Luukas 11 - Saaho Cusub Cahde

Maddari salaat

¹ Tekke lel, Yeesus wuli makaanolle assilluuk yinemko abayshe gedda, kaa katattaynitko wuliti: “Maddara, Yohannis ishi katattaynit akah yuyduruseeka balih, nanu lel akah nassilliyeekah ni uydurus” akko yerhxe.

² Usuk lel: “Tassilliin gedda, ‘Abba, ku migac yanqaddasoo, ku nigsinna tamaatoo.

³ Max yeenim ni lellecti folo noh uxuu.

⁴ Nanu ninneh cida adde lino maralle akah xabnaaka balih, ni zambit nolle xab. Cakanadde lel ni misayshin, erhexa’ akko yerhxe.”

^5-6 Tahe lel akko yerhxe: “Miyatto kinni sinadde carke leti, barti-abrhah kaalle yadiyeh lel: ‘Carke, wuli yi carki kallaaxeeko yodde yemeetek, kaa nifidde hayamah lel inkim maliyooki, adooxa folottat kinnas yi iylikkix’ yarhxeti?

⁷ Addadde gaxeyaako lel: ‘Yi mayrabbashin! Maczo mece geddaako alfimteh tane. Yi cindham lel caratalle kinni yottaalih yaniinim. Uguteh lel koh axawo mirhiica’ yarhxeh radde yadabbeti?

⁸ Kaa carke kinamhi sabbatah makiiki uguteh akah yaxaw lem, usuk alle yetsqetheethecemhi sabbatah farh-ishem akah yaxaw kinam inkinnah, sinak arhxiyuk ane.

⁹ Sinah warishak aniyo haye lel: Sinah tamxawo kinnik esserima, geytoona kinnik wagiya, sinah fakkitto kinnik lel ukuxkuxa.

¹⁰ Amayim lel esserinnanti kabbaata, wagiyati geya, yakuxkuxe tiyah lel akah fakkitto kinamhi sabbatah kinni.

¹¹ Sinadde awlih abba kinni barhi caasa kaa essera gedda, caasat idhdhah caroora akah axaye dhaarheti?

¹² Hido lel lalimta esserima gedda, igirh akah axaye dhaarheti?

¹³ Amaydo, atin uma mara kitin hanuk, sinni cindhamah mece muttuxuwa yaxaynim taarhegiinih yekkemko, carshelle geytima Abba kaa esserinnan marah amayimko ziyaada Quddus kin Ufaye yaxaye!”

Yeesus kee Beelzebuul

¹⁴ Kado lel, usuk naxar-maleeko jinnetta ayyaacuk yine. Tekke lel, amaa jinnetti akko yewce gedda, amaa naxar-mali waanishe. Amaa mango xiyaw lel cibrah raben.

¹⁵ Tenko gari laakin: “Junuun manabotta kin Beelzebuul xaylah kinni junuun ayyaacuk yanem” yerhxin.

¹⁶ Aki mari lel kaa yacakkanoona ciloh carsheeko ishaara adde wagiyaa yinin.

¹⁷ Ten xisaab yeerhegeh laakin tahe akko yerhxe: “Umman nigsinna ishe-isheh xazziiminnaniya zibboyta, xazziiminnan cari yakkeedo rada.

¹⁸ Yottak ‘Beelzebuuluh junuun yeyyeece’ yok arhxuk taniinim hi sabbatah, Sheethan gantah ishe-isheh xazziimemko, kaa nigsinna daw-tarhxo kinni?

¹⁹ Anu Beelzebuuluh junuun ayyaaceh ekkemko, sin cindham aymih abaanah yayyaaciini? Amaydo, usun sin daaniya yakkoona kinon.

²⁰ Laakin anu junuun akah ayyaacem Yallih ferah yekkemko, amaydo Yallih nigsinna sin bukalle temeeteh tane.

²¹ Sirii xiyawti umbuka aslaxa meceetih sariteyaako ishi rooshan dhawrha gedda kaa iraaro maaxitta.

²² Kaako siriiti yamiiteh akko yamlike gedda laakin, amaa usuk akah yeemeneh yine kaa aslaxa akko yaslibeh kaako bayshem lel ak kela.

²³ Yottaalih akkinnixeti yi didde kinni. Yottaalih askattinnixeti lel faax-isha.

Najaasa-le ufayehi gaxnan

²⁴ Najaasa-le ufayi xiyawtooko yawce gedda kafin baarhooko yadiyeh alle yacrufekke wagiyah waya gedda, ‘Amaa akko ewce inni care fanah gaxo kiyo’ yarhxe.

²⁵ Yamiite gedda lel fiyyiimeh yimnizzime care geya.

²⁶ Sarrah yadiyeh kaako uma aki malxina ufaye baaha, usun lel orobaanah amadde sigan. Amaa xiyawtih gondo lel awwalko taame.”

Rummaahit dhaaco

²⁷ Tekke lel, usuk tahe arhxuk, wuli numa tekette xiyawhi fantaako ishi dhaw xaf-ishsheh tahe akko terhxe: “Kotta tooqhoce guze kee atu dhoyte angug baraka-lem kinon.”

²⁸ Usuk laakin: “Maalekkahaye, baraka-lem too Yallih waani yaabbeh teya yabbirhe mara kinon” akko yerhxe.

Yoonaas calaama

²⁹ Tekette xiyaw ammanguk yemmengin gedda, tahe yarhxo erherhishe: “Ta ijo uma ijo kinni. Ishaara wagiyanhaaki laakin Yoonaas ishaaraako bextih inki ishaara akah tamxawo maki.

³⁰ Yoonaas Nineweehti marah ishaara akah yekkeekah lel, Xiyawti Barhi ta ijoh yakko kinni.

³¹ Junuub nigisti, Suleymaan xikma taabbo ciloh baarhot abayshimaako temeetemhi sabbatah amaa firdi max ta ijoh xiyawlih ugutteh ten taqtsaco kinni. Taykinna lel Suleymaanko nabam talle tane.

³² Nineweehti xiyaw, Yoonaas warroyishnan yoobbiinih yotoobiinimhi sabbatah firdelle ta ijoolih uguteenih ten yaqhtsacoona kinon. Taykinna lel Yoonaasko nabam talle tane.

Nabsi faanus

³³ Faanus iffoysheyaako tamaa oroba mari yabloona ciloh defeenak haya tiya kibah celtodde hido citrodde hayati miyane

³⁴ Ku inti ku nabsih faanus kinni. Ku inti caafiyat teellemko, umbuka ku nabsi iffowa, toomemko laakin ku nabsi dattowa.

³⁵ Amaydo, kottadde yane ifi dite yakkek selit.

³⁶ Umbuka ku nabsi wuli gabooko dite akkekkah iffowemko, faanus ziliilicoh ifo akah koh yaxayka balih, inkoh caddowo kinni”.

Faarisiin kee Sercat dhiiceenitik sin careyta!

³⁷ Yeesus waaanishak, wuli Faarisiiti kaalih beeto kaa essere. Usuk orobeh lel yuffututeh defeye.

³⁸ Bettok basolle adhdhoole wayem kaa yuble gedda lel amaa Faarisiiti cibrah rabe.

³⁹ Maddari lel: “Atin Faarisiinik kobbaaya kee shaxan irot gazaako cakalishshan, sin addat gazi laakin hirfe kee umaaniiko yemmeegeh yane.

⁴⁰ Ko duudito! irot gaza abeti addat gaza yakkeedo maabinna?

⁴¹ Amaydo, tamaa addadde tanem muttuxuwah baaxentitih uxuwa, taykinna lel ummanna sinah qarcoyta.

⁴² Laakin Faarisiinik sin careyta! Qathaf nacnac, cheenaddaam kee umbuka xalmitko taman-ya af tayyaaciinih xaqqe kee Yallih kaxano xabtamak! Toohim xabekkah lel tayim abtoona sinalle tine.

⁴³ Faarisiinik sin careyta! Sunagoogitidde mece defeenan, cadaagalle lel salaamta kixinamak.

⁴⁴ Sin careyta! Ambulluyinnixe qabre aarhigekkah xiyaw bukalle akko tadiyeya balih kitinki” akko yerhxe.

⁴⁵ Sercat dhiiceenitko inketti lel: “Mudarris, tahe arhxituk noh waatimak gantah tanito maka” yerhxeh alle yedebbe.

⁴⁶ Usuk lel: “Sercat dhiiceenitik gantah sin careyta! Xiyaw xaf-arhxinnixe cuukah taarriinih, sinneh laakin amaa cuuka inki ferah mirhagtaana.

⁴⁷ Sin careyta! Sin abbub yigdifin nobowah waydal siraxtamak.

⁴⁸ Amaydo, atin sin abbubhi abittotuh tashhidiinih ten kabbattan. Usun nobowa yigdifin, atin lel ten qabre siraxtan.

⁴⁹ Amaydo, Yallih xikma terhxe: ‘Nobowa kee fartottitko garo akko yagdafoona garo lel akko hadanoona lonya tenalle faro kiyo’.

⁵⁰ Amayim lel caalam dhishshimtemko taahe xarhite umbuka nobowat biiloh ta ijo esserimto ciloh kinni.

⁵¹ Abeel biilooko, mazbax kee maqhdas carehi fanadde yigidifin Zakariyyaati biilo fanah, yoo, ta ijo esserimto kinam, sinak arhxiyuk ane.

⁵² Sercat dhiiceenito sin careyta! Irhgat maftix beyteenih taninki. Atin sinneh moorobitiini, amaa orobak yine mara lel dessen” akko yerhxe.

⁵³ Usuk amakkeeko amulalle aduuk, sercat dhiiceenit kee Faarisiin dhacumaatih kaa esseroona erherhisheenih mangumudde waanisho kaa dufuffuwen.

⁵⁴ Kaa afko awcinnan waanittah kaa yabbarhoona lel akah yinqirribin.