Luukas 16 - Saaho Cusub Cahde

Amaana hin masxadaadarih aymassal

¹ Yeesus katattaynitik lel: “Wuli masxadaadara le gaddaale kin xiyawti yine. Amaa xiyawtolle lel amaa masxadaadari kaa iraaro akko abizziruk yane yarhxin kissi alle yemeete.

² Akah deecimeh lel: ‘Ta kottaako aabbem ayim kinni? Kamboh masxadaadara takko mirhictaaki asxadaadarti gondo bah.’

³ Amaa masxadaadari lel ishi nabsek: ‘Yi manabotti asxadaadar yok beyak yanek, ayim abo kinni? Faraaco dhic maliyo, caagensiito lel xoolashshiita.

⁴ Ayim abam abaysheh aniyo. Asxadaadarko haddaanima gedda, xiyaw sinni meelalle yi kabbaatoona kinon’ yerhxe.

⁵ Sarrah, tiya tiyah ishi manabottahi cidat wannunuh deecimeh, erherh tiyak: ‘Yi manabotti cidah ayidhdha kodde leya?’ akko yerhxe.

⁶ Usuk lel: ‘Oolac zeetko 3,000 litrotiya takkem’ akko yerhxe. Usuk lel: ‘Iba lacteh defeyteyaako, ku cidahi kitaab hinaaki, 1,500 uktub’ akko yerhxe.

⁷ Sarrah lel ootiyak: ‘Atu lel ku cida ayidhdha kinni?’ akko yerhxe. Usuk: ‘Sinraako 40,000 kiilotiya takkem’ akko yerhxe. Kayyak lel: ‘Ku cidah kitaab hinaaki, 32,000 uktub’ akko yerhxe.

⁸ Ifi cindhamko ziyaadah ta waqhtih cindham sinni ijoolih akah yadiin gorxe loonimhi sabbatah, amaa xaqqi-wanna akkinnixe masxadaadara kaa manabotti kaa siixoh kaa yossokoote.

⁹ Ta gaddi bakita gedda umman geedit sigimalle sin kabbaatoona ciloh, xaqqi gadda akkinnixemko sinneh soxoba abittoona sinal tanem, sinak arhxiyuk ane.

¹⁰ Dagumulle umun kinti, mangumulle gantah umun kinni, dagumulle xaqqi-wanna akkinnixeti lel mangumulle xaqqi-wanna maki.

¹¹ Amaydo, xaqqi gadda akkinnixemille umunaat akke wayteenimko, rummaahit gadda sinalle amaanatishsho lem miyatto kinni?

¹² Aki marihim kinamalle umunaat akke wayteenimko, sinim kinam miyatti sinah yaxaw kinni?

¹³ Wuli tiya yincibeh wuli tiya akxine, wuli tiya yeynebeh wuli tiya ilaace kibah, lamma manabotta yakhdume khaddaam miyane. Yalla kee solaadi takhdamoona mirhictaana” akko yerhxe.

Sercat kee Yallih nigsinna

¹⁴ Solaadi kixin Faarisiin tayim inkoh aabbuk alle ancaasak yinin.

¹⁵ Usuk lel: “Atin tamaa xiyaw nifille sinne yisxiqqiqhe mara kitin, sin afcaado laakin Yalli yaarhige. Xiyaw nifille limo leti, Yallih nifille batakna kinni.

¹⁶ Sercat kee Nobowa Yohannis fanah abittodde asak yinin; Amaymik sarrah lel Yallih nigsinnahi Mece Wari yimbissireh kinni, ummanti lel orobo adde dufuffuumak yane.

¹⁷ Sercatko cindhaa dhimmiyo raddamko laakin, caran kee baarho talayem ruhuwa.

Fittix kee malammit marca

¹⁸ Ishi numa yaftixeh akettö marcishitinnanti zina aba, ishi baclaako timfittixe numa marcishitinnanti lel zina aba.

Alazaar kee gaddaale kin xiyawto

¹⁹ Wuli diimayin sartim kee mece caynah sara saritah, umman max mece nabradde mara gaddaale kin xiyawti yine.

²⁰ Kaa kanshellohi carafalle lel migacah Alazaar decsiita baaxenti biyokuh agoogiteya cidditeh yine.

²¹ Amaa gaddaale kin xiyawtih thawlaako raddam beeto lel hambareerak yine. Amayimko ziyaada lel, kaara gantah tamiiteh kaa biyok ak murhuuca tine.

²² Tekke lel, amaa baaxenta kin xiyawti rabeh, malaykut Abraahim gale fanah kaa baahen. Amaa gaaddaale kin xiyawti gantah rabeh yumuccuge.

²³ Hadees cazaabadde yekkeh lel, intit xaf-ishe gedda waacinah Abraahim kee Alazaar agaggaagalle yuble.

²⁴ ‘Abba Abraahimo, ta boladde waaxeltah rabak aniyok, yolle raxmat, ishi ferah erherha layedde hayeh anrab yoh dhamxishooki lel Alazaar yoh dhirhii’ yerhxeh zeere.

²⁵ Abraahim laakin: ‘Yi barhaw, atu ishi cumrelle ishi mecaaniiko takkanna geytem, Alazaar laakin amayim balih umaatih geyem izzikkir. Kado laakin usuk talle raaxassiitak yane, atu lel waaxeltah rabak tanito.

²⁶ Umbuka tayimko bextih lel, takkeeko sinalle tillabto fadhdham tillaabaanamko kee tamakkeeko nottalle inketti tillaabamko hi ciloh, notta kee sinhi fanadde naba bol yekkeh yane’ akko yerhxe.

^27-28 Usuk lel: ‘Abba, amaydo, koona sacal liyomhi sabbatah, ta cazaab kin makaano fanah yamiitiinimko ten fayshooki yi abbah care fanah kaa farrimto ku dhaacimak aniyo’ akko yerhxe.

²⁹ Abraahim laakin: ‘Usun Moosa kee Nobowat aydaras lon. Tena yaabboonaaki xab’ akko yerhxe.

³⁰ Usuk lel: ‘Maale, abba Abraahimo, laakin rabtemko inketti alle yedeemko yataaboona kinon’ akko yerhxe.

³¹ Abraahim lel: ‘Moosa kee Nobowa aydaras aabbe waynimko, rabtemko ugute inketta yakkeedo yaamanoona makinooni’ akko yerhxe”.