Luukas 2 - Saaho Cusub Cahde

Yeesus Masiix ubka

¹ Amaa waqhtedde lel tekke, kaa gizet hi baarholle xiyaw inkoh yankattaboona Awgustus akko yarhxin Roomaati naba nugusko awaaj yewce.

² Tayim amaa Kureenyos Suuriya agzuk yine gedda tekke erherh kataaba kinni.

³ Ummanti lel ishi-ishi daafolle yankattabo yedee.

⁴ Yoosuf lel, Dawud meelaako kee ahlento kuuk yinemhi sabbatah Galiilaati Naazret daafooko, Yahuudiya fanah Beetlexem akko yarhxin Dawud daafolle yewce.

⁵ Kaa liishoytä kin Maryam lih lel yankattabo yedee. Ishi lel soonowa kuuk tine.

⁶ Usun amalle anuk lel ishe adde umulta waqhti gufe.

⁷ Ishi riishih lel barhalle umla tekke. Tenah takke cara gerhi makaanodde mitinemhi sabbatah agoogishsheh makal makaanolle carhah hayte.

Loynit kee malaykut

⁸ Amaa baarholle lel zibolle orobah barti gazalle sinni saca dhawrha loynit yinin.

⁹ Maddari malaykatti lel tenah yumbulluwe. Maddari nabne lel ten wakalille ifishshe. Mangum lel mashshiiten.

¹⁰ Malaykatti lel: “Mimashshiitina! Umman tiya xedenishsho le naba xedenhi bissiraata sinah baaheh aniyo:

¹¹ Kaafa Dawud daafolle Gargeereeni sinah yooboke. Usuk Masiix kee Maddara kinni.

¹² Tayim sinah tuumar kinni: laatseeni agoogiteh makal makaanodde carhah gaxeh sinah sugo kinni” akko yerhxe.

¹³ Gar-heeko lel mango carshi maxaarhi amaa malaykattoolih yekkiinih Yalla faylishak:

¹⁴ “Agani carshelle Yallah nabne, baarholle lel Yalli kixin xiyawah salaam!” arhxuk yinin.

¹⁵ Amaa malaykut carshi gabolle tenko yedeyin gedda, amaa loynit sinne-sinneh: “Kata Beetlexem fanah nedeeh ta tekkeh tane xaaja, Maddari lel ni yiyshidhdhigeya nabloo” sittiyak yerhxin.

¹⁶ Iba laceenih lel yedeyin. Maryam, Yoosuf kee amaa makal makaanolle carhah gaxe laatseena lel geyen.

¹⁷ Tayim yublin gedda lel amaa cindhooki zacabah malaykut tenah warisheenim akuula yiyshidhdhigin

¹⁸ Tayim toobbem lel inkoh amaa loynit tenah warisheenimille cibrah raben.

¹⁹ Maryam laakin tayim inkoh teskeeketteh ishi afcaadodde tibbirhe.

²⁰ Amaa loynit lel inkoh yubliinim kee yoobbiinimih Yalla aynabi kee faylishak gaxen. Tayim lel amaa malaykatti tenah akah warisheekah kinni.

²¹ Baxxara lellec gufek sarrah askok akko kaleenih, Yeesus yarhxe migac akah yeyyeecin. Ta migac lel guzedde amxinninekkah malaykatti akah yeyyeece migac kinni.

Yeesus Maqhdas careh yomxoye

²² Ten thahaarahi waqhti gufek sarrah lel, Moosat sercatalle akah yaneekah, Maddaradde kaa garayshoona aganalle Yerusaalem fanah kaa beyen.

²³ (Maddari sercatalle akah yunkuttubeh yaneekah: “Erherhih guze faakinnan barhi Maddarah yinqiddise tiya yakko kinni.”)

²⁴ Amayim balih Maddari sercatalle “Kuduudulti tsimde hido lamma cindhaa xamaama” sadaqhah uxuwa yarhxiinim tane.

²⁵ Taykinna lel, Yerusaalemille Simcoon akko yarhxin xiyawti yine. Xaqqi-wanna kee Yalla mashshiita tiya kee Israa-eel aydukumusnan ilaala tiya kuuk yine. Quddus kin Ufayi lel kaalih yine.

²⁶ Maddaraako yamiite Masiix ablekkah rabo makinam Quddus kin Ufayi kaa yuybulluweh yine.

²⁷ Usuk lel Quddus kin Ufayeh maqhdas care fanah yemeete. Zabali Yeesus, kaa dhaltoyya labcaadime sercat akah aboona kaa orbishen gedda,

²⁸ Ishi xulufudde xaf kaa isheh:

²⁹ “Ko Maddaraw! Kado ku garuzzo ku waanitta balih salaamadde sukuuku.

^30-31 Amayim lel umman xiyawhi nifille tisqirribe ku garger yi intit yubleh yane.

³² Tayim amaa Aki-marah ifo tayshidhdhigem, ku Israa-eel xiyawah lel nabne kinni” arhxuk Yalla faylishe.

³³ Kaa abba kee kaa ina lel kaa zacabah yerhxiinimih cibrah raben

^34-35 Simcoon ten yeybeerekeh lel Maryam kaa inak tahe yerhxe: “Taykinna lel, mango afcaadot xasaab yamadhdhago ciloh, usuk Israa-eelille mango mara uguso kee cido, amayim balih kaa kabbaatinnexe marah tuumar yakko dorriime. Atu yakkeedo ku rooxeeko seef kok tabo kinni”.

³⁶ Wuli Hanna akko yarhxin nabiita yakkeedo tine. Ishi lel Aasheer kishooko tekkih Faanuweel barhä kuuk tine. Cumre dufuyte tiyä lel kuuk tine. Erherhih barhäk marcishimtemko sarrah ishi baclaalih malxina iggida sugte.

³⁷ Amayek sarrah lel gubnak boxortomon kee afar iggidiya sugte. Bar kee lellecih acbuduk salaat kee siyaamlih maqhdas care caduruh mixabinna.

³⁸ Amaa saacadde kab adde terhxeyaako, Yallah xamde taddabbo kee Yerusaalem muuca ilaala maraalih kaa zacabah waanishaanam dhuguugulusse.

Naazretillehi gaxnan

³⁹ Ummannim amaa Maddari sercatalle akah yaneekah abeenimko sarrah, Galiilalle sinni Naazret daafo fanah gaxen.

⁴⁰ Zabali lel anabi kee atriruk amayim balih kas baaha yedee. Yallih nicma lel kaalih tine.

Cindhawka kin Yeesus Maqhdas caredde

⁴¹ Kaa dhaltoyya lel Faasigi cidih iggida-iggidah Yerusaalem aduuk yinin.

⁴² Usuk lamman kee taman iggidiya gufe gedda, cidti caydah agana Yerusaalem yewcin.

⁴³ Cid bakiteh usun gaxak, Yeesus ten barhi kaa dhaltoyya aarhigekkah Yerusaalemille raace.

⁴⁴ Usun laakin yadiye filcoolih yine akkaluk lellecti gerho yedeyin. Sinni ahle kee yaarhigin maraalih lel goronishoona erherhishen.

⁴⁵ Kaa wayen gedda lel kaa goronuh Yerusaalem fanah gaxen

⁴⁶ Adooxa lellecik sarrah lel maqhdas caredde mudarrisiin fanadde defeyeh ten aabbi kee ten esserak akah suge.

⁴⁷ Inkoh kaa aabbinnanti lel kaa fahaama kee kaa raddeh cibrah raben.

⁴⁸ Kaa yublin gedda lel yussuxuttutin. Kaa ina lel: “Ko yi barhaw! Tayim aaginah nok abta? Taykinna, ku abba kee yotta nemsheeqheleh ku goronishak sugne” akko terhxe.

⁴⁹ Usuk lel: “Aymih yi goronishak sugteeni? Yi abbahi caredde annaw yolle tanem aarhigi mitiniini?” akko yerhxe.

⁵⁰ Usun laakin usuk akko yerhxem mafhaminnooni

⁵¹ Guballe tenlih oobak Naazretille yemeeteh lel tenah am-izzizuk yine. Kaa ina lel tayim inkoh ishi afcaadodde tibbirhe.

⁵² Yeesus lel Yalla kee xiyawlih kas, dhedhdhan kee nicmah carsimak carsime.