Luukas 14 - Saaho Cusub Cahde

Sambatah xiyawto urusaanam

¹ Tekke lel, wuli Sambatah, Yeesus wuli Faarisiin reezantohi careh folo beeto yedee gedda, usun meceetih kaa macalsiitak yinin.

² Taykinna lel, kaa afalle wuli nabsi adde duddube xiyawti yine.

³ Yeesus lel: “Sambatah urusaanam masmuux kinni walla maki?” yerhxeh sercat dhiiceenit kee Faarisiinlih aalih waanishe.

⁴ Usun laakin sik-yerhxin. Sarrah Yeesus kaa yibbirheh kaa uruseyaako kaa dhirhiye.

⁵ Tenak lel: “Sambat lellec barhi hido beceeri ceeladde akko radeya akkanih hiriigeh ayyaacinnixeti sinko miyatto kinni?” akko yerhxe.

⁶ Taymille lel alle yadabboona mirhiicinnooni.

Marcat simbilohi aymassal

⁷ Amaa marcah yimciddimeh yine mari aaginah gaso dooreenim yuble gedda misaaalah tahe arhxuk akah warishe:

⁸ “Akkinnanti marcalle ku yaczime gedda, kottaako naba tiya yiczimeh yanniyek, gasolle midefeyin.

⁹ Amaa umman sina yiczimeti yemeeteh lel: ‘Ta cara tatiyah uxuu’ kok yarhxe gedda, xoolashshiitak igixille gaxto erherhishsho kito.

¹⁰ Tamcizzime gedda laakin, amaa ku yiczimeh yaneti: ‘Carke, agana gax’ kok yarhxo ciloh tedeeh gubi caralle defee. Sarrah lel kottaalih defeyeh yane mari alle yaninille xishma abitto kito.

¹¹ Ishe xaf-ishinnanti, sam-yarhxo kinni, ishi sam-ishinnanti lel xaf-yarhxo kinni”.

Naba dirar hi aymassal

¹² Yeesus amaa kaa yiczimeh yine xiyawtok lel tahe akko yerhxe: “Mawo yakko dirar abinnan gedda, usun gantah ku yiczimiinih fidah koh yikfiliinih akke wayemko, ishi carkit hido ishi sacul hido ishi zamad hido gaddaalit kin ishi xuggit maczamin.

¹³ Cazuuma abinnan gedda laakin baaxentit, tumunkusem, tixinkishem kee inti-malit iczim.

¹⁴ Usun koh yafdawna mirhiicaanamhi sabbatah lel baraka-letiya takko kito. Xaqqi-wannunhi rabaako hi ugutulle lel koh tamfaddaw kinni”.

Marcat aymassal

¹⁵ Kaalih beetak yine maraako wuliti tayim yoobbe gedda: “Yallih nigsinnadde folo beeto leti baraka-letiya kinni” akko yerhxe.

¹⁶ Usuk laakin: “Wuli gedda wuli xiyawti naba dirar abeyaako mango mara yiczime.

¹⁷ Amaa dirar waqhte ishi garuzzo fareyaako amaa yimciddimeh yine marak: ‘Ummanna tinqirribeh tanek amowa’ akko yerhxe.

¹⁸ Usun laakin sittiyadde takaloona erherhishen. Erherhti: ‘Dhage dhaameh aniyo. Edeeh lel ablo yolle tane. Yi eseemex ku beezza’ akko yerhxe.

¹⁹ Wuliti lel: ‘Becarti koona tsimde dhaameh aniyo. Ten acakkano lel adaw kinni. Yi eseemex ku beezza!’ akko yerhxe.

²⁰ Aketti lel: ‘Numa marcishiteh aniyonkah amaato mirhiica’ akko yerhxe.

²¹ Amaa garuzzi lel yemeeteh tayim inkoh ishi manabottah warishe. Amaa cari-manabotti lel kurrayeh ishi garuzzok: ‘Iba lacteh shawaaric kee daafot aruxulle aduwaaki, baaxentit, tumunkusem, inti-malit kee tixinkishem bah’ akko yerhxe.

²² Garuzzi lel: ‘Manabotta, atu teemerem tekkeh tane, cara laakin kaddih tane’ akko yerhxe.

²³ Manabotti lel amaa garuzzok: ‘Yi cari yammaagooki, tsirog kee barri aruxulle tewceh xiyaw laazim akah yamiitiiniikah akko ab.

²⁴ Amaa yimciddimeh yine maraako walaa inketti yi dirarko dhacamo makinam kok arhxiyuk ane’” akko yerhxe.

Katattaynan limo

²⁵ Kado lel mango xiyaw kaa goorishen, ufkun adde yerhxeh lel tahe akko yerhxe:

²⁶ “Akkinnanti yottalle yemeetemko, ishi abba kee ina kee numa kee irro, sacul kee saculte, yoo, ishi aniina gantah ancibe wayemko, yi katattayna yakko mirhiica.

²⁷ Ishi masqal aaqhucekkah yi katattayati yi katattayna yakko mirhiica.

²⁸ Sinko miyatto kinni qobba abo farha hanuk, defeyeyaako abaysho kaa dhicta limo lem kee malem yookomeh ablinnixeti?

^29-30 Akke wayemko, masarrat dhishah abaysho taana gedda, inkoh kaa yable mari: ‘Ta xiyawti siraaxo erherhishe, abaysho laakin taane’ arhxuk alle tsaggarowoona kinon.

³¹ Hido awlih nugus kinni yedeeyaako aki nuguslih dhibbaw farha gedda, yookomeyaako defeyeh lamaatanna shiixtiyaalih akah garaatiya, tamana shiixlih akah garaw dhiicam kee mirhiicam aqheesinnixeti?

³² Akke wayemko, ooti kaako mirixtah anuk simaagille dhirhiyah wagare esserima.

³³ Amayim balih, sinko akkinnanti inkoh ishi iraarooko acdirinnixeya yi katattayna yakko mirhiica.

Dhacam hin mulxu makko male

³⁴ Mulxu mecetiyä kinni. Mulxu ishi dhacam xabtemko laakin tee dhacam aaginah gaxa?

³⁵ Xarhittam bisa kibah, buureh yakko gomooh mitamfice. Yaabbe cokkak leti yaabboo!”.