Luukas 3 - Saaho Cusub Cahde

Yaythimmiqhe Yohannis arax yasqirribe

¹ Tiberiyos akko yarhxin Roomaati naba nugus hi nigsinnahi koonan kee taman-ya iggidah, Bontiyos Bilaatos Yahuudiyaati manabotta kuuk, Heerodes lel Galiilaati amotta, kaa sacal Filibboos lel Itureya kee Tirakhoonitisti amotta, Lisaaniyas lel Abileneti amotta kuuk,

² Hannas kee Kayaafas lel sheekhat makaabun kuuk yinin gedda, Yohannis Zakariyyaati barhi zibolle anuk, Yallahi waani alle temeete.

³ Usuk lel zambi xabbot geyoona ciloh, toobat anthammaq warroyshak, umbuka Yordaanos wakalille yuzuure.

⁴ Nabii Isayas kitaabhi waanidde akah tunkuttubeh taneekah: “Zeeratiih dhaw zibolle yamabbe: ‘Maddarah arax akah isqirriba, kaa arax rig-ishanta.

⁵ Umman xoolim yammaago, umman kooma kee xangal lel sam-yarhxo, kodhdharh rig-yarhxo, xogaagid kin arux lel yamsalxano,

⁶ umman xiyawti barhi lel Yallahi garger yablo kinni.’”

⁷ Amaymih, Yohannis yanthammaqho kayyalle temeete mango xiyawak: “Ko datali zarawo! Amiituk tane kuraako kuddoona mii sin asuuse?

⁸ Amaydo, toobah missil fire lem aba, sinnedde lel ‘Abraahim abbah lino’ tarhxoona meerherhishina. Yalli Abraahimih ta dhayitko cindham akah abo dhiicam sinah warisha.

⁹ Kado yakkeedo faas xorhti rimidille carhah yane. Amaydo, mece daro baahinnexe xarha tiggiriceh giradde gaxta”, akko yerhxe.

¹⁰ Amaa mango xiyaw lel “Amaydo, ayim abno nolle tane?” yerhxiinih kaa esseren.

¹¹ Usuk lel “Lamma qamish aallinnanti, inkim aallinnixe tiyah xaziila. Macaasha aallinnanti lel amayim balih” yerhxeh alle yedebbe.

¹² Miiri yaskattit yakkeedo yanthammaqhoona yemeetiinih: “Mudarris, ayim abno nolle tane?” akko yerhxin.

¹³ Usuk lel “Akah sin yeemeriinimko ziyaada maskattina” akko yerhxe.

¹⁴ Caskar yakkeedo: “Nanu lel, ayim abno nolle tane?” arhxuk kaa esseren. Usuk lel “Walaa inketta maskalaabatina, hido lel zirabah maksasina, sinni maahiyah lel iqhnica” akko yerhxe.

¹⁵ Amaa xiyaw ilalta luuk yiniinimhi zacabah, Yohannisik “Kela tati Masiix yakke?” arhxuk inkoh sinni afcaadodde axeesebuk yinin.

¹⁶ Yohannis lel: “Anu layeh sin aythimmiqhe, laakin yottaako ziyaada xayla leti amiituk yane. Anu lel kaa kabelhi ragad akko aftaxo meeda. Usuk lel Quddus kin Ufaye kee girah sin yaythammaqho kinni.

¹⁷ Ishi cawda yatsrago kee sinraa ishi ilaw qafodde yaskatto ciloh, kaa mase kaa gabadde tane. Xasar laakin badinnixe giradde xararisho kinni” yerhxeh alle yedebbe.

¹⁸ Taginah lel, usuk xiyaw aki mango uguuguslih Mece Ware ten yiybissire.

¹⁹ Galiilaati affara zoobah manabotti Heerodes laakin tamaa kaa sacalhi numa kin Heerodiyasti zacabah kee inkoh aki umaani abeyah Yohannisih cadalime gedda,

²⁰ tayim lel aki mangumudde ositeh: usuk Yohannis xabshedde alife.

Yeesus anthammaq

²¹ Tekke lel, amaa xiyaw inkoh anthimmiqhuk yinin gedda, Yeesus yakkeedo anthimmiqhuk yine. Usuk assilluuk lel carshi fakkiime,

²² Quddus kin Ufayi lel nabseelih xamaamat xibarak kayyalle oobe. Carsheeko lel dhaw yemeete: “Atu yinkixxine Yi Barha kito. Anu kottaalih xedeneena kiyo.”

Yeesus Masiix maabako

²³ Yeesus ishi aydaras erherhishe gedda lel soddom iggidiya takkem cumreh luuk yine. Akah kaa akkaluk yiniiniikah usuk Yoosuf barha, Ceelit barha,

²⁴ Mattat barha, Leewit barha, Melkhit barha, Yannayit barha, Yoosuf barha

²⁵ Mattatiyas barha, Caamoos barha, Naxuum barha, Eslit barha, Naggayit barha

²⁶ Maat barha, Mattatiyas barha, Semeyin barha, Yooseekh barha, Yoodit barha,

²⁷ Yoonaan barha, Reesat barha, Zerubbaabel barha, She-altiyel barha, Neerit barha,

²⁸ Melkhit barha, Addit barha, Koosam barha, Elmadam barha, Ceer barha,

²⁹ Yehooshucit barha, Eliicezer barha, Yoorim barha, Mattat barha, Leewit barha,

³⁰ Simcoon barha, Yahuudi barha, Yoosuf barha, Yoonam barha, Elyaaqhiim barha,

³¹ Meleyit barha, Mennit barha, Mattaatit barha, Naataan barha, Dawud barha,

³² Yishxay barha, Coobed barha, Boocaz barha, Salmoon barha, Naxshoon barha,

³³ Cammiinaadaab barha, Admin barha, Arnit barha, Xetsroon barha, Beretsi barha, Yahuudi barha,

³⁴ Yacqoob barha, Isxaaq barha, Abraahim barha, Terax barha, Naaxoor barha,

³⁵ Seruug barha, Recut barha, Beleg barha, Ceeber barha, Shelax barha,

³⁶ Qeenan barha, Arpaksad barha, Sheem barha, Nuux barha, Laamek barha,

³⁷ Metuuselax barha, Xanokh barha, Yaared barha, Mahalal-eel barha, Qeenan barha,

³⁸ Enoosh barha, Sheet barha, Adam barha, Yallih barha kuuk yine.