Luukas 1 - Saaho Cusub Cahde

Tabarruc Te-ofilosuh

¹ Mangum xishma-le Te-ofilos, mango mari amaa ni fanadde tikmile zantahim yaskattoona yicikkiniinik sarrah,

² amaa erherhaako intih yuble mara kee Kalimat khaddamti kuuk yine maraako nottalle tillabtem balih,

³ anu gantah erherhaako ummanim xeelaalih katattayemko sarrah, rigah koh aktubem meceh yolle yimmingide.

⁴ Amayim lel tamaa tuydurusem thummut kinam taarhago ciloh kinni.

Yaythimmiqhe Yohannis yaabako kinam yerhxiinih yinin

⁵ Yahuudiyaati nugus kin Heerodesti max, Abiyyaati filcooko kin Zakariyya akko yarhxin shekh yine. Haaruun zaraako kin Elsaabeth akko yarhxin numa lel luuk yine.

⁶ Usun inkoh Yallih wajhelle xaqqi-wannun kuuk yinin. Usun lel inkoh Maddari amrit kee obsadde cadale hinnim gerhak yinin.

⁷ Elsaabeth gedme kuuk tinemhi sabbatah cindham luuk miyiniini. Lellec akko tillaabe baarrit lel inkoh kuuk yinin.

⁸ Zakariyya Yallih wajhelle ishi filcohi ibreh shekh yekkeh akhdumuk,

⁹ sheekhinooti cayda balih, Maddari macbadadde orobeh caydarruus ceerisho cija kaa gufte.

¹⁰ Amaa caydarruus waqhte lel inkoh tekette xiyaw irolle assilluuk yinin.

¹¹ Maddari malaykatti lel amaa caydarruus mazbaxalle mizgi carhaako daw-yerhxeh akah yumbulluwe.

¹² Zakariyya kayya yuble gedda yomroocode, gilix lel kaa yibbirhe.

¹³ Amaa malaykatti laakin: “Zakariyya, ku duca tomobbeh tanemhi sabbatah mimashshiitin. Elsaabeth ku numa lel barha koh bahto kinni. Yohannis yan migac akah tayyaaco kito.

¹⁴ Atu xeden kee mango cafad taallo kito, kaa ubkalle lel mango mari xedento kinni.

¹⁵ Amayim lel usuk Maddari wajhelle naba tiya yakko kinamhi sabbatah kinni. Wayni kee khamre yaacabo maki. Inat garbadde aniikoh, Quddus kin Ufayeh yammaago kinni.

¹⁶ Israa-eel dhaylo mango mara lel Maddara ten Yallalle yadabbo kinni.

¹⁷ Eliyaas ufaye kee xaylaalih usuk Maddaraako yookomeh yamaato kinni. Abbubti afcaado cindhamalle, amre xina mara lel kas-le xaqqi-wannunulle yadabbo kinni. Ummat lel Maddarah yinthirrifiinih akah sugaanaakah akko abo kinni” akko yerhxe.

¹⁸ Zakariyya lel malaykattok: “Anu baarra kiyo, yi numa lel cumreh lellec akko tillaabe tiya kinamhi sabbatah, tayim aaginah aarhago kiyo?” akko yerhxe.

¹⁹ Malaykatti lel “Anu Jibriil kiyo, Yallih wajhelle daw-yerhxeh yane tiya kiyo. Kottaalih waanisho kee ta bissiraata koh baaho farritime.

²⁰ Yi waani ishi waqhteh takmalo leyah atu maamanitomhi sabbatah, taykinna lel, tayim takke max fanah sik-terhxeh waanishsho dhiicinnixitom takko kito” yerhxeh radde akah yoxoye.

²¹ Xiyaw lel Zakariyya ilaalak yinin. Macbadadde caawitem lel cibra akah yekke.

²² Yewce gedda lel tenlih waanisho mirhiicinna. Macbadadde mablo yublem lel yeerhegin. Gabah lel akah aymiknuuk yine, naxar-male yekkeh lel raace.

²³ Kaa khadaamahi waqhti yikimile gedda, usuk ishi careh gaxe.

²⁴ Amaa maxko sarrah Elsaabeth kaa numa soonoyitte. Koona alsa lel ishe sucusse.

²⁵ “Tayim Maddari ishi intih kulux yodde yerhxe max yoh abem kinni. Xiyaw fantaako lel yi xoola asac yoh ishe” terhxe.

Yeesus yaabako kinam yerhxiinih yinin

^26-27 Lix-ya alsadde lel malaykatti Jibriil, Naazret akko yarhxin Galiilaati daafolle, Dawud meelaako kin Yoosuf migacah le labhattodde timliishe dhaggitinnexe barhä fanah Yallaako farritime. Amaa dhaggitinnexe barhähi migac lel Maryam kuuk yine.

²⁸ Alle yemeeteh lel: “Nagaa! tinkixxine-tiyawo, Maddari kottaalih yane!” akko yerhxe.

²⁹ Ta waanih lel mangum temlelekke. Aaginale salaamta yakko kinam lel texeesebe.

³⁰ Malaykatti lel: “Maryamo, Yallaako nicma geyteh tanitomhi sabbatah, mimashshiitin!

³¹ Taykinna lel, soonoyitteh barha bahto kito. Kaa migacak lel Yeesus akko tarhxo kito.

³² Tati naba tiya yekkeh Nabamko Naba tiyahi Barhah decsiimo kinni. Maddara kin Yalli lel Dawud kaa abbahi nugus-kurse akah yaxaw kinni.

³³ Yacqoob meelahi bukalle lel umman geddah reezo kinni. Kaa nigsinna lel abayshima taallo maki” akko yerhxe

³⁴ Maryam lel malaykattok: “Anu labhatto maarhige hanuk, tayim aaginah takko kinni?” akko terhxe.

³⁵ Malaykatti lel “Quddus kin Ufayi kolle oobo kinni, Nabamko Naba tiyahi xayli lel ku silaalisho kinni. Amaymih lel, tamaa yaabuketi Quddus kin tiya kee Yallih Barhah decsiimo kinni.

³⁶ Taykinna lel, Elsaabeth ku ahlentö gantah ishi baarrinoolih barhalle soonoyitte. Gedmeh decsiima tinemko, kado tati tee lix-ya alsa kinni!

³⁷ Yallaalih akkinnexem mitane” yerhxeh radde akah yoxoye.

³⁸ Maryam lel “Taykiyo lel, anu Maddari garuzzö kiyo. Ku waanitta balih yoh takkoo” akko terhxe. Malaykatti lel xabeh akko yedee.

Maryam Elsaabeth gufta

³⁹ Amaa waqhtedde ugutteh lel iba-lacteh wuli Yahuudiyaati koomah daafo fanah tedee.

⁴⁰ Zakariyyaati caredde orobteh lel Elsaabethik salaam terhxe.

⁴¹ Elsaabeth lel Maryam salaamta toobbe gedda, laatseeni tee garbadde gerraace. Elsaabeth lel Quddus kin Ufayeh temmeege.

⁴² Wac-terhxeyaako andhax xaf-ishsheh lel tahe terhxe: “Atu umman sayyooko baraka le tiya kito, ku guzehi daro lel baraka-le!

⁴³ Anu aamottä ekke gedii, yi Maddarih ina yolle tamiitem?

⁴⁴ Taykinna lel, ku salaamtahi dhaw yi cokka gufe gedda, yi guzedde laatseeni xedenih gerraace.

⁴⁵ Amaa Maddari akko yerhxem takmalo kinamah teemene tiya lel, ishi baraka-letiyä kinni.”

Maryamti faylat margadde

⁴⁶ Maryam lel: “Yi rooxi Maddara yaynabe,

^47-48 Usuk ishi garuzzohi ramacta duheh yanemhi sabbatah lel, yi ufayi Yalla yi Gargeereenah mangum cafada. Taykinna lel, kadooko lakalle umman ijo dhaacole yok yarhxoona kinni.

⁴⁹ Amaa Dhiiceeni lel, naba xaaja yoh abeh yanemhi sabbatah, quddus kinni lel kaa migac.

⁵⁰ Kaa mashshiita marah lel, kaa raxma ijooko ijolle kinni.

⁵¹ Ishi agadah quwa le xaaja abeh yane. Sinni afcaadodde amnonobbaati ekkal le mara faax-isheh yane.

⁵² Xayla le mara ten nugus-kursitko sam-isheh yane, ramacta kin mara lel xaf-isheh yane.

⁵³ Safrittem mece xaajah yemegeh yane, gaddaalit lel foyyak ten hadaneh yane.

^54-55 Amaa ni abbubuk akah yerhxeekah, Abraahim kee kaa azaralle umman geddah alle raxmato kinam azikkiruk, Israa-eel ishi khaddaam xateh yane” terhxe.

⁵⁶ Maryam lel adooxa alsa takkem teelih sugteh ishi careh gaxte.

Yaythimmiqhe Yohannis hi ubka

⁵⁷ Elsaabeth umulta waqhti gufe gedda, barha bahte.

⁵⁸ Tee xuggit kee tee ahle lel Maddari naba raxma teyalle yuybulluweya yoobbin. Usun lel teelih cafaden.

⁵⁹ Baxar-ya max lel amaa zabalooko askok akko kaloona yemeetin. Zakariyya kaa abbahi migac lel akah yayyaacoona farhen.

⁶⁰ Kaa ina lel: “Maale, Yohannis akah nayyaaco kinni” terhxeh radde akah toxoye.

⁶¹ Usun lel: “Ku ahleeko ta migac leti miyane” akko yerhxin.

⁶² Usun lel kaa abbah akah aymiknuuk miyatto akah yayyaaco farham kaa esseren.

⁶³ Usuk lel lux esserimeh: “Kaa migac Yohannis kinni” yerhxeh yuktube. Usun lel inkoh cibrah raben.

⁶⁴ Akkanih lel kaa af fakkite, kaa anrab lel yimfittixe. Yalla faylishak lel waanishe.

⁶⁵ Umbuka ten xuggit lel gilixih raben. Tayim lel inkoh umbuka Yahuudiyaati koomalle warroyte.

⁶⁶ Inkoh tayim yoobbe mari lel sinni afcaadodde hayen. Maddari gaba kaalih tinemhi sabbatah lel: “Ta zabuli ayim yakko kinni?” arhxuk yinin.

Zakariyya takko lem yubleh yineya

⁶⁷ Zakariyya kaa abba lel Quddus kin Ufayeh yemmeege. Nabii balih waanisheh lel:

⁶⁸ “Ishi ummat gufeh yeyyeecemhi sabbatah, Maddara, Israa-eel Yallah fayla takkoo.

^69-70 Kalxaako quddus kin ishi nobowat afko akah waanisheekah, Dawud ishi khaddaamhi caredde, xayla le Gargeereena noh baahe.

⁷¹ Ni nacabtoolitko kee umbuka ni nicib marahi gabaako lel ni gargeero kinni.

⁷² Usuk tayim abem lel ni abbubulle raxmato kee ishi quddus kin cahde yazzakkaro,

⁷³ ni abba kin Abraahimih dhiiwite dhiiwa kinni.

^74-75 Nacabtooli gabaako ni yiysillimem, umbuka ninni lellecille kaa nifidde tinqiddisem kee xaqqi-wannun nekkeh, mashshi hinnim kaa nacbado ciloh kinni.

⁷⁶ Zabalo atu lel, Nabamko naba tiyahi nabiih decsimto kitom, kaa afadde tadaw kee Maddari arax taymaaco kitom hi sabbatah kinni.

⁷⁷ Kaa ummat zambi xabbot akah geyan gargerti irhga taxawo kito.

⁷⁸ Ni Yallahi qalbi raxmahi sabbatah, maaxi aganaako ni gufo kinni,

⁷⁹ amaati dite kee rabit silaladde defeya marah ifishah, ni iba lel salaam gabolle yaymirixe” yerhxe.

⁸⁰ Amaa zabali lel carsime, ufayeh lel yigmirhe. Israa-eellih ishe yayshidhdhige max fanah lel zibolle yine.