Luukas 15 - Saaho Cusub Cahde

Telee ciidoh aymassal

¹ Kado, miiri yaskattit kee zambi-wannun kayya yaabboona kaa gabolle kab-arhxuk yinin.

² Faarisiin kee sercat dhiiceenit lel: “Ta xiyawti zambi-wannun kabbaatah tenlih lel beeta” arhxuk angoroozomuk yinin.

³ Amaymih ta aymassal akah warishe:

⁴ “Awlih tiya kinni sinko, ciidooko bool yeelleyaako, amayimko inketta akko talaye gedda, telee inkettat goronuh aykee tee geyandah amaa boolsagla kee sagal zibolle xabinnixeti?

⁵ Tee geya gedda lel xedenak dagadde tee haya.

⁶ Careh yamiite gedda lel ishi soxoba kee ishi xuggitik: ‘Yok teleeh tine ciidotta geyeh aniyok yottaalih xedena’ akko yarhxih inkidde akah deecima.

⁷ Amaydo, carshelle tooba farhshiishinnixe xaqqi-waanunti boolsagla kee sagal xiyawtiyaako ziyaada inki zambi-wanna yatoobeyah mango xeden yannaw kinam sinak arhxiyuk ane.

Telee fiddat tacriifah aymassal

⁸ Hido, awlih numa kinni tamana fiddat tacriifa leyaako inkettä akko talaye gedda, faanus ifishsheyaako care fiiteh geytandah dhacumaatih wagiinnixeya?

⁹ Geyta gedda lel: ‘Yok teleyeh tine fiddat tacriifa geyek, yottaalih xedena’ arhxuk ishi soxoba kee xuggitih inkidde akah deecimta.

¹⁰ Amayim balih lel, Yallih malaykut-hi nifille yatoobe inki zambi-wannah xeden yanem sinak arhxiyuk ane”.

Yabizzire barhih aymassal

¹¹ Usuk yerhxe lel: “Wuli lamma barha le xiyawti yine.

¹² Cindhati lel ishi abbak: ‘Abba, ta iraarooko yi gide akko yoh xazil’ akko yerhxe. Usuk lel ishi iraaro lamma tenah xaziile.

¹³ Dago lellecik sarrah lel amaa cindhati, luuk yinem inkoh yesketteh dherh baarho kallaaxe. Amalle lel ishi iraaro abizziruk cibdaanadde marak yine.

¹⁴ Usuk ummannim yeyleyemko sarrah lel, amaa baarholle dhacuma culul yekke. Usuk lel luuk yinemko foyyak raaco erherhishe.

¹⁵ Yedeeh lel xasamam zuwo ishi dhage fanah kaa dhirhiye, amaa baarhoh barhahi casbento ishek abe.

¹⁶ Amaa xasamam beetan gollaf ko garba yamago lel hambereerak yine. Walaa inketti lel inkim akah maaxayinna.

¹⁷ Ishi kasalle gaxe gedda lel: ‘Yi abbah casbentitko folo akko xaytaanah xabtamko ayidhdhi yane, anu laakin talle safrah rabak aniyo!’ yerhxe.

¹⁸ ‘Uguteyaako yi abba fanah adaw kiyo: “Abba, carsheeti didde kee ku nifille zambe abeh aniyo.

¹⁹ Kamboh ku barhah decsiimam yoh meedda. Tamaa ishi casbentitko wuli tiya balih yi ubul”’ akko arhxo kiyo.

²⁰ Uguteh lel ishi abba fanah yemeete. Kaa abba, usuk dherhille mirixtah anuk kaa yubleyaako, raxmah uluc akko xarheyaako, yerdeh kaa yuxqufeh kaa fugute.

²¹ Barhi lel: ‘Abba, carsheeti didde kee ku nifille zambe abeh aniyo. Kamboh ku barhah decsiimam yoh meedda’ akko yerhxe.

²² Kaa abba laakin ishi garuuzak: ‘Iba lacteenih mece sara bahantaaki alle haya. Khaatim kaa gabadde, kabel lel kaa ibadde haya

^23-24 Yi barhi rabeh yinemko aniinalle gaxe, yeleeh yinemko lel geytimem hi sabbatah, kulus durutta bahteenih urxudantaaki, kata benneh nafraxoo’ akko yerhxe. Yafraxoona lel erherhishen.

²⁵ Kado, naba kaa barhi dhageeko yemeeteh careh kab-yerhxe gedda digir kee rigdo yoobbe.

²⁶ Khaddamteeko tiyah deecimeh lel akki tanem ayim kinam kaa essere.

²⁷ Usuk lel: ‘Ku sacal yemeeteh yane, ku abba lel usuk nagaa kee maaxiyoh akah gaxemhi sabbatah kulus zaraabic yurxude’ akko yerhxe.

²⁸ Usuk lel kurrayeh orobo xine. Kaa abba lel irolle alle yewceh kaa dhaacime.

²⁹ Usuk laakin ishi abballe: ‘Ubul, ta mango iggidit ku ukhdumeh aniyo, ku amre caduruh mixiniyo, yakko kibah inni barmaleelih akko afraxo bakal gantah yoh maaxayinnito.

³⁰ Ta ku barhi ku iraaro sharaamuthlih yeyleya yemeete gedda laakin, kulus durutta akah turxude’ yerhxeh alle deheye.

³¹ Abba lel: ‘Yi barhawo, atu umman gedda yottaalih tanito. Inkoh yim lel kum kinni.

³² Ta rabeh yinemko aniinalle gaxe, yeleeh yinemko lel geytime ku sacalah yafrixiinim kee xedenaanam farhshishsham kinni’” akko yerhxe.