Luukas 10 - Saaho Cusub Cahde

Yeesus malxintomon kee lamma fara

¹ Amayek sarrah, Maddari aki malxintomon kee lamma dooreh, kaa nifidde lallammaah yadawna umbuka isheh alle yadawle baarho kee daafo fanah ten fare.

² Tahe lel akko yerhxe: “Orba rummah mangum kinni haaki shaqqaala laakin dago mara kinon. Amaydo, orbat Maddari ishi orballe shaqqaala dhirhiyooki dhaaco aba.

³ Aduwa! Taykinna lel leemaamu balih suulalti fanadde sin farak aniyo.

⁴ Maxfaza, woole lakoota hido kabel maaqhacina, araxadde lel walaa inkettak nagaa marhxina.

⁵ Adde orobinnan carek lel erherhih ‘Salaam ta careh yakkoo!’ erhexa.

⁶ Amalle salaam bacli yinniyemko sin salaam kayyalle yacrafo kinni. Akke wayemko laakin sin salaam sinah gaxo kinni.

⁷ Shaqqaalatti ishi casbe geyo eeddamhi sabbatah lel, amaa caredde sinah axayinnanim beetak kee aacubuk suganta. Care ko carelle hel-marhxina.

⁸ Alle orobinnan daafolle sin kabbaatan gedda lel, nifidde sinah tinqirribem beta.

⁹ Amalle tane laxuttem lel urusa, tenak lel ‘Yallih nigsinna kab sinah terhxeh tane’ lel akko erhexa.

¹⁰ Alle orobinnan daafolle sin kabbaate wayan gedda laakin, tee shawaaricille tewciinih tahe akko erhexa:

¹¹ ‘Sin daafoh dorona ibobuk nok gaxteya gantah sinalle urgufak nane. Yallih nigsinna kab sinah terhxeh tanem laakin irhiga’.

¹² Amaa maaxi laakin amaa daafooko Sodomuh baarhoh yar-haw kinam sinah warisha.

Atoobinnixe daafofuk sin careyta!

¹³ Korazin ku careyta! Beet-sayda ku careyta! Amayim lel ta sinalle yekke xayla-le abittot Tsoor kee Tsiidoonulle tekkeh tineh yakkeedo, mece geddaakoh guula kee mombotsudde defeyak yotoobiinih anniye dhaarhen.

¹⁴ Laakin sinko Tsoor kee Tsiidoonuh ruhuu firdi yakko kinni.

¹⁵ Atu lel Kafarnaxuumo, carshe fanah korto kito? Hadeesadde kinni guballe cidditto kitom.

¹⁶ Sina aabbinnanti yotta yaabbe, sina xininnanti lel yotta xina. Yotta xininnanti lel amaa yotta fareh yane tiya xina”.

Malxintomon kee lammaahi gaxnan

¹⁷ Amaa malxintomon kee lamma lel xedenak gaxeenih: “Maddara, junuun gantah ku migacalle noh yim-izzizin”.

¹⁸ Usuk lel: “Sheethan xankarha balih carsheeko radak abluk iniyo” akko yerhxe.

¹⁹ “Taykinna lel, caror kee igiirhat bukalle tadawna kee umbuka sin nacabtooli xaylahi bukalle reeza sinah oxoyeh aniyo. Walaa inkim lel, sin tacammajo maki.

²⁰ Laakin, ufayit sinah yim-izziziinimih mixedeninantaaki, sin migoc carshelle yunkuttubeh yanemih xedena”.

Yeesus Quddus kin Ufayeh cafada

²¹ Amaa saacadde Yeesus Quddus kin Ufayeh mangum cafadeh yine, tahe lel yerhxe: “Abba, carshe kee baarhoh Maddara, ta xaajuj xikma-le mara kee maarhagitko sucusseh cindhaa cindham tiyshidhdhigemih, koh axmuduk aniyo. Yoo Abba, tayim lel ku mece farhi amaye kinamhi sabbatah kinni.

²² Yi Abbaako ummanna yoh tomxowweh tane, Abbaako bextih Barha yaarhigeti miyane. Barha kee Barhi yayshadhdhago doorime tiyaako bextih Abba yaarhigeti miyane.”

²³ Ishi katattaynitille ufkun-yerhxeh lel ten ulah tahe akko yerhxe: “Atin tabliinim yable intit baraka-lem kinni.

²⁴ Mango nobowa kee nuguusa atin tubliinim yabloona farhen, laakin maballinnooni, atin taabbiinim yaabboona hambereereenih mabbinnoonim sinak arhxiyuk ane.”

Mece Samaariyatti aymassal

²⁵ Taykinna lel, wuli sercat dhiiceeni Yeesus yaqhaaso uguteyaako: “Mudarris, umman geedit aniina awrasho ayim abo yolle tane?” akko yerhxe.

²⁶ “Sercatadde ayim tunkuttubeh tane? Amayim aaginah taqhriye?” akko yerhxe.

²⁷ Usuk lel: “Maddara kin ku Yalla umbuka ishi afcaadooko, umbuka ishi rooxeeko, umbuka ishi xaylaako, umbuka ishi xangalko ikxin. Ishi zoobatto lel ishe balih ikxin” yerhxeh alle yedebbe.

²⁸ Yeesus lel: “Radde meceetih tedebbeh tanito, aniina geyto kitok lel tayim ab” akko yerhxe.

²⁹ Usuk ishe yasxaqqaqho farheh laakin: “Miyatto kinni yi zoobatti?” yerhxeh Yeesus essere.

³⁰ Yeesus lel: “Wuli xiyawti Yerusaalemko Yerikho fanah guballe oobak yine. Garaacenti gabadde lel rade. Sara inkoh akko yeyyeeciinih lel kaa yootokinyaako rabo farhe kayya xabeenih akko yedeyin.

³¹ Wuli shekh yakkeedo saadifih amaa araxalle guballe oobak yineya kaa yuble gedda akuulaako tillab akko yerhxe.

³² Amayim balih lel Leewiiti yakkeedo amaa caralle yemeeteh kaa yuble gedda akuulaako tillab akko yerhxe.

³³ Wuli Samaariyatti laakin kallaaxak kaalle yemeeteya kaa yuble gedda raxmah uluc akko xarhe.

³⁴ Alle yemeeteh lel zeet kee wayni alle xarheyaako biyok akah agoogishe. Ishi okolottak hayeh lel wuli gerhi macrafo fanah beyeh kaa baclayshe.

³⁵ Malammit max lel lamma diinaar yeyyeeceyaako amaa gerhi macrafohi wannah yoxoyeh: ‘Kaa baclayish. Tayek sarrah kayyalle aylayinnannim gaxa gedda koh akfalo kiyo’ akko yerhxe.

Marta kee Maryam

³⁶ Ta adoxko awlih tii ta garaacenti gabadde rade tiyahi zoobattoh kolle higgida?”.

³⁷ Amaati lel: “Amaa kaalle raxmateti” akko yerhxe. Yeesus lel: “Aduwaaki atu gantah amaa ginah ab” akko yerhxe.

³⁸ Kado usun sinni araxalle aduuk, Yeesus wuli dikidde orobe. Wuli migacah Marta decsitta numa lel, kaa arxibishshe.

³⁹ Ta numah sacla Maryam akko yarhxinya lel Maddari ibih afalle defeyak kaa waani taabbeya tine.

⁴⁰ Marta laakin mango ciyyodde tindhibbirheh tine. Kaalle temeeteh: “Maddara, yi sacla ciyyodde tiyak yi xabtem ku mibexsishsha? Amaydo, yi xattooki eelih waanish” akko terhxe.

⁴¹ Yeesus lel: “Marta, Marta mango xaajah amsheeqheluk kee amxeesebuk tanito.

⁴² Laakin, inki xaaja farhshishshaya tane. Maryam teeko adiye wayto-le mece gide dooritteh tane” yerheh alle yedebbe.