Luukas 12 - Saaho Cusub Cahde

Faarisiin aycooko zeelita

¹ Amaa waqhtedde, shiixaatah loyyimta xiyaw sittiyadde gantah yaacitiinindah yekettin gedda, Yeesus yookomeh ishi katattaynitik tahe akko yarhxo erherhishe: “Nifaaq kin Faarisiin aycooko zeelita.

² Caddoyto kinam agoogitteyah, tammadhdhago kinam sucutteyah lel tanem male.

³ Amaydo, atin ditedde terhxiinim ifolle tamabbo, suctoh carwat addadde xushuk-terhxiinim lel cari-amolle warroyto kinni.

Mimashshiitina

⁴ Yi carkitik lel sinak arhxiyuk ane. Nabse yagdifiinimko ferih, akih inkim abo taana maraako mimashshiitina.

⁵ Miyaako mashshittaanam laakin sin aybulluwe: tamaa gidfooko sarrah jahannab adde cido reeza le tiyaako mashshita. Yoo, sinak arhxe, kaako mashshita!

⁶ Koona cindhaa kimbiro lamma santiimih tamibbixeh makiho? Yallih nifille lel tenko tiya mibiyashshiiminna.

⁷ Rummah, sin amoh dagar yakkeedo inkoh loyyiimeh yane. Atin mango cindhaa kimbirko ziyaada limo litinki, mimashshiitina.

Xiyaw nifille Yeesusuh eelema

⁸ Ummanti xiyaw nifille yoh aaliminnaniyah, Xiyawti Barhi yakkeedo Yallih malaykut hi nifille akah yaalamo kinam lel, sinak arhxiyuk ane.

⁹ Xiyaw nifille yi xininnanti laakin, Yallih malaykut hi nifille xinnitimo kinni.

¹⁰ Xiyawti Barhih diddeh waanitta waanishinnanti xabbot geyo kinni. Quddus kin Ufaye waatinnanti laakin xabbot geyo maki.

^11-12 Sunagooge, manabottit kee reezonti nifille sin baahan gedda, Quddus kin Ufayi amaa saacadde ayim tarhxoona sinalle tanem sin yaydaraso kinamhi sabbatah, sinne aaginah dessaanam, hido ayim tarhxoona sinalle tanemih mamshaaqhalina” akko yerhxe.

Duuda kin gaddaalih aymassal

¹³ Wuliti lel mango xiyawhi fantaako: “Mudarris, yi sacal miiraas yottaalih xaziilo akah warish” akko yerhxe.

¹⁴ Yeesus lel: “Ko xiyawto, sin bukalle hi daaniya hido keleena yok abeti miyatto kinni?” akko yerhxe.

¹⁵ Tahe lel akko yerhxe: “Xiyawti aniina, iraarot mangentah makinamhi sabbatah, umman caynah hirfeeko selitteenih sinne dhawrha”.

¹⁶ Tahe yerhxeh lel aymassal akah warishe: “ Wuli gaddaale kin xiyawtohi dhage meceetih temfeere.

¹⁷ ‘Inni ilaw adde akhzinekke maliyooki ah abo kinni?’ yerhxeh lel yemxeesebe.

¹⁸ Tahe lel yarhxe: ‘Tahe abo kiyo. Inni ilaw makhaazinon nabam akko siraaxo kiyo. Inni ilaw kee inni nuwaa lel amadde akhzano kiyo.

¹⁹ Inni rooxek lel: “Rooxe, rorsime mango nuwaa mango iggiditih koh yakkeya litok, ucruf, bet, ucub, ifrix” akko arhxo kiyo’ yerhxe.

²⁰ Yalli laakin: ‘Ko duudaw! Ku rooxe kabar tadabbo kok farhak yanin. Ta tisqirribeh tanitom lel miyah yakko kinni?’.

²¹ Amaydo, gadda isheh yassucukkureti Yallih nifille gaddaale maki” akko yerhxe.

Mamshaaqhalina

²² Ishi katattaynitik lel tahe akko yerhxe: “Sinak arhxiyuk ane, sinni aniinah, ayim bettoona litiinimih, hido sinni nabseh ayim sarittoona litiinimih mamshaaqhalina.

²³ Tayim lel aniina folooko naba, nabsi lel sartimko nabamhi sabbatah kinni.

²⁴ Ubula kaakut! Miyazriye, miyaciyye, ilaw makhaazino hido lel qafo male. Yalli laakin kaa yayteele. Atin kimbirko ziyaada naba limoh litin!

²⁵ Miyatto kinni lel sinko yemsheeqheleh ishi cumredde inki saaca oso dhiicati?

²⁶ Amaydo, ta cindhaa xaaja abittoona wayteenimko, aymih kinni aki ractemih tamsheeqheliinim?

²⁷ Combooba mixawalta, mitaarufe hanuk aaginah carsimtam ubula. Suleymaan gantah ishi nabneelih tenko inketta balih misaritinnam rummah sinak arhxiyuk ane.

²⁸ Ko imaan dagito! Yalli kaafa lee tane, beera lee otonudde cidditto le zibi cashsho akko sarishaya, sina amayimko ziyaada sarisho mirhiica?

²⁹ Ayim taacubiinim kee ayim bettaanam miwagiina, manshaaqhalina lel.

³⁰ Amayim lel umbuka caalamti xiyaw tayim wagiyan, sin Abba lel tayim sin farhshishsham yaarhigemhi sabbatah kinni.

³¹ Amayim hidhdhah, kaa nigsinna wagiya, tayim lel sinah ossimto kinni.

³² Dago ciidot filcow, nigsinna sinah yaxayem sin Abbat xeden kinamhi sabbatah, mimashshiitina.

³³ Sinni iraaro teebexiinih lel muttuxuwah baaxentitih uxuwa. Baarroyinnixa maxfaza, carshelle bakitinnixe cukra, garceeni gufo wayah, qunqune caynishinnixeya sinneh issiqhirriba.

³⁴ Amayim lel sin cukra alle tanelle, sin afcaado gantah tannaw kinamhi sabbatah kinni.

Tanqarraboona sinalle tane

³⁵ Sinni faanuusa ifishsheenih sinni geera lel tikkitiinih suganta.

³⁶ Atin, ten manabotti marcaako careh gaxo ilaala mara, yamiiteh lel care yakuxkuxe gedda amalle anuk akah faakoona yinqirribe mara balih tika.

³⁷ Ten manabotti yamiite gedda himma-abitak sugta garuuza baraka-lem kinon. Usuk lel yikkitiyeyaako maaddille ten defeyshah, yamiiteyaako lel ten yayseeseem, rummah sinak arhxiyuk ane.

³⁸ Malammit dhawrholle yakko maddaxalle emet-yarhxe gedda dhawrhak ten geyemko, ta khaddamte baraka-lem kinon!

³⁹ Laakin tayim irhiga, cari-manabotti garceeni awlih saacadde yamiitem yeerhegeh yakkeedo, kaa cari yigdileh orobo kaa xabe mirhaarho.

⁴⁰ Xiyawti Barhi atin adde ilaalinnixitin saacadde amiituk yanemhi sabbatah, tinqirribiinih suganta.”

⁴¹ Bithroos lel: “Ta aymassal warishak tanitom nottah bisa kinni, woole umman maraha?” akko yerhxe.

⁴² Maddari lel: “Miyatto kinni umun kee kas-le masxadaadara, kaa manabotti ishi xawazhi baclaysheena akko abah, waqhte waqhteh lel ten ten folo akah yaxayya?

⁴³ Kaa manabotti yamiite gedda, tahe abaa sugo le garuzzi baraka-letiya kinni.

⁴⁴ Usuk lel umbuka ishi iraaroh baclaysheena akko abo kinam rummah sinak arhxiyuk ane.

⁴⁵ Amaa garuzzi laakin: ‘Yi manabotti caawitah kinni yamiitem’ ishek yarhxeyaako lel labeeto kee sayto kin khaddamte yaatako erherhisha, beetah, yaacubeh lel yaskire,

⁴⁶ amaa garuzzohi manabotti lel usuk adde kaa ilaalinnixe lellec kee usuk aarhiginnixe saacadde yamaato kinni. Dhacumaatih kaa yiqhtsiceh lel kaa gide aamininnixe maraalih ak hayo kinni.

⁴⁷ Amaa ishi manabottahi farhi yaarhige hanuk anqirribinnixa hido lel kaa farhi balih abinnixa garuzzi mangum yamattako kinni.

⁴⁸ Aarhiginnixak utka akah eeddam abeti laakin dagum yamattako kinni. Mangum akah amxayinnantiyaako mangum akko fadhdhishimto kinni. Mangum alle amaanatishentiyaako lel mangum akko esserimoona kinon.

Salaam makiiki, xazxaazimnan

⁴⁹ Anu emeeteh aniyom baarholle gira xarho kinni. Mece geddaako kunux-terhxeh tanniyeedo lel ayidhdha akxine dhaarhe!

⁵⁰ Anthimmiqhe thimqet liyo, aykee abayshimandah lel ufaye mangum yolle yaxeewe.

⁵¹ Anu emeeteh aniyom baarhoh salaam axawo takkaliini? Maale, amay maki, xazxaazimnan baaho kinni emeetem.

⁵² Kadooko lakalle inki caredde koon xazziimeya yannaw kinni. Adox lammaati diddeh, lamma lel adoxti diddeh.

⁵³ Abba barhi diddeh, barhi lel abbat diddeh, ina barhät diddeh, barhä lel inat diddeh, ballö ishi barhih numahi diddeh, barhi numa lel ballöt diddeh xazziimoona kinon” akko yerhxe.

Waqhti tafsiir

⁵⁴ Amaa mango xiyawak tahe yakkeedo akko yerhxe: “Ayrodhdhumadde darur awcuk tablin gedda, inki geddaako: ‘Rob amiituk yane’ tarhxin. Amayim lel takke.

⁵⁵ Junuub xaaxatti dhagak ablinnan gedda lel: ‘Sirii harur yakko kinni’ tarhxin. Amayim lel takke.

⁵⁶ Ko munaafiqhiino! Baarho kee caranti gina aaginah tayfissiriinim taarhigin hanuk, aymih kinni kadit waqhte akah yayfissiriiniikah sodhdhaanam?

Ishi qarimlih wagar

⁵⁷ Xaqqe sinni gabah tafradoona waytaanam aymih kinni?

⁵⁸ Ishi qarimlih inkidde reezanto fanah adiituk, usuk daaniyalle ku hiriigamko kee amaa daaniya lel, ishi xattiimeeni gabadde ku hayamko, amaa xattiimeeni lel xabshedde ku cidamko, araxadde anituk kaalih wagarto xawal.

⁵⁹ Akke wayemko, abayshimat santiim tafdiyendah tawco makitom kok arhxiyuk ane”.