzuurin.

Heerodes Yeesus zacabah lammaa-garbita

⁷ Galiilaati affara zoobah manabotti Heerodes lel amaa akkuk tanem inkoh yoobbe. “Yohannis rabaako ugute” akko yerhxiinimhi sabbatah lel, lammaa-garbite.

⁸ Wuli mari: “Eliyaas yumbulluwe” aki mari lel: “Kalxit nobowaako wuliti rabaako ugute” arhxuk yinin.

⁹ Heerodes lel: “Anu inneh kinni Yohannisko amo akko igricem. Tayim akko aabbeti miyatto kinni?” yerhxe. Kaa yablo lel wagiyak yine.

Yeesus koona shiix bettiisha

¹⁰ Amaa fartottit gaxen gedda, abeenim inkoh kayyah yishrixin. Sinni ulah lel Beet-sayda akko yarhxin daafo fanah isheelih ten beye.

¹¹ Mango xiyaw laakin, tayim yeerhegiinih adde katayen. Usuk lel ten kabbaateh Yallahi nigsinnahi zacabah akah warishak, urnan farhshiisha mara lel urusak yine.

¹² Baarho dhumto fadhdhe. Amaa lamman kee taman yemeetiinih: “Nanu talle zibolle nanemhi zacabah, ta wakalih diika kee barritille yedeynih dhintima kee folo geyoona ciloh ta mango xiyaw ten dhirhii” akko yerhxin.

¹³ Usuk laakin: “Beetaanam, atin akah uxuwa” akko yerhxe. Usun lel: “Nanu koona kinnas kee lamma caasattooko fertam malino. Nedeeh ta mango xiyawah folo dhamno yakkeedo maarhige” akko yerhxin.

¹⁴ (Amayim lel koona shiix labhattiya takkem kuuk yiniinimhi sabbatah kinni). Usuk lel ishi katattaynitik: “Kokkontomuh ten defeysha” akko yerhxe.

¹⁵ Usun lel amah isheenih inkoh ten defeyshen.

¹⁶ Usuk lel amaa koona kinnas kee lamma caasatto beyeh, carshedde kulux-arhxuk yeybeerekeh yigdile. Amaa mango xiyawah yaxawna ciloh lel katattaynitille yoxoye.

¹⁷ Inkoh beeteenih lel xayten. Amaa ractemko lel lamman kee taman jambiiliya akko yooqhocin.

Bithroos Yeesus Masiix kinamah yashhide

¹⁸ Tekke lel, Yeesus ishi ulah assilluuk kaa katattaynit amalle yinin. Usuk lel: “Ta mango xiyaw, miyatto kinni yok yarhxiini?” yerhxeh ten essere.

¹⁹ Usun lel: “Yaythimmiqhe Yohannis, gari Eliyaas, gari lel kalxit nobowaako wuliti rabaako uguteya kinni kok yarhxin” yerhxiinih alle deheyen.

²⁰ Usuk lel: “Atin lel miyatto kinni yok tarhxiini?” akko yerhxe. Bithroos lel: “Atu Yallih Masiix kito” yerhxeh alle yedebbe.

Yeesus ishi rabi yaakumeh warisha

²¹ Usuk lel tayim walaa inkettah warishaanamko ten asuuse.

²² Usuk lel: “Xiyawti Barhi mango xaajah cazaab yablo alle tane. Naba mara, sheekhat manabottit kee sercat dhiiceenitih xinniimo kinni. Kaa yigidifiinih lel maddaxit lellec rabaako uguto kinni” yerhxe.

Ishi masqal tibbirheh Yeesus kataa

²³ Usuk sarrah inkoh tahe akko yerhxe: “Yi kataw farhinnanti, ishi xino alle tane, maaxi yamaato lel ishi masqal yooqhoceh yi kataw.

²⁴ Amayim lel ishi aniina gargeereti tee yaylawo kinni, yottah arhxuk ishi aniina yeyleeti laakin tee geyo kinamhi sabbatah kinni

²⁵ Xiyawti umbuka caalamalle tanem yiksibeh ishi nabse yeyleemko hido wayemko, ayim kaa tamfice?

²⁶ Yotta kee Yi waanih xoolashshiitinnanti, usuk ishi nabne, Abba kee quddus kin malaykut hi nabnedde yamiite gedda, Xiyawti Barhi kaako xoolashshiito kinni.

²⁷ Laakin, talle daw-yerhxeh yane maradde, Yallih nigsinna yabliinindah rabaako dhacame wayo le mari adde yaniinim, rummah sinak arhxiyuk ane.”

Anqayaayar

²⁸ Tekke lel, ta waaniiko baxxara lellec yakkemko sarrah, Yeesus Bithroos, Yohannis kee Yacqoob beyeh yassallaw koomalle yewce.

²⁹ Usuk assilluuk lel kaa wajhehi gini yimbiddileh kaa sari lel lilic-yarhxeh ziffowe.

³⁰ Taykinna lel, lamma xiyawti kaalih waanishak yinin. Usun Moosa kee Eliyaas kuuk yinin.

³¹ Usun lel nabnedde akah yumbulluynih, Yerusaalemille abayshimo kab-yerhxeh yane kaa mudduum hi zacabah wagroyshitak yinin.

³² Bithroos kee kaalih tinem dhin ten beyeh yine. Meceetih uguten gedda lel, kaa nabne kee lamma xiyawti kaalih daw-arhxuk yublin.

³³ Tekke lel, Kaalih tinem kaako yimfilliin gedda, Bithroos Yeesusuk: “Mucallimo, nanu talle nakkem noh mece. Adooxa daasa siraxnoo: tiya kottah, tiya lel Moosah, tiya lel Eliyaasah” akko yerhxe. Laakin usuk ayim arhxuk yinem aarhuguk miyine.

³⁴ Usuk tayim arhxuk lel, camburre temeeteh ten agoogishshe. Usun lel amaa camburredde sayen gedda mashshiiten.

³⁵ Amayek sarrah, wuli dhaw amaa camburreeko yemeeteh: “Tati yi Barha kinni, Doorime tiya! Kayya oobbaanta!” yerhxe

³⁶ Amaa dhaw waanishe gedda, Yeesus inkettak yine. Usun lel sik-yerhxiinih amaa max yubliinim walaa inkettah miwarishinnooni.

Najaasa-le ufaye le cindhookih urusnan

³⁷ Tekke lel, malammit max usun koomaako ooben gedda, mangum mango xiyaw akah garayen.

³⁸ Taykinna lel, mango xiyawko wuli xiyawti wac-yerhxeh: “Mudarriso, tiyak liyo tiya kinnik, yi barhadde kulux yoh tarhxo ku dhaacimsiita.

³⁹ Taykinna lel, ufayi kaa yabbirheh akkanih zeerisha, firigrig kaa ishah lel kaa ximboysha. Kaa yaaziye, akko yawco lel xina.

⁴⁰ Ku katattaynit akah yayyaacoona ten dhaacime, usun laakin mirhiicinnooni” yerhxe.

⁴¹ Yeesus lel: “Ko imaan malit kin temxeleelefe ijow! Anu manda fanah sinlih sugo liyo? Manda fanah lel sinalle curo liyo? Ishi barha talle bah” yerhxeh alle yedebbe.

⁴² Amaa cindhooki kab-arhxuk, jinnetti kaa cideh firigrig kaa ishe. Yeesus laakin amaa najaasa-le ufaye yoskoolofe, amaa cindhooka uruseh kaa abballe kaa yedebbe.

⁴³ Inkoh lel Yallahi nabintah yussuxuttutin. Ummanti Yeesus inkoh abak yinemih cibrah rabak, usuk ishi katattaynitik:

Yeesus malammih ishi rabi yaakumeh warisha

⁴⁴ “Ta waanille cokka alle uxuwa: Xiyawti Barhi xiyaw gabadde rado kinni” akko yerhxe.

⁴⁵ Usun laakin ta zirhotta duhoona mirhiicinnooni. Usun yafhimiinimko hi ciloh lel akko sucutteh tine. Ta zirhottahi zacabah kaa esseroona lel mashshiiten.

Miyatto kinni ummannimko nabti?

⁴⁶ Ten fanadde miyatti ummanimko naba tiya yakko kinamhi zacabah zate erhedhdhe.

⁴⁷ Yeesus laakin, ten afcaadohi xasaab yeerhegeh, wuli cindhooka baaheh ishi riille daw-ishe.

⁴⁸ “Ta cindhooka yi migacalle kabbaatinnanti, Yi kabbaata. Yotta kabbaatinnanti lel yotta fare tiya kabbaata. Sinadde ummanimko cindhati, naba tiya kinni” akko yerhxe lel.

Ni didde akkinnixeti nottah kinni

⁴⁹ Yohannis lel: “Mucallim, wuliti ku migacalle junuun ayyaacuk nuble. Nottaalih mikatayinnamhi sabbatah lel kaa desne” yerhxeh alle yedebbe.

⁵⁰ Yeesus laakin: “Sin didde akkinnexeti sinah kinamhi sabbatah kaa mideesina” akko yerhxe.

Samaariyaati xiyawhi dik Yeesus xinan

⁵¹ Taykinna lel, carshellehi kaa kornanhi lellec kab-yerhxe gedda, macalah Yerusaalem gabolle yadaw abayshe.

⁵² Ishi nifidde lel luuktit fare. Usun lel yedeynih akah yasqarraboona Samaariyaati xiyawhi dikidde oroben.

⁵³ Usuk macalah Yerusaalem gabolle yadaw abayshem hi sabbatah, usun laakin kaa mikabbaatinnooni.

⁵⁴ Kaa katattaynit, Yacqoob kee Yohannis tayim yublin gedda: “Maddara, caranko gira alle obtoo nerhxeh gira ten taylawo fadhdha?” akko yerhxin.

⁵⁵ Yeesus laakin ufkun adde yerhxeh ten yoskoolofe.

⁵⁶ Aki dik fanah lel yedeyin.

Yeesus kataanamhi limo

⁵⁷ Usun araxalle aduuk lel wuliti: “Atu alle adiinnanille ku kataw kiyo” akko yerhxe.

⁵⁸ Yeesus lel: “Waker gonnit leyan, caranti kimbir lel sinni care leyan, Xiyawti Barhi laakin amo adde hashshiitakke maleya” akko yerhxe.

⁵⁹ Usuk akettok lel: “Yi kataa” akko yerhxe. Usuk laakin: “Maddara, ookomeh inni abba attaacago yi xab” akko yerhxe.

⁶⁰ Yeesus laakin: “Rabontit sinni rabonta yattaacagoona; atu laakin aduwaaki Yallahi nigsinna warish” akko yerhxe.

⁶¹ Aketti lel: “Ku kataw kiyo Maddara, ookomeh laakin inni dikikke salaam arhxo yoh ismix” akko yerhxe.

⁶² Yeesus laakin: “Masaaricille gaba oobishak caazalle kulux-yarhxeti, Yallahi nigsinnah yamficeya miyane” akko yerhxe.