Luukas 5 - Saaho Cusub Cahde

Yeesus afti katattaynit doora

¹ Tekke lel, mango xiyaw Yallih waani yaabboona kaa wakalille antseqheeqhethuk, usuk Gennesaaret igil hi afak daw-arhxuk yine

² Igil afalle lel lamma jalba yuble. Caasa tagoofofem laakin akko oobeenih sinni caasat intilel cakalishaa yinin.

³ Amaa jalbabko wuli tiyadde (Simcoon tiyä kintiyä) koreh, baarhooko lel dagum addalle mirix-isho kaa essere. Usuk lel defeyeh xiyaw amaa jalbaako yuyduruse.

⁴ Waani abayshe gedda lel Simcoonuk: “Maraba fanah orbishsheh sin caasat intilel agaafafah oobisha” akko yerhxe

⁵ Simcoon lel: “Mucallimo, muluu bar xawalneh walaa inkim mabbarhino! Ku waanih laakin ta caasat intile oobisho kiyo” yerhxeh alle yedebbe.

⁶ Tayim aben gedda lel xadde hin caasa yibbirhiinih ten caasat intilel candhiirho erherhishe.

⁷ Aki jalbadde yine ten zoobah lel ten xatoona akah yiymikniin. Usun yemeetiinih lel lamma jalba tamandhaco erherhishshandah yemegin.

⁸ Simcoon Bithroos tayim yuble gedda, Yeesusko gulubulle akko radeh: “Maddara, anu zambi-wanna kiyom hi sabbatah, mirix yok erhex” yerhxe.

⁹ Tayim lel kaa kee kaalih tinem inkoh amaa agoofofuk yibbirhin caasah yussuxuttutiinih kinni.

¹⁰ Yacqoob kee Yohannis Zibdi cindham, Simcoon zooba kinya yakkeedo amayim balih. Yeesus lel: “Mimashshiitin. Kadooko lakalle xiyaw yabbirhe tiya takko kito”.

¹¹ Usun lel jalbab baarholle yeyyeecinyaako ummanim xabeenih kaa katayen.

Yeesus wuli saknite tiya yaysiffiye

¹² Usuk daafofko wuli tiyalle anuk, taykinna lel wuli saknah yemmeege xiyawti yine. Usuk Yeesus yuble gedda, nifih radeh kaa dhaacimak: “Maddara, fadhdhemko yi taysaffawo dhicta” yerhxe.

¹³ Usuk lel ishi gaba dhirhiyeyaako kaa yibbirheh: “Anu farha, imsiffii” akko yerhxe. Akkanih lel sakna akah xabte.

¹⁴ Walaa inkettah warishamko lel kaa asuuse. “Laakin aduwaaki ishi nabse shekh uybulluu. Tenah shahaada takko lel ishi thahaarah Moosa yeezezem balih muttuxuwa bah” akko yerhxe.

¹⁵ Kaa wari laakin faax-arhxuk faax-yerhxe. Mango xiyaw lel kaa yaabboona kee sinni laxuuko uroona kayyalle yekeekettin.

¹⁶ Usuk laakin zibolle yacrhiyeh assilluuk yine.

Yeesus wuli kafe tiya urusa

¹⁷ Wuli max lel tekke, usuk aydurusuk yine. Umman Galiila kee Yahuudiyaati diikaako kee Yerusaalemko temeete Faarisiin kee sercat mudarrisiin lel amalle defeyak yinin. Uruso lel Maddari xayli kaalih yine.

¹⁸ Taykinna lel, wuli labha kafe xiyawto barellalle baahen. Addadde kaa orbisheenih lel kaa rigidille carhah hayoona farhak yinin.

¹⁹ Mango xiyawhi sabbatah addadde kaa orbishoona afa wayen gedda laakin, cari bukak koren. Xalel faakeenih lel kaa kee kaa barellaalih hallaahallisheenih fantalle Yeesus rigidille oobishen

²⁰ Ten imaan yubleh lel: “Ko xiyawto! Ku zambit koh xabbiimeh yane” akko yerhxe.

²¹ Sercat dhiiceenit kee Faarisiin lel: “Miyatto kinni waatimak yaneti? Yalla bisaako bextih, miyatto kinni zambe xabshiishati?” arhxuk yaxaasaboona erherhishen.

²² Yeesus laakin ten xasaab yeerhegeh taginah alle yedebbe: “Aymihi ta gina lem sinni afcaadodde taxeesebiinim?

²³ ‘Ku zambit koh xabbiimeh yane’ yarhxiinim kee ‘Ugutaaki aduu’ yarhxiinimko awlihim ruhuwa?

²⁴ Amaydo, Xiyawti Barhi zambe baarholle xabshiisho reeza lem taarhagoona ciloh, ‘Kok arhxiyuk ane: ugutaaki ishi barella tuttuqhuceh careh aduu’ (akko yerhxe amaa kafe tiyak)”.

²⁵ Akkanih ten nifille uguteh lel amaa carhah alle yine tiya yuttuqhuceh, Yalla aynabuk ishi careh yedee.

²⁶ Inkoh lel cibrah qalbe xaben, Yalla aynabuk, mashshih yemmeegiinih lel: “Kaafa bexsishsha xaaja nuble” yerhxin.

Yeesus Leewih deecima

²⁷ Irolle yewcemko sarrah lel Leewi akko yarhxin miiri yaskatte, miiri alle yaskattin caralle defeyak yuble. “Yi kataa” lel akko yerhxe.

²⁸ Ummannim xabeh lel uguteh kaa kataye.

²⁹ Leewi lel ishi carelle naba cazuuma akah abe. Mango miiri yaskattit kee aki xiyaw lel tenlih maaddille cikkishiteenih yinin.

³⁰ Faarisiin kee sercat dhiiceenit lel kaa katattaynitille: “Aymihi miiri yaskattit kee zambi-wannunlih bettaanah taacubiinim?” yerhxiinih alle yongoroozomin.

³¹ Yeesus lel: “Xaakim farhshiisha mari laxuute mara kibah caafiyat-le mara maki.

³² Zambi-wannun tooballe kibah xaqqi-wannunuh deecimo maamatiyo” yerhxeh alle yedebbe.

Siyaam essero

³³ Usun lel: “Yohannis katattaynit mangole gedda yasoomiinih yassilliin, Faarisiinim amayim balih. Kum laakin beetaanah yaacubin” akko yerhxin.

³⁴ Yeesus lel: “Waraddi, marcawwi tenlih anuk taysaamoona dhictaana?

³⁵ Marcawwi tenko beyan waqhti yamaato kinni. Amayek sarrah lel amaa waqhte yasaamoona kinon” akko yerhxe.

³⁶ Wuli aymassal yakkeedo akah warishe: “Gamde cusub sareenaako candhisheh zirte sareenadde yayrhibbisheti miyane. Abemko lel cusub tiya candhisho kinni. Cusub gamdi lel zirte tiyaalih miyamseene.

³⁷ Cusub wayni lel zire waynit idritidde hayati miyane. Abemko lel cusub wayni amaa waynit idrit fotkishsheh xarhitto kinni. Amaa waynit idrit lel caynito kinni.

³⁸ Cusub wayni laakin cusub waynit idritidde gaxto alle tane.

³⁹ ‘Awwalim tashshe’ yarhxemhi sabbatah lel awwal wayni yoocobek sarrah cusub wayni duumutati miyane.”