Luukas 13 - Saaho Cusub Cahde

Atoobe kee alaye

¹ Amaa waqhtedde wuli xiyaw yemeetiinih, amaa Bilaatos ten biilodde ten sadaqha akko yezgelle Galiilaati marih zacabah Yeesusuh warishen.

² Usuk lel taginah radde alle deheye: “Ta Galiilaati mari, taginah waaxelsiiteenimhi sabbatah aki Galiilaati maraako uma zambi-wannun kuuk yinin takkaliini?

³ Maale laakin, totoobiinih akke wayemko, atin gantah amaa ginah talawna kitiinim sinak arhxiyuk ane.

⁴ Hido lel, amaa baxxaran kee taman Selihoom agaagalle qobba alle raddeyaako tigdife mari, aki Yerusaalemille marak yine maraako uma zambe abe mara takkaliini?

⁵ Maale, totoobiinih akke wayemko, atin gantah amaa ginah talawna kitiinim sinak arhxiyuk ane”.

Daro hin indacartoh aymassal

⁶ Usuk lel ta aymassal akah warishe: “Wuli xiyawti kaa cinabhi dhagedde tubqule indacartö luuk yine. Daro farheh alle yemeete gedda lel inkim akko waye.

⁷ Cinab dhageh baclaysheenak lel: ‘Taykinna, ta indacartolle darot goronuh amiiteh walaa inkim akko wayemko taahe adooxa iggida liyo. Tee igric. Baarho akah caynishshamah ayim le?’ akko yerhxe.

⁸ Cinab dhageh baclaysheeni lel: ‘Manabotta, tee lamma gale akah akuskuseh gomoo adde hayandah, kaamana gantah tee xab.

⁹ Sarrat zaban daro bahtemko, temce; akke wayemko laakin, amayek sarrah tagraco dhicta’ yerhxeh alle yedebbe.”

Dalkina kin ufaye le numa

¹⁰ Usuk kado sunagoogitko wuli tiyadde Sambatah aydurusuk yine.

¹¹ Amadde lel baxxaran kee tamana iggidiya laxsuusa ufayeh laxutte numa tine. Guddah gaxteh lel meceetih rig-tarhxo dhiicak mitine.

¹² Yeesus tee yuble gedda akah deecimeh tahe akko yerhxe: “Te numa, ishi laxuuko barii tekkeh tanito”.

¹³ Usuk gaba bukalle akko oobisheh lel amalle anuk rig-terhxeyaako ishi Yalla teynebe.

¹⁴ Amaa sunagoogeeti manabotti lel Yeesus Sambatah urusemhi sabbatah, kurrayeyaako amaa xiyawakke: “Ciyyo adde takko missil lixa lellec yane. Amaa lellecidde amowantaaki ura kibah, Sambatah maki” akko yerhxe.

¹⁵ Maddari lel: “Ko munaafiqhiino! Sinko ummanti Sambatah ishi beceera hido ishi okolotta makal makaanooko yaftixeh yaafaco arkishah makiho?

¹⁶ Ta Abraahim barhä kin numa, Sheethan baxxaran kee taman iggidiya yurhuweh sugeya lel Sambat lellec ta madhdhuwaako tamfattaxo teyah meedda?” yerhxeh alle yedebbe.

¹⁷ Usuk tayim arhxuk, kaa didde kin mari inkoh xoolashshiiten. Xiyaw lel kayyah tekke nabne le xaajah inkoh xedenen.

Adratto kee ayco

¹⁸ Usuk yerhxe lel: “Yallih nigsinna aaginale? Ayimlih lel tee agaagisho kinni?

¹⁹ Ishe, xiyawti beyeyaako ishi jardiinidde yizriye adratti cayna, tenebeh lel xarha tekkeyaako kimbir sinni care xakukudde akko siraaxitenyah kinni higgidam”.

²⁰ Malammih yerhxe: “Yallih nigsinna ayimlih agaagisho kinni?

²¹ Numa beyteyaako aykee inkoh muluxandah tamana sinraa cagun cussedde hayte aycoh kinni higgidam”.

Xeewin caraf

²² Yeesus, daafof kee diikakalle aydurusuk Yerusaalem gabolle safarah ishi gerho katattayshe.

²³ Wuliti lel tahe akko yerhxe: “Maddara, gargeerimto lem dago mara kinooni?”

²⁴ Usuk lel: “Xeewin carafko orobtoona undufula. Mango mari oroboona farhoona kinon, akah takko makinam lel sinak arhxiyuk ane.

²⁵ Cari manabotti ugutah caraf alifa gedda, irolle daw-tarhxoona erherhishshaanah: ‘Maddara, noh fak’ arhxitin caraf takuxkuxin. Sarrah usuk: ‘Miya kitiinim kee awlaako kitiinim sin maarhige’ yerhxeh radde sinalle yadabbo kinni.

²⁶ Sarrah: ‘Kottaalih benneh noocobe. Atu lel ni shawaaricille tuyduruseh kito’ tarhxoona erherhishshoona kitin.

²⁷ Usuk laakin: ‘Awlaako temeetiinim sin maarhigem sinak arhxiyuk ane. Ko umam-abeenito! Mirix yok erhexa’ yarhxo kinni.

²⁸ Abraahim, Isxaaq, Yacqoob kee umbuka nobowa Yallih nigsinnadde tablin gedda, atin lel irolle cidditteenih amadde lel weeca kee ikokti xarqam yakko kinni.

²⁹ Xiyaw lel ayrommaaxa kee ayrodhdhuma, qilba kee junuubko yemeetiinih, Yallih nigsinnadde maaddille defeyoona kinon.

³⁰ Taykinna lel, sarradde tanem afadde gaxoona, afadde tanem lel sarradde gaxoona kinon” akko yerhxe.

Xazan Yerusaalem sabbatah

³¹ Amaa saacadde wuli Faarisiin yemeetiinih: “Heerodes ku yagdafo farhak yanek, takkeeko aduu” akko yerhxin.

³² Usuk lel: “Tedeynih amaa wakarik tahe akko erhexa: ‘Taykinna, kaafa kee beera junuun eyyeeceh urusnan abo kiyo, maddaxit lellec lel abaysho kiyo.

³³ Amaydo, Yerusaalemko akuula nabii rabo mitakkemhi sabbatah, kaafa, beera kee beexa inni araxalle adaw yolle tane.’

³⁴ Yerusaalem, Yerusaalem, nobowa tagdifeh, tamaa alle farritimtemille dhayit cidda tiyawo! Ayidhdhale gedda, atu akko farhinnixitoya, dor-hotta ishi chaaqhut ishi galedde akah taskatteeka balih ku cindham koh askatte dhaarhiyo!

³⁵ Taykinna, sin cari xabbiimeh kinni. ‘Maddari migacalle yamiiteti, usuk dhaacole kinni’ tarhxiinindah yi tabloona makitiinim sinak arhxiyuk ane” akko yerhxe.