Luukas 18 - Saaho Cusub Cahde

Niya cidinnixe gubnah aymassal

¹ Kado lel umman gedda dhaacitoona kee niya cidaanamko hi ciloh wuli aymassal akah warishe.

² “Wuli daafolle wuli Yalla mashshiitinnixe, xiyaw lel xishmatinnixe daaniya yine.

³ Wuli gubna lel: ‘Yi qarimko yi xaqqe yoh ab’ arhxuk kayyalle tamiiteya amaa daafolle tine.

⁴ Wuliidhdha xina yinemko, sarrah laakin ishi nabsek: ‘Anu Yalla mimashshiita, xiyaw lel mixishmata,

⁵ ta gubna yi tiyticibeh tanem hi sabbatah laakin, gaxangaaxak yi taanishshamko hi ciloh xaqqe akah abo kiyo’” yerhxe.

⁶ Maddari lel: “Oobbaanta fitxe hin daaniya yarhxem.

⁷ Yalli lel bar kee lellecih kaa dhaacimta ishi doorimtemih xaqqe yaxaw maki? Mangum akko caawito kinni?

⁸ Fitxe tharbazlih akah yaxaw kinam sinak arhxiyuk ane. Yakko kibah, Xiyawti Barhi yamiite gedda, baarholle imaan-le mara geyo kinni?” akko yerhxe.

Faarisiin kee gibre yaskattit

⁹ Xaqqi-wannun ishek abah aki mara lel ilaaca marah ta aymassal akah warishe:

¹⁰ “Lamma xiyawti yassallawna maqhdas caredde yewcin. Wuliti Faarisiinta, wuliti lel miiri yaskatte kuuk yine.

¹¹ Faarisiiti uguteyaako: ‘Yi Rabbiyo, aki xiyaw, garaacen, xaqqi-wannun akkinnixem, zaaniyiin, hido lel ta miiri yaskatte balih gantah makiyomuh ku cawwatoyshita.

¹² Anu baxuurodde lamma gedda asoome, inkoh geyamko lel taman-ya af ayyaace’ yerhxeh yissilliye.

¹³ Miiri yaskatti laakin mirix-yerhxeyaako daw-yerhxeh, ishi naxar aatukuk: ‘Yi Rabbiyo, zambi-wanna kiyok yolle raxmat’ arhxuk yinenkah, carshi gabolle gantah intit xaf-isho mirhiicinna.

¹⁴ Ishe xaf-ishinnanti sam-yarhxo, ishe sam-ishinnanti laakin xaf-yarhxo kinamhi sabbatah, miiri yaskatte akkekkah, ta xiyawti Yallih nifille yitxiqqiqheh ishi meelah gaxem sinak arhxiyuk ane.”

Cindham yolle yamaatoona

¹⁵ Kado lel ten dhago ciloh laatsen gantah alle baaha yinin. Katattaynit amayim yublin gedda lel ten yoskoolofin.

¹⁶ Yeesus laakin: “Yallih nigsinna ta gina-le marah kinnik, cindham yolle yamaatoonaaki ten mideesina.

¹⁷ Cindham balih Yallih nigsinna kabbaatinnixeti, teyadde orobo makinam rummah sinak arhxiyuk ane” arhxuk ishelle ten baahe.

Gaddaale kin reezanto

¹⁸ Wuli reezanti lel kaa essere: “Mece mudarriso, umman geedit aniina awrasho ayim abo yolle tane?”

¹⁹ Yeesus lel: “Aymihi mece tiya yok tarhxem? Yallaako bextih meceti miyane.

²⁰ Amre taarhige: ‘Maznayin, magdafin, migaracin, zirabah mashhadin, ishi abba kee ishi ina xishmat’” akko yerhxe.

²¹ Usuk lel: “Tayim inkoh cindhiiko ibbirheh aniyo” akko yerhxe.

²² Yeesus tayim yoobbe gedda: “Kaddih inki xaaja kok racteh tane. Litom inkoh ibixaaki baaxentah kel, carshelle lel cukra taallo kito. Amowaaki lel yi kataa” akko yerhxe.

²³ Usuk tayim yoobbe gedda laakin, mangum gaddaale kuuk yinemhi sabbatah mangum yiqhdibe.

²⁴ Yeesus, yiqhdibe nifih kulux adde arhxuk: “Ta gadda le mari Yallih nigsinnadde orobaanam ayidhdha akko siriya!

²⁵ Gaddaale kin xiyawti Yallih nigsinnadde orobamko gaalatti ibrat intiiko tillaabam akko ruhuwa” akko yerhxe.

²⁶ Amaa tayim yoobbe mari lel: “Miyatto kinni haye gargeerimo leti?” akko yerhxin.

²⁷ Usuk laakin: “Xiyawah dhiiciminnixem Yallah dhiicimta” akko yerhxe.

²⁸ Bithroos lel: “Ubul, ninni nabra xabneh kinni ku kataynem” akko yerhxe.

²⁹ Usuk lel: “Yallih Nigsinnah yerhxeyaako care, hido numa, hido sacul, hido dhaltoyya, hido lel irro xabeyaako,

³⁰ ta waqhtedde amayimko mangum kabbaatinnixeti, yamiite waqhtedde lel bakitinnixe aniina aallinnixeti inkinnah miyanem rummah sinak arhxiyuk ane” akko yerhxe.

Yeesus maddaxih ishi rabi yaakumeh warisha

³¹ Lamman kee taman beyeyaako lel: “Ubula, Yerusaalem fanah awcuk nanino. Xiyawti Barhih zacabah amaa nobowah tunkuttubem lel inkoh takmalo kinni.

³² Amayim lel Aki-marahi gabadde kaa hayenyaako alle tsaggarowoona, akah waatimoona kee thuf alle yarhxoona kinoonimhi sabbatah kinni.

³³ Kaa khormaajah sabaceenih lel kaa yagdafoona kinon, usuk lel maddaxit lellec rabaako uguto kinni” akko yerhxe.

³⁴ Usun laakin tayimko inkim mafhaminnooni. Ta marhxo akko sucutteh lel usuk yerhxem mabbarhinnooni.

Yeesus inti-male kin caageena urusa

³⁵ Yeesus Yerikhoh kab-yerhxe gedda, wuli inti-mali caagensiitak arax afakke defeyak yine.

³⁶ Mango xiyaw tillaabak yoobbe gedda lel ayim kinam esserime.

³⁷ “Naazret Yeesus tillaabak yane” lel akko yerhxin.

³⁸ Usuk lel: “Yeesus, Dawud Barha, yolle raxmat” yerhxeh zeere.

³⁹ Amaa nifidde yine mari lel sik-erhex yerhxiinih kaa yoskoolofin. Usuk laakin amayimko ziyaada: “Dawud Barha, yolle raxmat!” yerhxeh zeere.

⁴⁰ Yeesus lel daw-yerhxeh ishe fanah kaa baahoona yeemere. Usuk kab-yerhxe gedda lel tahe yerhxeh kaa essere:

⁴¹ “Ayim koh abo yok fadhdha?” Usuk: “Maddara, malammih ablo farha” akko yerhxe.

⁴² Yeesus lel: “Ishi mablo gee. Ku imaan ku gargeereh yane” akko yerhxe.

⁴³ Usuk lel akkanih ishi mablo geyeyaako Yalla aynabuk kaa kataye. Umbuka xiyaw lel tayim yublin gedda, Yallah xamde yedebbin.