Luukas 8 - Saaho Cusub Cahde

Sayyo Yeesus goorishsheya

¹ Amayek sarrah tekke lel, usuk Yallih nigsinna warroyshak kee Mece Ware aybissiruk daafof kee diikakko tillaabak yedee. Amaa lamman kee taman lel kaalih yinin.

² Uma ufaye kee laxuuko urteh tine sayyooko gari yakkeedo yinin. Usun lel: Malxina jinnetti akko yewceh yine (Magdalat-tiyä akko yarhxin) Maryam;

³ Heerodes maxadahi masxadaadara kin Khuuzaati numa kin Yohanna; Suzaana kee aki mango mari, amaa sinni iraaroh ten tukhdumeya kuuk yinin.

Yazriyetiih aymassal

⁴ Mango xiyaw teketteh, xiyaw lel laklakalle temfeleele daafofko Yeesusulle amiituk, usuk aymassal waanishe.

⁵ “Yazriyeti ishi zara yazraw ifaare. Azruuk lel gari arax afalle rade. Gari yentheecese, garo lel kimbir beete.

⁶ Gari lel qooqhaxalle radeh yubqule gedda lel unnaye wayemhi sabbatah kafe.

⁷ Gari lel keenanti fanadde radeh amaa keenan lel kaalih carsimeh kaa yitsqithe.

⁸ Gari lel mece buuredde radeh yubqule. Inki ilawti lel bool waqhtiya yemfeere.” Tahe yerhxemko sarrah wac-yerhxeh: “Yaabbe cokkak leti, yaabboo!”

Aymassal macal

⁹ Kaa katattaynit lel ta aymassalhi macna ayim kinam kaa esseren.

¹⁰ Usuk lel: “Yallih nigsinnahi mashthir kinam taarhagoona caashir sinah yomxoye. Aki marah laakin, yablin hanuk yabliinimko, yaabbin hanuk lel yafhimiinimko hi ciloh aymassalah kinni.

¹¹ Amaa aymassal tagina kinni: Zaratti Yallih waani kinni.

¹² Amaa arax afhim toobbeh tanem kinon. Amayek sarrah usun yaaminiinih gargeerimaanamko ciloh, ibliis yamiiteh amaa kalima ten afcaadooko akko beya.

¹³ Amaa qooqhaxallehim lel yaabbin gedda, xedenlih amaa kalima kabbattam kinon. Laakin rimid malooni. Dago waqhteh yaaminiinih, cakanat waqhtedde lel yathlimin.

¹⁴ Keenanti fanadde radeti lel, ta mari amaa toobbeh tanem, yadiin waqhte nabrat nawashshiga, gadda kee raaxah timciththilem kinoonimhi sabbatah fire migufaana.

¹⁵ Mece buuredde yineti lel, ta mari amaa waani toobbeh meceetih mece afcaadodde tixfizem yekkiinih, curtayyoolih fire guftem kinon.

Faanus citrot geridde

¹⁶ Faanus iffoyshah citroh alifati hido lel carat geridde haya tiyah inketti miyane. Laakin, oroba mari ifo yabloona ciloh, defeenakke oobisha.

¹⁷ Caddoyto aallinnexem sucutteya, hido tamadhdhago aallinnexem kee caddoyto lem sirre kinya mitanem hi sabbatah kinni.

¹⁸ Amayim lel le tiyah ziyaada akah ossimteyaako manginatah yaallo, hin tiyaako laakin amaa leya ishe yakkalem gantah akko tadawo kinamhi sabbatah, aaginah taabbiinim macalsita” akko yerhxe.

Yeesus ina kee sacul

¹⁹ Kaa ina kee kaa sacul lel kaa fanah yemeetinih, xiyaw mangahi sabbatah laakin, kaa gufoona mirhiicinnooni.

²⁰ “Ku ina kee ku sacul ku yabloona farheenih, irolle daw-arhxuk yanin” yarhxe wari akah yemeete.

²¹ Usuk laakin: “Yi ina kee yi sacul, ta Yallih waani taabbeh abittodde ashishsham kinni” yerhxeh alle deheye.

Yeesus goomadhdhe daw-ishe

²² Tekke lel, wuli max Yeesus ishe kee ishi katattaynitih jalbadde koreh: “Ta igilko amaa carhalle tabnok hayyaanta” akko yerhxe. Usun lel uguten.

²³ Usun jalbah awcuk lel dhin kaa beye. Amaa igilille lel sirii xaaxa obte. Amaa jalba layeko alle temmeegeh umaatih geyen.

²⁴ Yemeetiinih kaa uguseenih lel: “Mucallimo, Mucallimo, alayi nane!” akko yerhxin. Usuk lel uguteh amaa xaaxa kee layet goomadhdhe yoskoolofe gedda daw-yerhxin. Igil lel yihdiye.

²⁵ Usuk lel: “Sin imaan awla yane?” akko yerhxe. Usun lel mashshiiteenih cibrah rabak: “Tati miyatto kinni? Xaaxa kee laye yaazize, usun lel kaa yaabbin” sittak arhxuk yinin.

Yeesus majnuun urusa

²⁶ Usun lel Galiilaati waacina kin Geraasat marih baarholle taben.

²⁷ Yeesus baarholle oobe gedda, wuli xiyawto amaa daafooko kinya geye. Ta xiyawti junuunuh yindhibbirheh sara hashshiitekkah dherh waqhte luuk yine. Qabaarat fanadde kibah caredde marak miyine.

²⁸ Yeesus yuble gedda lel kaa afalle rade. Wac-yerhxeh lel: “Yeesuso, Nabamko Naba Yallih Barhaw, ayim yottaalih lito? Ku beezza, yi maacazzabin!” akko yerhxe.

²⁹ Tayim lel, usuk najaasa-le ufayi amaa xiyawtooko yawco kaa yeezezemhi sabbatah kinni. (Najaasa-le ufayi mangole gedda kaa abbirhuk yinem hi sabbatah gaba kee lakadde katiinah yumudhdhuweh dhawrhumak yine. Laakin ishi madhdhuwa yagdileh, jinnetti zibolle kaa beyak yine).

³⁰ Yeesus lel: “Miyatto ku migac?” yerhxeh kaa essere. Mango junuun adde orobeenih yiniinimhi sabbatah, “Maxaarho” akko yerhxe.

³¹ Usun lel adda dherh boozodde cidditoona akah ten aazize wayaakah, kaa dhaacimen.

³² Xasamat macat wuli koomat zoxolle alooluk tine. Amaa junuun lel xasamadde oroboona akah yasmaxo kaa dhaacimen. Usuk lel akah yismixe.

³³ Amaa junuun lel amaa xiyawtooko yewciinih, amaa xasamadde oroben. Amaa xasama lel ullallamutuh xarhiteenih igilidde yumundhucin.

³⁴ Amaa loynit lel tayim yublin gedda, kudah yedeynih amaa ware daafo kee amaa diikalle warroyshen.

³⁵ Xiyaw lel tekkem yabloona inkoh irolle yewciinih Yeesusulle yemeetin. Amaa junuun akko yewcin xiyawti lel sara sariteh, ishi kaslih, Yeesus ibadde defeyak kaa yublin. Usun lel mashshiiten.

³⁶ Tayim tublem lel yimjinnine xiyawti aaginah naggowemhi ware faax-ishen.

³⁷ Inkoh Geraasat baarhoh xiyaw kee amaa wakalihim mangum gilixeenimhi sabbatah, Yeesus tenko yadaw kaa dhaacimen. Usuk lel jalbadde koreh caazalle gaxe.

³⁸ Amaa junuun akko yewcin xiyawti lel kaalih defeyo kaa dhaacime. Yeesus laakin:

³⁹ “Ishi careh gaxteh ta naba xaaja Yalli koh abeh yaneya ishrix” akko yerhxeh kaa dhirhiye. Usuk lel ta Yeesus akah abeh yane naba xaaja warishak umbuka daafot fanko tillaabeh yedee.

Yeesus wuli numa kee Yayros barhä urusa

⁴⁰ Yeesus gaxe gedda lel, inkoh kaa ilaalak yiniinimhi sabbatah, mango xiyaw kaa kabbaaten.

⁴¹ Amalle lel Yayros akko yarhxin, sunagoogeeti manabotta kin xiyawti yemeete. Yeesusko iballe akko radeh lel kaa care yamaato kaa dhaacime.

⁴² Tayim lel, inkettak luuk yine cumreh lamman kee taman kin barhä, akko rabto kab-terhxemhi sabbatah kinni. Yeesus ishi araxalle aduuk, mango xiyaw kaa yeytseqheeqhethin.

⁴³ Wuli numa, lamman kee taman iggidiya biili akko xarhitaya, farhinnanti uruso taaneya, amalle tine.

⁴⁴ Ishi lel kaa caazaako temeeteh, kaa sareenahi erherha dhagte. Tee biilnan lel akkanih daw-yerhxe.

⁴⁵ Yeesus lel: “Miyatti yi dhage” yerhxe. Inkoh taymik aluu-arhxuk, Bithroos: “Mucallimo, mango xiyaw ku atsqithuk kee ku dufuwak yanin” akko yerhxe

⁴⁶ Yeesus laakin: “Xayli yok yewceh yanem eerhegemhi sabbatah, akkinnanti yi dhage” yerhxe.

⁴⁷ Amaa numa amidhdhigekkah racto mirhictam ishe tuble gedda, qathqath arhxuk temeeteh kaa iballe radde. Kayya akah dhagtemhi sabab kee akkanih aaginah urtem, umman xiyawhi nifille warishshe.

⁴⁸ Usuk lel: “Yi barhäw, ku imaan ku uruseh yanek, maaxiyodde aduu” akko yerhxe.

⁴⁹ Usuk kaddih waanishak anuk, wuliti sunagoogeeti manabottahi careeko yemeete. Usuk lel: “Ku barhä rabteh kinni. Kamboh Mudarris maytacabin” akko yerhxe.

⁵⁰ Yeesus tayim yoobbe gedda, Yayrosuk: “Mimashshiitin. Imin bisa kibah, ishe gargeerimto kinni” akko yerhxe.

⁵¹ Usuk carelle yemeete gedda, kaalih oroboona Bithroos, Yohannis kee Yacqoob, amayim balih barhat ina kee abbaako bextih inkettah masmaxinna.

⁵² Inkoh lel teyah weecak kee axzinuk yinin. Usuk laakin: “Miweecina, ishi dhintenkah mirabinna” akko yerhxe.

⁵³ Usun lel ishi rabtem yeerhegiinimhi sabbatah, kayyalle aasuluk yinin.

⁵⁴ Usuk laakin, gabadde tee yibbirheyaako wac-yerhxeh: “Te barhä, ugut!” akko yerhxe.

⁵⁵ Ufayi alle gaxeh lel akkanih ugutte. Bettimtam akah yaxawna lel ten yeezeze.

⁵⁶ Tee dhaltoyya lel cibrah raben. Usuk laakin ta tekkeh tanem walaa inkettah warishaanamko ten asuuse.