Luukas 24 - Saaho Cusub Cahde

Rabaakohi ugut

¹ Amaa sayyo laakin baxuurooko afti lellecidde, dhaxiine ifanih amaa yisqirribiinih yinin qamam beyeenih amaa qabre fanah yedeyin.

² Amaa qabreeko lel duma akko tendedebbeh akah sugte.

³ Addadde oroben gedda laakin Maddara kin Yeesus nabse migeyinnooni.

⁴ Taykinna lel amaymih bexsiitak, lamma xiyawti lilic-yarhxe sara sariteya ten afalle daw-yerhxin.

⁵ Usun mashshiitenyaako nifih baarhodde cunuunak, amaa mari: “Yane tiya rabtemhi fanadde akah wagiitaanam ayim kinni?” akko yerhxin.

⁶ “Usuk rabaako ugutenkah talle miyane. Galiilalle anuk ayim sinak yerhxeh yinem izzikkira.

⁷ Amayim lel Xiyawti Barhi zambi-wannunti gabadde rado kinam kee masqalak takarimeyaako maddaxit lellec rabaako uguto alle tinemhi sabbatah kinni.”

⁸ Usun lel kaa waani yizzikkirin.

⁹ Amaa qabreeko gaxenyaako lel tayim inkoh amaa inikan kee taman kee aki xiyawah warishen.

¹⁰ Tayim amaa fartottitik terhxem lel Magdalat Maryam, Yohanna, Yacqoob ina kin Maryam kee tenlih tine aki sayyo kuuk yinin.

¹¹ Ta waani laakin tinem-tineh adde yimmingidenkah ten maamaninnooni.

¹² Bithroos lel uguteyaako amaa qabre fanah yerde, cunuuneyaako addadde kulux-yerhxe gedda lel amaa maknaz ishi ulah yuble. Ta tekkeh tinemih cibrah rabak lel careh yedee.

Emmayusaati araxadde

¹³ Amaa lellecidde lel tenko lamma wuli Emmayus akko yarhxin dik Yerusaalemko inikan kee taman kiilometer takkeya fanah aduuk yinin.

¹⁴ Sinne-sinneh lel inkoh amaa tekkeh tinemidde waanishak yinin.

¹⁵ Inkidde waanishak kee haasawak anuk lel isheh Yeesus kab adde yerhxeyaako tenlih yedee.

¹⁶ Kaa yaarhigiinimko laakin ten intit deesimeh yine.

¹⁷ Usuk lel: “Ayim kinni ta adiitin sittaalih abaa sugten wagri?” akko yerhxe. Usun lel yiqhdibinyaako daw-yerhxin.

¹⁸ Amaymik sarrah tenko wuliti, Kiile-obas akko yarhxinya: “Kotta bisa akkale Yerusaalem gerhenti ta ayyamadde amalle tekkem aarhiginnixeya?” yerhxeh alle yedebbe.

¹⁹ Usuk lel “Ayim?” akko yerhxe. Usun lel: “Naazret Yeesus zacabah, ta Yalla kee umbuka xiyawhi nifidde abitto kee waanittah dhiiceena kin nabii kuuk yine xiyawto.

²⁰ Ni sheekhat manabottit kee reezon aaginah rabih yamfarrado Kaa yiyrhibirhiinim kee aaginah masqalak kaa takareenim.

²¹ Nanu laakin Israa-eel mayyaaca yakko cag abinneh nine. Yoo, amayimko bextih, tayim tekkemko taahe kaafi maddaxit lellec kinni.

²² Ummanimko ziyaada lel wuli ni zooba kin sayyo ni bexsiishen. Usun subxe qabrelle yinin.

²³ Kaa nabse geye wayen gedda lel, usuk wafaalih yanem akko yerhxe malaykutti mablo gantah nuble arhxuk lel gaxen.

²⁴ Nottaalih tinemko gari lel amaa qabre fanah yedeyinyaako amaa sayyo akah yerhxiinih yiniiniikah geyen. Kayya laakin maballinnooni” akko yerhxin.

²⁵ Usuk lel: “Ko nobowa inkoh waanisheenim yaamano waye tirir afcaado le duudito!

²⁶ Masiix taymih yimcizzibeh ishi nabnedde orobo farhshishsham makiho?”

²⁷ Moosaako erherhisheh umbuka Nobowa, kaa zacabah umbuka Kutuubudde tanem inkoh akah caddoyshe.

²⁸ Sarrah lel amaa alle aduuk yinin dikih yendhewwin. Mirix-ta fanah aduuk yine tiya balih lel adde yimmingide.

²⁹ Usun lel sirii ginah: “Baarho kamboh dhuma kinni, ayrotta tentebeh tanek nottaalih dhin” arhxuk kaa dhaacimen. Usuk lel careh tenlih yedee.

³⁰ Tekke lel, maaddille tenlih defeyeh, folotta beyeyaako dhaaco alle abeh yigdileyaako akah yoxoye.

³¹ Ten intit fakkiteyaako lel kaa yeerhegin. Ten mablooko lel yelee.

³² Sinne-sinneh lel: “Usuk adiinuk araxadde Kutuub caddooso faakeyaako nottaalih waanishe gedda ni afcaadod addaako nodde bololeh makiho?” sittak yerhxin.

³³ Amaa saacadde uguteenih lel Yerusaalem gaxen. Amaa inikan kee taman kee amaa tenlih inkidde teketteh tinem lel geyen.

³⁴ “Maddari lel rummah rabaako uguteh yane, Simcoonuh lel yumbulluwe!” arhxuk yinin.

³⁵ Usun lel araxadde ayim tekkeh tinem kee folotta agdiluk aaginah akah yimidhdhigem akah warishen.

Yeesus ishi katattaynitih yambulluwe

³⁶ Taymidde waanishak lel Yeesus isheh ten fanadde sooleyaako: “Salaam sinah yakko!” akko yerhxe.

³⁷ Usun laakin ufaye abluk yanin sinne yekkeliinih birriigeenih mashshiiten.

³⁸ Usuk lel: “Aymih kinni tamsheeqheliinim, aymih kinni sinni afcaadodde shakke haytaanam?

³⁹ Yi gabub kee yi iboobi ubula. Tati yotta kinni! Yi dhagantaaki ubula! Anu liyom akah tabliiniikah, ufayi xazo kee lafuf maleya” akko yerhxe.

⁴⁰ Tahe yerhxeyaako lel ishi gabub kee ishi iboobi ten yuybulluwe.

⁴¹ Usun xedenih kaddih yaamanoona waynih cibrah rabak lel: “Talle beetaanamah litiinim leho?” akko yerhxe.

⁴² Usun solliime caasatti dhacto akah yoxoyin.

⁴³ Usuk lel bishshiiteyaako ten afalle beete.

⁴⁴ Amaymik sarrah lel usuk: “Tayim lel anu sinlih aniyuk, yi sabbatah Moosat Sercat, Nobowa kee Zaaburudde tunkuttubem inkoh takmalo alle tane sinak erhxeh iniyo yi waani kinni” akko yerhxe.

⁴⁵ Amaymik sarrah lel amaa Kutuub yafhamoona ciloh xangal akah faake.

⁴⁶ Tahe lel akko yerhxe: “Masiix yamcazzabo kinam kee maddaxit lellec rabtemko uguto kinam tunkuttubeh kinni.

⁴⁷ Kaa migacalle lel tooba kee zambi xabbot Yerusaalemko erhedhdheh inkoh ummatalle warroyto kinni.

⁴⁸ Atin lel taymih shohoda kitin.

⁴⁹ Taykinna lel yi Abba wacde akah sayeh yinem sinah dhirhiyak aniyo. Atin lel aganaako xayla sarittaanandah amaa daafodde suganta” akko yerhxe.

Carshellehi kornan

⁵⁰ Irolle lel aykee Beetcaniya fanah ten beyeyaako ishi gabub xaf-isheh ten yeybeereke.

⁵¹ Tekke lel, ten aybeerekuk yinemko ten xabeyaako lel carshelle yumuqquce.

⁵² Usun lel akah yucbudiinih mango xedenlih Yerusaalem gaxen.

⁵³ Yalla faylishitak lel maqhdas caredde dhuguugulusen.