Luukas 17 - Saaho Cusub Cahde

Zambedde sayishsham

¹ Yeesus ishi katattaynitik lel: “Zambedde sayishsham amiitekkah racto maki, amayim kaa sabbatah akko takko leti lel kaa careyta!

² Ta cindhaa maraako inketta zambedde sayishshamko, naba marhxan filladde akko tumudhdhuweh badadde cidditam akah ashshe dhadhdhe.

³ Atin sinneh selita! Sin sacal zambe abemko kaa oskoolofa, yotoobemko lel alle xaba.

⁴ Lellecidde malxina gedda zambe sinak abeh, malxina gedda: ‘Otoobe’ yerhxeh sinalle gaxemko lel, alle xabtoona sinalle tane” akko yerhxe.

Ni imaan noh ziyaadish

⁵ Fartottit lel Maddarak: “Ni imaan noh ziyaadish” akko yerhxin.

⁶ Maddari lel: “Imaanko adrattot fireh idhdha taalliinim yakkeedo, ta naba xarhak: ‘Bukkutaaki badadde imtikkil’ akko tarhxindo, sin aabbe dhadhdhe.

Amficinnixe garuuza

⁷ Sinko, yaxruse hido loyna kin garuzzo leyaako usuk dhageeko oroba gedda: ‘Amo iba lacaaki maaddille defee’ akko yarhxo leti miyatto kinni?

⁸ Amayim hidhdhah: ‘Dirar yoh isqirribaaki meceetih saritteyaako, anu beetak kee aacubuk yoh eyseese, amayek sarrah lel atu isheh betteh taacabo kito’ makini akko yarhxo lem?

⁹ Akah kaa yeemerem abem hi sabbatah amaa garuzzo kaa yashkure?

¹⁰ Amaydo atin yakkeedo, inkoh akah sin yeemeriinim abtan gedda: ‘Nanu amficinnixe garuuza kino, abno noh eeddam bisa kinni abnem’ erhexa” akko yerhxe.

Yeesus saknittemko taman yaysiffiye

¹¹ Usuk Samaariya kee Galiilaati fantaako Yerusaalem fanah tillaabak yine.

¹² Dikidde orobak lel saknittemko taman akah sugen. Waacinalle lel daw-yerhxiinih yinin.

¹³ Sinni dhaw xaf-isheenih: “Yeesus, Mucallimo, nolle raxmat” yerhxin.

¹⁴ Ten yuble gedda: “Aduwantaaki sheekha sinne uybulluwa” akko yerhxe. Usun lel aduuk yamsiffiin.

¹⁵ Tenko wuliti lel urem ishe yuble gedda, caazalle yufkuneh, wac-yerhxeyaako Yalla yeynebe.

¹⁶ Kaa cawwatoyshitak lel nifih Yeesus iballe rade. Samaariyatto lel kuuk yine.

¹⁷ Amayek sarrah lel Yeesus: “Timsiffiyem taman kuuk miyineho? Sagal awla yaniini?

¹⁸ Ta godobottaako bextih gaxeyaako Yalla yaynabeti adde miyane?” yerhxeh radde yoxoye.

¹⁹ “Ku imaan ku gargeereh yanek ugutaaki ishi araxalle aduu” lel akko yerhxe.

Nigsinnat mumut

²⁰ Yallih nigsinna manda tamaato lem Faarisiinih esserime gedda lel: “Yallih nigsinna amiituk xiyaw tee yabloona maki.

²¹ ‘Ubula taykinna’, hido ‘toohikinna’ akko yarhxeti miyane, taykinna, Yallih nigsinna sin fanadde tane” yerhxeh radde akah yoxoye.

²² Katattaynitik lel: “Xiyawti Barha adde tabloona fadhdhan maaxi, wuli maxko tiyah amiituk yane. Tabloona lel makitiini.

²³ ‘Ubula, tolle!’ hido ‘Ubula talle!’ sinak yarhxoona kinon. Maadayna, adde mikatayna.

²⁴ Xankarhi ifishayaako caran wuli wasanko wuli wasan fanah akah ifishaaka balih, Xiyawti Barhi lel ishi maxadde amay balih yakko kinni.

²⁵ Erherhih laakin mangum umaatih geyo kee kadit ijoh xinnitimo laazim kinni.

²⁶ Nuux waqhtedde akah tekkeh tineeka balih lel, Xiyawti Barhih waqhtedde takko kinni.

²⁷ Nuux yemeeteh naba doonikidde orobe max fanah, amaa xiyaw beetak, aacubuk, marcishitak kee marcah amxawuk yinin. Cilish weeci yemeeteh lel inkoh ten yeylee.

²⁸ Luuth waqhtedde lel amayim balih tekke, usun beetak kee aacubuk, dhaamak kee aabixuk, azruuk kee siraaxak yinin.

²⁹ Luuth Sodomko yewce max laakin, gira kee kirbit caranko radeh inkoh ten yeylee.

³⁰ Xiyawti Barhi adde yamidhdhige maxadde lel amaa ginah takko kinni.

³¹ Amaa maxadde, ishi nuwaa caredde leyaako cari amok yaneti, bishshiito oobe wayo, amayim balih lel dhagelle yaneti caazalle afkune wayo.

³² Luuth numa izzikkira.

³³ Ishi aniina naggoysho farhinnanti tee yaylawo kinni, ishi aniina aylayinnanti laakin tee dhawrho kinni.

³⁴ Amaa bar inki caratalle lamma yannawna kinoonim sinak arhxiyuk ane. Wuli tiya beyan gedda lel wuliti amalle raaco kinni.

³⁵ Lamma numa inkidde arhxinuk yannawna kinon. Wuli tiya beyan gedda lel wuli tiya amalle racto kinni” akko yerhxe. [

³⁶ Wuli dhagelle yane lamma xiyawtooko wuli tiya akko beyan gedda, wuliti amalle raaco kinni.]

³⁷ Katattaynit lel: “Awla, Maddara?” akko yerhxin. Usuk: “Batki alle yanelle guuma takatto kinni” akko yerhxe.