Luukas 19 - Saaho Cusub Cahde

Yeesus kee Zakkay

¹ Yeesus Yerikhodde orobeyaako amakkeeko tillaabak yine.

² Taykinna lel, Zakkay decsiita xiyawti amalle yine. Usuk miiri yaskattitti naba tiya kee gaddaale kuuk yine.

³ Usuk lel Yeesus miyatto kinam yaarhago farhak yine. Wardeh urhurh tiya kuuk yinemhi sabbatah lel mango xiyawhi fanadde akah takko mirhiicinna.

⁴ Amaa gedda, nifti gabolle yerdeyaako Yeesus amaa araxko tillaabo luuk yinemhi sabbatah kayya yablo subultok kore.

⁵ Yeesus amaa makaanolle yemeete gedda lel aganalle kulux-yerhxeh: “Zakkay, kaafa ku carelle aso kiyomhi sabbatah iba lacaaki ob” akko yerhxe.

⁶ Amaa gedda, usuk lel iba laceh oobeyaako xedenak kaa kabbaate.

⁷ Xiyaw amayim yublin gedda lel: “Zambi-wannah careh gerhentaatinoh yedee” arhxuk inkoh yongoroozomin.

⁸ Zakkay lel daw-yerhxeh Maddarak: “Ubul, Maddara, inni iraarooko abrha baaxentitih axaye. Akkinnan tiya akkinnannimih doolabemko lel affara amayidhdhah adabbe” akko yerhxe.

⁹ Yeesus lel: “Usuk yakkeedo Abraahim barha yekkek sarrah, kaafa ta carelle garger yemeeteh yane.

¹⁰ Amayim lel Xiyawti Barhi teleem wagiyo kee gargeero yemeetemhi sabbatah kinni” akko yerhxe.

Tamana minah aymassal

¹¹ Usun tayim aabbuk, Yeesus Yerusaalemih kab-yerhxeh yinemhi sabbatah kee usun Yallih nigsinna akkanih tamballaw le akkaluk yiniinimhi sabbatah kataysheh wuli aymassal akah warishe.

¹² Amaa gedda akko yerhxe: “Wuli makaabanto kin xiyawti nigsinna yadhdhabarho wuli dherh baarho yedeeh gaxe.

¹³ Ishi garuuzaako tamanah deecimeh: ‘Anu gaxandah bicishra aba’ yerhxeh babbarhi tamana mina akah yoxoye.

¹⁴ Kaa dik hi cindham kaa yincibiinih lel: ‘Tati nodde reezam mifandhaa’ arhxuk simaagille kaa sarradde dhirhiyen.

¹⁵ Usuk nigsinna kabbaateh gaxe gedda lel amaa fiddat solaadi akah yoxoyeh yine ishi garuuza, bicishra abenyaako ayim yiksibiinim akko yaarhago ciloh, kayyalle yamaatoona yeemere.

¹⁶ Erherhti kaa nifidde yemeeteyaako: ‘Maddara, ku mina tamana mina osseh tane’ akko yerhxe.

¹⁷ Usuk lel: ‘Mecem abte, agiro kin garuzzo! Dagumulle umun tekkemhi sabbatah tamana daafohi reezanto takko kito’ akko yerhxe.

¹⁸ Malammi lel: ‘Maddara, ku mina koona mina osseh tane’ arhxuk yemeete.

¹⁹ Usuk lel: ‘Atu lel koona daafoh manabotta takko kito’ akko yerhxe.

^20-21 Sarrah lel aketti: ‘Maddara, birthic xiyawto kitomhi sabbatah kok mashshiite. Obsiitinnixitom beyta, azriinnixitom lel orbishittamhi sabbatah, mandiilidde oobisheh iniyo ku mina taykinna’ arhxuk yemeete.

²² Usuk lel: ‘Ko sharren kin garuzzo, ku waanih ku afrado kiyo. Anu birthic xiyawto kiyom, obsiitinnixiyom beyam kee azriinnixiyom orbishitam teerhege?

²³ Anu inni mumutulle dhalaalih bishshiite dhaarhek, yi fiddat solaadi aymih kinni bankadde oobishe waytem?’ akko yerhxe

²⁴ Kaa agaagalle daw-yerhxeh yine marak lel: ‘Kaa mina akko beyteenih amaa tamana mina le tiyah uxuwa’ akko yerhxe.

²⁵ Usun lel: ‘Maddara, tamana mina le maka!’ akko yerhxin.

²⁶ ‘Le tiyah ziyaada akah tamxawo kinni. Hin tiyaako laakin, leyam gantah akko tadaw kinam sinak arhxiyuk ane.

²⁷ Too yi nacabtoolit yekkemko laakin, tamaa anu adde reezo farhinnixeya, ten bahteenih yi afalle urxuda.’”

Yeesus Nugus balih Yerusaalem oroba

²⁸ Yeesus tayim yerhxeyaako lel Yerusaalem yawco nifti gabolle yedee.

²⁹ Beetfage kee Beetcaniyah kab-yerhxe gedda, Oolac koomalle, katattaynitko lamma dhirhiyeh,

³⁰ akko yerhxe lel: “Tamaa sin nifidde suganta dikille tedeyinyaako, orobtan gedda wuli yumudhdhuwe cindhaa okolotta, kaddih walaa inketti akko korinnixeya geytoona kitin. Iftixantaaki talle baha.

³¹ Akkinnanti: ‘Aymih kaa aftixuk taniini?’ yerhxeh sin esseremko: ‘Maddari kaa farheh yane’ akko tarhxoona kitin”.

³² Amayim lel amaa farritime mari yedeynih tamaa usuk tenak akah yerhxeekah kaa geyen.

³³ Usun amaa cindhaa okolotta aftixuk lel kaa wannun: “Ta cindhaa okolotta aymih aftixuk taniini?” akko yerhxin.

³⁴ Usun lel: “Maddari kaa farheh yane” akko yerhxin.

³⁵ Kayya Yeesus fanah baaheenih lel, sinni bukah sara amaa cindhaa okolottak haynih, Yeesus akko korishen.

³⁶ Usuk aduuk lel sinni bukah natsul araxadde akah sidishen.

³⁷ Oolac koomahi zoxoh kab-yerhxe gedda lel inkoh amaa mango kaa katattaynit xayla-le abittot yubliinimhi sabbatah, wac-yerhxiinih xedenoona kee Yalla faylishoona erherhishen.

³⁸ “Maddari migacalle yamiite Nugus dhaacole kinni! Carshelle maaxiyo, agana lel nabne!” lel yerhxin.

³⁹ Faarisiinko gari lel mango xiyawhi fantaako: “Mudarris, ishi katattaynit oskoolof” akko yerhxin.

⁴⁰ Usuk lel: “Ta mari sik-yerhxiinimko, ta dhayit zeero kinni” yerhxeh alle yedebbe.

Yeesus Yerusaalemille weeca

⁴¹ Usuk kab-yerhxeyaako daafo yuble gedda bukalle akko weeceh,

⁴² yerhxe lel: “Ta atu, inkinnah atu, ta lellecidde salaamah takkem teerhegeh takkeedo! Kado laakin, ku intitko sucuteh yane.

^43-44 Amayim lel Yalli koh yamiite max maarhagitomhi sabbatah, ku nacabtoolit difaac ku lamma galelle abenyaako, ku makaraanah, umman gabooko ku alifaanah, koo kee ku cindhamah baarholle ku cidaanah, dhayitto lel dhayitti bukalle kok xabe wayoona lon maaxi yamaato kinni.”

Yeesus maqhdas care yatsrige

⁴⁵ Usuk maqhdas caredde orobeh lel amaa atteebixuk yine mara yayyaaco erherhishe.

⁴⁶ “‘Yi cari salaat care yakko kinni’ yarhxiinim tunkuttubeh kinni, atin laakin garaacenti gonna akko abteenih tanin” lel akko yerhxe.

⁴⁷ Max yeenim lel maqhdas caredde aydurusuk yine. Sheekhat manabottit, sercat dhiiceenit kee xiyawko fadhdhishima mari akah kaa yaylayniikah wagiyaa yinin.

⁴⁸ Xiyaw inkoh kaa waanille qath-yerhxiinimhi sabbatah laakin usun inkim aboona mirhiicinnooni.