Luukas 4 - Saaho Cusub Cahde

Yeesus cakana

¹ Yeesus lel Quddus kin Ufayeh yemmeegeh Yordaanosko gaxeh, Ufayeh lel zibolle yimmirrixe.

² Marootom lellectiya ibliisih yimcikkine. To lellecidde lel inkim mibeetinna. Amaa lellec bakite gedda lel safriite.

³ Ibliis lel: “Yallih Barha tekkemko, ta dhaak ‘Folo tik’ akko erhex” akko yerhxe.

⁴ Yeesus lel: “‘Xiyawti foloh bisa mimaram’ tunkuttubeh kinni” yerhxeh alle yedebbe.

⁵ Ibliis lel xaftalle kaa yeyyeeceh, umbuka uduuniyat nigsinnan inki waqhtelle kaa yuybulluwe.

⁶ Ibliis lel: “Inkoh ta reeza kee tee nabne koh axawo kiyo. Yottah tomxowwemhi sabbatah inneh farhe tiyah tee axaye.

⁷ Amaydo, yi nifille yoh tucbudemko tayim inkoh kum yakko kinni” akko yerhxe.

⁸ Yeesus lel: “‘Maddara ishi Yallah ucbud, kayyah bisa ukhdum’ yarhxiinim tunkuttubeh kinni” yerhxeh alle yedebbe.

⁹ Usuk lel Yerusaalem fanah kaa yiymirixeh, maqhdasti carih bukahi erherhak hayeh, “Yallih Barha tekkemko, guballe ishe cid.

¹⁰ ‘Ku dhawrho, ku zacabah ishi malaykut yeemereh’

¹¹ ‘Sinni gabubuh xaf ku ishoona kinon, amaymih ku ibi dhayittodde gomfoyto maki’ tunkuttubemhi zacabah kinni” akko yerhxe.

¹² Yeesus lel: “‘Ishi Yalla tascakkano kolle mitane’ yarhxiinim tane” yerhxeh alle yedebbe.

¹³ Ibliis lel cakanan inkoh abayshe gedda, mece waqhte geyandah kaa xabe.

Yeesus ishi ciyyo erherhisha

¹⁴ Yeesus lel Ufayi xaylah Galiilalle gaxe. Kaa wari lel umbuka amaa wakalille faax-yerhxe.

¹⁵ Usuk lel ten sunagoogedde aydurusuk, umman tenko lel nabne geye.

Yeesus Naazretille xinnitima

¹⁶ Usuk alle carsime Naazret fanah lel yemeete, Sambat lellec lel ishi baso balih sunagoogedde orobe, yaqhraw yerhxeh lel ugute.

¹⁷ Nabii Isayas maqhaddamat lel akah yomxoye. Amaa maqhaddamat faake gedda lel:

^18-19 “Baaxentit Mece Ware aybassaro doorot assakat yoh abemhi sabbatah, Maddari Ufayi yi bukalle yane. Tindhibbirhemih muuca warroysho, inti-malit mablo geyshisho, tunzullumemih finja axawo, Maddari mecaani adde temeete iggida warroysho yi fareh yane” yarhxiinim alle tunkuttube cara geye.

²⁰ Amaa maqhaddamat alifeh lel amaa xattiimeenalle yedebbeh defeye. Amaa inkoh sunagoogedde tinemhi intit lel kayyadde kafeh yine.

²¹ Usuk lel: “Kaafa Kutuub atin aabbuk yikmileh yane” akko yarhxo erherhishe

²² Inkoh lel akah yishhidiinih kaa afko awcuk yine nicmat kalimaatah cibrah raben. “Tati Yoosuf barha makini?” lel yerhxin.

²³ Usuk lel: “Ta aymassal yok tarhxoona kitiinimih thummut kiyo: ‘Ko xaakimo, ishe urus!’ Kafarnaxuumulle abte aye kok noobbem, ta ishi dikille ab” akko yerhxe

²⁴ Kataysheh lel: “Walaa inki nabii ishi dik hi daafolle mikabbaatimam, rummah sinak arhxe.

²⁵ Rummah sinak arhxe, Eliyaas waqhtedde, caran adooxa iggida kee lixa alsa alfiimeh umbuka baarholle sirii culul yine gedda, Israa-eelille mango gubon yinin.

²⁶ Eliyaas laakin, Tsiidoonti Tsaareftalle tine gubna kin numa fanah kibah, tenko inketta fanah mifarritiminna.

²⁷ Nabii Eliisac waqhtedde lel, Israa-eelille mango saknittem yinin, laakin Suuriyaati Nacamaan bisa kibah tenko tii mansaffayinna” yerhxe.

²⁸ Tayim yoobbin gedda, amaa sunagoogedde tinem inkoh kurah yemmeegin.

²⁹ Uguteenih lel daafooko irolle kaa yeyyeecin. Kaa boolishoona ciloh lel ten daafo alle siraaximteh tine xangalhi gimam fanah kaa beyen.

³⁰ Usuk laakin ten fanko tillaabeh yedee.

Yeesus najaasa-le ufaye le xiyawto urusa

³¹ Galiilaati daafo Kafarnaxuum fanah lel oobe. Sambatah lel ten aydurusuk yine.

³² Reezaalih waanishemhi sabbatah, kaa aydarasah yussuxuttutin.

³³ Sunagoogedde wuli najaasa-le jinnetti ufaye le xiyawti yine. Wac-yarhxe andhaxah zeereh lel:

³⁴ “Aa! Ko Naazret Yeesuso, ayim nottaalih lito? Atu notta taylaw temeete? Anu miyatto kitom ku aarhige. Atu Yallih Quddus kin tiya kito” yerhxe.

³⁵ Yeesus laakin: “Sik-erhexaaki, akko ewec!” yerhxeh kaa yoskoolofe. Amaa jinnetti ten fanadde kaa cideyaako kaa dhafekkah akko yewce.

³⁶ Tekke lel, inkoh yussuxuttutiinih sinne-sinneh waanishoona erherhishen: “Ta waani ayim kinni? Amayim lel najaasa-le ufayit reeza kee xaylah yaamire, usun lel yawcin” yerhxin.

³⁷ Wari lel kaa zacabah umbuka amaa wakalelle faax-yerhxe.

Yeesus mango mara urusa

³⁸ Usuk lel uguteyaako sunagoogeeko yewceh Simcoon caredde orobe. Simcoon ballö lel sirii lacnah laxutteh tine. Usun lel teyah kaa esseren.

³⁹ Tee bukalle daw-yerhxeh lel amaa lacna yoskoolofe gedda akah xabte. Ishi akkanih ugutteh lel ten takhdamo erherhishshe.

⁴⁰ Ayro dhumak tine gedda, yemfeleele laxuuh laxuute mara lem inkoh kayya fanah baahen. Usuk lel tittiyah ishi gaba alle oobisheh ten uruse.

⁴¹ Zeeroh: “Atu Yallih Barha kito” arhxuk, junuun yakkeedo mango maraako yewce. Usuk laakin ten yoskoolofe, usun Masiix kinam kaa yeerhegiinimhi sabbatah, waanishaanamko ten deese.

Yeesus Sunagoogedde yayduruse

⁴² Maaxi maaxe gedda, Yeesus zibo kin makaano fanah yedee. Mango xiyaw lel kaa wagiyaa yinin. Kaa fanah yemeetiinih lel akko yadiyemko kaa yibbirhin.

⁴³ Usuk laakin: “Taymih farritimemhi sabbatah, aki daafofulle yakkeedo Yallih Mece Ware aybassaro yolle tane” akko yerhxe.

⁴⁴ Usuk lel Yahuudiyaati sunagoogitidde warroyshaanam katattayshe.