Luukas 21 - Saaho Cusub Cahde

Gubnat muttuxuwa

¹ Yeesus foorolle kulux-yerhxe gedda gaddaalit yoxoynim maqhdas carih muttuxuwat sanduqhudde oobishak yuble.

² Wuli baaxenta kin gubna lel lamma santiim axayik yuble.

³ Usuk yerhxe lel: “Ta baaxenta kin gubna umman maraako ziyaada toxoyeh tanem rummah sinak arhxiyuk ane.

⁴ Tayim lel inkoh sinni mangumko yoxoyin, ishe laakin ishi waytooko inkoh akah marritimto taarhigem toxoye.”

Yeesus maqhdas carih dumnan yaakumeh warisha

⁵ Wuli mari maqhdas care mece dhayit kee Yallih muttuxuwah aaginah bilciteh yanemidde waanishak anih, Yeesus yerhxe:

⁶ “Ta abluk taniinimko dumekkah walaa inki dhayi bukaa-bukak adde raace wayo le max yamaato kinni.”

⁷ Usun lel kaa esseren: “Mudarris, tayim manda takko kinni, tayim takko le geddahi tuumar lel ayim yakko kinni?”

⁸ Usuk lel: “Atin doolabimtaanamko selita. Yi migacalle: ‘Usuk yotta kinni!’, ‘Waqhti lel orobeh yane’ arhxuk mango mari yamaatoona kinoonimhi sabbatah, ten lakadde maadayna.

⁹ Dhiba kee cigirgir taabbin gedda, tayim tookomeh takko alle tanemhi sabbatah migilixina, laakin abayshima akkanih takko maki” akko yerhxe.

Wathan wathanti diddeh uguto kinni

¹⁰ Amayek sarrah lel usuk: “Wathan wathanti diddeh, nigsinna lel nigsinnat diddeh ugutto kinni.

¹¹ Naba kirdidimom amayim balih barhsime wakaliilalle culul kee taba laxuu yakko kinni. Carsheeko lel birriigishsham kee naba tuumar yakko kinni.

¹² Umbuka tayimko basolle laakin, gabub sinadde hashshiiteenih sin hadanoona kinni. Sunagoogit kee xabshit fanah sin beyeenih lel yi migac hi sabbatah nuguusa kee masxadaadaritille sin baahoona kinon.

¹³ Tayim shaahid takkoona sin caashir yakko kinni.

¹⁴ Radde aaginah tadabboona kitiinim lel tookomiinih taxaasaboona sinalle mitanem sinni afcaadodde haya.

¹⁵ Amayim lel sin qarimko walaa inketti daw sinlih yarhxemko hido sin yaceeredemko Anu af kee kas sinah axawo kiyomhi sabbatah kinni.

¹⁶ Dhaltoyya, sacul, zamad kee soxoba tillaabisheenih sin yasxawna kinon, sinko garo lel yagdafoona kinon.

¹⁷ Yi migac hi sabbatah umman wathunuh tamnaccaboona kitin.

¹⁸ Laakin, sin amoh dagarko walaa inketti yalaw maki.

¹⁹ Sinni curtayyoh sinni aniina taksaboona kitin.

Yeesus Yerusaalem dumnan yaakumeh warisha

²⁰ Yerusaalem mango maxaarhoh maklalitteh tablin gedda laakin tee dumnan kab-yerhxeh yanem irhiga.

²¹ Amayek sarrah, Yahuudiyalle yane mari koomamalle kudoonaa, daafot addadde yane mari lel yawcoonaa, tamaa zibolle yane mari lel amaa daafodde orobe wayoonaa.

²² Amayim lel inkoh Kutuubudde tunkuttubem takmalo ciloh ta waqhti firdi tiya kinni.

²³ Baarholle naba masiiba, ta xiyawalle lel naba kura obto kinamhi sabbatah amaa maxadde soono kee dhoyishsha sayyo lel ten careyta!

²⁴ Usun lel sefih radoona kee umbuka wathunhi fanadde maxbuushiin balih ten beyoona kinon. Aki-marih waqhti yakmilendah lel Yerusaalemidde Aki-mari adde yacatcatoona kinon.

Xiyawti Barhih mumut

²⁵ Ayro, alsa kee xutukulle lel mango tuumar yakko kinni. Baarholle lel badti gorox kee goomadhdhet sabbatah wathunulle tsabaaba tekkeh abaanam sorhoona kinon.

²⁶ Carshitti xayli qinqin-yarhxo kinamhi sabbatah, xiyaw ta udduuniyalle amiituk tanemhi gilixih himma xaboona kee sikif-yarhxoona kinon.

²⁷ Amaymik sarrah, Xiyawti Barhi darurudde xayla kee naba nabneelih amiituk yabloona kinon.

²⁸ Kado, tayim takko erhedhdha gedda sin muuca kab-terhxeh tanemhi sabbatah daw-terhxiinih aganalle amo xaf-ishita” akko yerhxe.

Indacartooko nadrusem

²⁹ Wuli aymassal lel akah warishe: “Indacartö kee aki xorh inkoh ubula.

³⁰ Usun dharhaak yabqhulin geddaakoh, sinneh tabliinih karma mece geddaakoh kab-terhxeh tanem taarhigin.

³¹ Amayim balih, tayim akkuk tablin gedda, Yallih nigsinna kab-terhxeh tanem taarhigin.

³² Tayim inkoh takkendah, ta ijo tillabto makinam rummah sinak arhxiyuk ane.

³³ Caran kee baarho inkoh tillaaboona kinon, yi waani laakin tillabto maki.

Selita!

³⁴ Cayne, sakar kee nawashshiga afcaadolle sinak yaclishinyaako, amaa lellec gahreeko machchawaadiya balih bardag sinadde yarhxek selita.

³⁵ Amayim lel ta lellec umbuka ta baarhot garballe yane maradde yamaato kinamhi sabbatah kinni.

³⁶ Amaydo, ta takko lemko sinni rooxe tassaacoona kee Xiyawti Barhahi nifidde daw-tarhxoona xayla geytoonak assilluuk, umman gedda himma-abita.”

³⁷ Max-yeenim lel maqhdas caredde ten aydurusuk yine, bar laakin yadiyeyaako Oolac koomak yawceh dhiinak yine.

³⁸ Maaxalle lel xiyaw kayya yaabboona inkoh maqhdas carelle kaa fanah amiituk yinin.