Luukas 23 - Saaho Cusub Cahde

Yeesus Bilaatos nifille

¹ Sarrah, amaa teketteh tine xiyaw inkoh uguteenih Bilaatosulle kaa baahen.

² Tahe yerhxiinih lel kaa yaksasoona erherhishen: “Ta xiyawti, ishi nabsekke Masiix, nugus kiyo arhxuk kee ta xiyaw doolabeyaako Roomaati naba nugusuh wirko naxayemko ni deesak noh suge.”

³ Bilaatos lel: “Atu Yahuud nugus kitoho?” yerhxeh kaa essere. Usuk lel: “Atu gantah arhxituk tane” yerhxeh alle yedebbe.

⁴ Amaymik sarrah lel Bilaatos, sheekhat manabottit kee tekette xiyawak: “Ta xiyawtodde cagab-wanna akko abtam adde migeyinniyo” akko yerhxe.

⁵ Usun laakin: “Umbuka Yahuudiyalle, Galiilaako erherhisheh ta baarho fanah gantah aydurusuk xiyaw zirigak yane” arhxuk ambeetsecuk yinin.

Yeesus Heerodes nifille

⁶ Bilaatos tayim yoobbe gedda, ta xiyawti Galiilaati tiya yakkemko esserime.

⁷ Usuk Heerodes galedde tane zoobah tiya kinam yeerhege gedda lel amaa waqhte isheh Yerusaalemille yine Heerodes fanah kaa dhirhiye.

⁸ Heerodes Yeesus yuble gedda kaa yablo mango farhi luuk yinemhi sabbatah mangum xedene, amayim lel kaa ware yoobbeh yinemhi sabbatah kee usuk aba wuli bexsiisha ishaarar yablo caagak yinemhi sabbatah kinni.

⁹ Amaymih usuk wuliidhdha kaa esserehaaki usuk radde maadabbinna.

¹⁰ Sheekhat manabottit kee sercat dhiiceenit lel dhacumaatih kaa aksisuk agaagalle daw akko yerhxin.

¹¹ Heerodes kee kaa caskar lel kaa ilaaceniyaako alle tsaggarowen. Carha-mece sara kaa sarisheh lel Bilaatosulle kaa yedebbe.

¹² Heerodes kee Bilaatos lel amaymik basolle sittiyahi cangit kuuk yiniinimko amaa lellecidde soxoba yekkin.

¹³ Bilaatos lel sheekhat manabottit, reezon kee xiyawah inkoh inkidde akah deecimeh:

¹⁴ “Ta xiyawto xiyaw aylalawuk yane tiya balih akko abteenih yolle bahten. Sin nifille imirmiremik sarrah lel, taykinna, tamaa atin akah kaa tiksisiinimko lel ta xiyawtodde cagabah inkim adde migeyinniyo.

¹⁵ Heerodes yakkeedo adde migeyinna, notta fanah kaa yedebbe. Ubula, rabi akah eeddam usuk abeyah walaa inkim mitane.

¹⁶ Amaymih, kaa iqhtsiceh kaa dhirhiyo kiyo” akko yerhxe. [

¹⁷ Cid cidih lel inki maxbuushsha akah yayyaacem labcaadeenih yinin.]

Bilaatos Yeesus masqalak takarimo yaxaye

¹⁸ Usun laakin: “Ta xiyawto mirix nok ishaaki Barabbaas noh eyyec” yerhxiinih inkoh zeeren.

¹⁹ Barabbaas lel daafolle erherhe cigirgir kee gidfoh xabshedde cidditeh yine tiya kuuk yine.

²⁰ Bilaatos lel Yeesus dhirhiyo farheyaako malammih tenlih waanishe.

²¹ Usun laakin: “Masqalak Takar, Masqalak kaa takar” arhxuk zeeren.

²² Maddaxit gedda lel: “Aymih? Umaanih ayim abeh yane? Rabo akah eeddamah walaa inki cagab adde migeyinniyo. Amaymih iqhtsiceh kaa dhirhiyo kiyo” akko yerhxe.

²³ Inkoh wac-yerhxiinih lel takarimo alle tanem gaxen gaxeenih kaa esseren. Ten andhax lel agana gaxe.

²⁴ Bilaatos lel ten farhi balih takko abayshe.

²⁵ Cigirgir kee gidfoh xabshedde cidditeh yine xiyawto, usun esserenya, yeyyeeceh, Yeesus laakin ten farhi balih tillaabisheh kaa yosxoye.

Masqalakkehi takarimnan

²⁶ Usun kaa beyak, zibooko amiituk suge wuli Simcoon Kureeneeko kinya yibbirhiinih, Yeesus sarradde gaxeh kaa masqal yaaqhaco alle hayen.

²⁷ Mango xiyaw kee sayyo kayyah zertah taxzineya lel sarradde akko aduuk yinin.

²⁸ Yeesus laakin tenadde yufkuneyaako: “Yerusaalem saytoo, sinne kee sinni cindhamah weca kibah yottah miweecina.

²⁹ Amayim lel taykinna: ‘Gedam, inkim baahinnixe guzez kee dhoysheh sorha angug baraka-lem kinon’ adde yarhxin maaxi yamaato kinamhi sabbatah kinni.

³⁰ Amaymik sarrah lel koomamak: ‘Nolle rad’, xanguluk lel: ‘Ni agoogish’ akko yarhxoona erherhishoona kinon.

³¹ Amayim lel xorh andharhuk tayim akko abanya, kafa gedda ayim takko kinni?” akko yerhxe.

³² Aki lamma, wuli umam-abeenit kinya lel, kaalih yagdafoona beyak yinin.

³³ “Amot xanxanta” akko yarhxin makaano gufen gedda lel amalle, amaa umam-abeenit yakkeedo, wuli tiya kaa mizgi gabooko, wuli tiya lel kaa guri gabooko eelih hayeenih masqalak kaa takaren.

³⁴ Yeesus lel: “Wobba! abaanam miyaarhigiiniiki alle xab” yerhxe. Kaa sara xazitoona lel cija ciden.

³⁵ Xiyaw daw-yerhxiinih abluk, amaa reezon laakin: “Usuk Yallih Masiix, kaa Doorime tiya yekkemko, aki mara gargeerek ishe gargeero” arhxuk alle aasuluk yinin.

³⁶ Caskar gantah kab alle yerhxiinih cur-tarhxe wayni akah yoxoynih alle digirak:

³⁷ “Yahuud nugus tekkemko, ishe garger!” akko yerhxin.

³⁸ Kaa bukakke lel: “Tati Yahuud Nugus kinni” tarhxe kataaba tine.

³⁹ Amaa takarimteh tine umam-abeenitko wuliti lel: “Atu Masiix makitoho? Ishe kee notta garger” arhxuk akah waatimak yine.

⁴⁰ Ooti laakin: “Inki caynah firdedde tanito hanuk, Yalla mimashshitta?

⁴¹ Nottah noh, ni abittoh jaza kabbaatak nanino, ta xiyawti laakin umaanih walaa inkim maabinna” yerhxeh kaa yoskoolofe.

⁴² “Yeesus, ishi nigsinnalle tamiite gedda yi izzikkir” lel yerhxe.

⁴³ Usuk lel: “Rummah, kaafa yottaalih jannadde takko kitom kok arhxiyuk ane” akko yerhxe.

Yeesus raba

⁴⁴ Kado lellecti abrha tekkeh tine, umbuka baarholle lel aykee kasit saaca adox fanah dite tekkeh tine.

⁴⁵ Ayro dattoyte. Macbadti carih goleena lel candhiirhoh lammalle gaxte.

⁴⁶ Sarrah lel Yeesus wac-yerhxeyaako deecoh: “Wobba! Inni ufaye ku gabadde hayak aniyo!” yerhxe. Tahe yerhxeyaako lel abayshimalle kaa wafa tewce.

⁴⁷ Bool caskartiyah manabotti tekkeh tinem yuble gedda: “Rummah ta xiyawti xaqqi-wanna kuuk yine” arhxuk Yalla yeynebe.

⁴⁸ Tayim yabloona inkoh amalle teketteh tine xiyaw lel ta tekkeh tinem yublin gedda sinni naxur aatukuk careh gaxen.

⁴⁹ Inkoh kaa taarhigem kee sayyo Galiilaako kaa katayteya lel tayim abluk mirixtalle daw-yerhxin.

Yeesus macaga

^50-51 Taykinna lel amalle wuli Yoosuf akko yarhxin xiyawti, Yahuud daafo kin Arimatayaako kinya yine. Usuk arabaako yekkeh mece xiyawto kee xaqqi-wanna kuuk yine. Usun bakinnannim kee abinnannimlih attifiqhuk miyine. Yallih nigsinna lel ilaalak yine.

⁵² Ta xiyawti Bilaatos fanah yedeeyaako Yeesus rashsha kaa essere.

⁵³ Amaymik sarrah lel oobisheyaako dabalaan maknazah kaa yiknizeh tayek basoh walaa inketti adde amcuginnixe qooqhaxadde faraacime qabredde kaa yoocoge.

⁵⁴ Anqaraarabti lellec kuuk yineyaako Sambat erherho luuk yine.

⁵⁵ Galiilaako Yeesuslih temeete sayyo lel Yoosuf kataynih amaa qabre yublin.

⁵⁶ Sarrah gaxenyaako lel qamamaat kee cithir-le zeet amaa rashshah yakkeya yisqirribin. Amaa amre balih lel Sambatah yucrufin.