Luukas 7 - Saaho Cusub Cahde

Yeesus boolti mas-uulhi garuzzo urusa

¹ Yeesus, kaa aabbuk tine xiyawlih inkoh ishi waani abayshek sarrah, Kafarnaxuumudde orobe.

² Amalle lel, wuli bool caskartiyah manabotti mangum kaa xishmata garuzzi, laxuuteh rabi kab-isheh yine.

³ Amaa bool caskartiyah manabotti lel Yeesus ware yoobbe gedda, yemeeteh kaa garuzzo akah uruso, wuli Yahuud naba mara alle fare.

^4-5 Usun lel Yeesus fanah yemeetiinih: “Usuk ni ummat kixina, ni sunagooge abtem lel kayya kinamhi sabbatah, tayim akah abto akah meedda” yerhxiinih sirii ginah Yeesus dhaacimen.

⁶ Yeesus lel tenlih yedee. Amaa bool caskartiyah manabotti ishi soxoba tahe akko yarhxoona alle fare gedda, usuk amaa careeko dheerhuk miyine: “Maddara, atu yi carelle tamiitem akah missil tiya makiyo, mixawalin

⁷ Amaymih kinni lel kottalle yamiitiinim yoh eeddam maaxasabinniyom. Laakin, atu waanitta erhexaaki yi khaddaam urus.

⁸ Amayim lel inni geridde liyo caskarlih, anu gantah inneh reezat geridde yane tiya kiyo. Wuli tiyak, ‘Aduu’ akko erhxemko, yadiye, akettok lel, ‘Amo’ akko erhxemko, yamiite, inni khaddaamak, ‘Tayim ab’ akko erhxemko abamhi sabbatah kinni.”

⁹ Yeesus tayim yoobbe gedda, cibrah rabe. Kayyadde kataak tine mango xiyawadde ufkun-yeh lel: “Ta gina le naba imaan Israa-eelille yakkeedo migeyinniyom sinak arhxiyuk ane” akko yerhxe.

¹⁰ Amaa farritime mari carelle gaxen gedda, amaa garuzzi ureh akah suge.

Yeesus gubnat barha rabaako ugusa

¹¹ Amayek sarrah lel Yeesus akkanih Naayin akko yarhxin daafo fanah yedee. Kaa katattaynit kee amaa mango xiyaw lel kaalih yedeyin.

¹² Usuk daafot carafah kab-yerhxe gedda, taykinna lel rashshi amuqqucuk akah suge. Amaati lel gubna kin kaa ina inkettak luuk tine barha kuuk yine. Daafooko lel mango xiyaw aalih tine.

¹³ Maddari teya yuble gedda, raxmah uluc akko xadhdhemhi sabbatah: “Miweecin” akko yerhxe.

¹⁴ Yeesus lel yemeeteh amaa rashsha gabah dhage, amaa aaqhucuk tinem lel daw-yerhxin. Usuk lel: “Ko burgudda, ugut kok arhxiyuk ane!” akko yerhxe.

¹⁵ Amaa rabeti lel defeyeh waanisho erherhishe. Yeesus lel kaa inah kaa yedebbe.

¹⁶ Inkoh mashshi ten tibbirheh: “Naba nabii ni fanko yewce”. “Yalli ishi xiyaw xato yemeete” arhxuk Yalla yaynaboona erherhishen.

¹⁷ Ta wari lel umbuka Yahuudiya kee umbuka amaa wakalille yomobbe.

Fartottit Yaythimmiqhe Yohannisko

¹⁸ Yohannis katattaynit lel tayimhi ware inkoh akah baahen. Yohannis lel ishi katattaynitko lammaah deecimeh

¹⁹ “Amaa yamaato leti kotta kinni woole aketto ilalno nolle tane?” yerhxiinih kaa esseroona Maddara fanah ten fare.

²⁰ Amaa xiyaw lel Yeesus gufen gedda tahe akko yerhxin: “Yaythimmiqhe Yohannis ‘Amiituk yaneti kotta kinni woole aketto ilalna?’ yerhxeh ku essero ni fare.”

²¹ Usuk amaa geddaako, mango mara laxuu, waaxelta kee uma ufayeko ten uruse. Mango mari inti-malit kinya lel yabloona ten dhicshiishe.

²² Yeesus lel: “Aduwantaaki Yohannisih tubliinim kee toobbiinim akah warisha: inti-malit yablin, tumunkusem yadiin, saknittem yamsiffiin, cokka-malit lel yaabbin, rabtem ugutan, baaxentit Mece Ware yambissirin.

²³ Yi sabbatah xoolashshiitinnixeti, baraka-letiya kinni” yerhxeh alle deheye.

²⁴ Yohannis fartottit yedeyin gedda, Yeesus amaa mango xiyawlih Yohannis zacabah waanisho erherhishe: “Ayim tabloona zibolle tewciini? Xaaxatti waxwax-isha shambuqqo?

²⁵ Laakin ayim tabloona tewciini? Carha-mece sara sarite xiyawto? Taykinna lel, xarer kin sara sarittem kee raaxah martam nugus rooshanadde yanin.

²⁶ Amaydo, ayim tabloona zibolle tewciini? Nabii? Yoo, usuk rummah nabiiko aganalle kinam sinak arhxiyuk ane.

²⁷ ‘Taykinna, ku basolle ku arax yasqarrabo le inni luukta ku nifidde dhirhiyak aniyo’ yarhxiinim kaa sabbatah akko tunkuttubeti kayya kinni.

²⁸ Sayyooko toobokemidde, Yohannisko nabati miyanem inkinnah sinak arhxiyuk ane. Yallih nigsinnadde ummanimko cindhati laakin kaako naba.”

²⁹ Amaa tayim toobbe xiyaw kee miiri yaskattit gantah, Yohannis athammaqhah yimthimmiqhiinih yiniinimhi sabbatah, Yalli xaqqi-wanna kinam yeerhegin.

³⁰ Faarisiin kee sercat dhiiceenit laakin, Yohannisih manthammaqhinnoonimhi sabbatah, Yalli tenah farhe xagara xinen.

³¹ “Ta ijoh xiyaw miyaalih aybalaalawo liyo? Miyahle higgidooni?

³² Usun cadaagat fanalle defeyaanah sittah deecimak: ‘Machambara sinah nootoke, margaditiini; xazanah sinah zerne, miweecitiini’ yarhxe irroh higgidon.

³³ Yaythimmiqhe Yohannis folo beetak hido wayni aacubuk maamaatinna, atin lel: ‘Jinnetta leya!’ tarhxin.

³⁴ Xiyawti Barhi beetak kee aacubuk yemeete, atin lel: ‘Kaa ubula! Beeteena, sakraan, miiri yaskattit kee zambi-wannunhi carke’ tarhxin.

³⁵ Xikma laakin inkoh ishi cindhamah titxiqqiqhe.”

Zambi-wanna kin numa xabbot geyte

³⁶ Faarisiinko wuliti lel Yeesus kaalih beeto kaa essere. Usuk lel Faarisiiti caredde orobeh maaddille defeye.

³⁷ Taykinna lel amaa daafolle wuli zambi-wanna kin numa tine. Usuk Faarisiiti caredde maaddille defeyak yanem teerhege gedda, wuli alabaastiros akko yarhxin dhayittooko siraaximte tharmuuz cithirlih bahte.

³⁸ Caazaako kaa ibih afalle daw-terhxeh weecak ishi dhiimoh kaa iba arhurhusso erherhishshe. Ishi amohi dagarah akah tukteh lel kaa iba fugutteh, amaa cithirih lel akah tuskute.

³⁹ Amaa kayya yiczimeh yine Faarisiiti tayim yuble gedda, ishi qalbedde: “Ta xiyawti nabii yakkeedo, kaa dhagak tane tiya aaginale numa kinam kee zambi-wanna kinam aarhige dhaarhe” yerhxe.

⁴⁰ Yeesus lel: “Simcoon, kok arhxem liyo” yerhxeh alle yedebbe. Usuk lel: “Mudarris, yok erhex” akko yerhxe.

⁴¹ “Wuli maylakkaxi lamma mallakkaxa luuk yine. Wuli tiyadde koona bool, wuli tiyadde lel kontom diinaar luuk yine.

⁴² Cida akah yadabboona taanen gedda lel, inkoh ten yeseemexe. Amaydo, lamma tenko miyatti mangum kaa yakxano kinni?”

⁴³ Simcoon lel: “Mango cida akah yeseemexe tiyah yolle higgida” yerhxeh alle yedebbe. Yeesus lel: “Meceetih tifride” akko yerhxe.

⁴⁴ Amaa numalle yufkuneh Simcoonuk: “Ta numa table? Anu ku caredde orobe. Atu yi ibah laye yoh maaxayinnito. Ishi laakin yi iba ishi dhiimoh arhurhusseh, ishi dagarah tukteh tane.

⁴⁵ Atu fugto yoh mikuurhito. Ishi laakin anu orobemko taahe, yi iba fugutaanam xabteh mitane.

⁴⁶ Atu zeetih amo yoh maskatito. Ishi laakin cithirih iba yoh tuskuteh tane.

⁴⁷ Amaydo kok arhxiyuk ane, ishi mangum tikxinemhi sabbatah tee mango zambi akah xabbiimeh yane. Dagum akah xabbimteti laakin dagum yakxine” akko yerhxe.

⁴⁸ Yeesus lel teyak: “Ku zambi koh xabbiimeh yane” akko yerhxe.

⁴⁹ Amaa kaalih beetak tinem lel sinne-sinneh: “Miyatto kinni tati, zambe gantah xabshiishati?” yarhxoona erherhishen.

⁵⁰ Usuk lel amaa numak: “Ku imaan ku gargeereh yane. Isheh salaamadde aduu” akko yerhxe.