Kolossay 4 - Saaho Cusub Cahde

¹ Ko manabottito, atin lel carshelle Manabotta litiinim teerhegiinih, sinni garuuza xaqqe kee agaagimlih ibbirhanta.

Ziyaadahi masxassa

² Macalsoolih xamdishita mara tekkiinih, salat mixabinanta.

³ Amayim balih, tamaa anu kaa zacabah akko umudhdhuweh aniyo Masiix mashthir warroyishno, Yalli ishi waanittah caraf noh faako, nottah gantah dhaaco abanta.

⁴ Anu lel tamaa akah eedda araxah amaa waanitta caddoyisheh waanisho dhaaco abanta.

⁵ Tamaa sinni waqhte sinni nafaacadde ashishsheenih, irot maraalih xikmah aalih gerhanta.

⁶ Umman tiyalle akah tadabbiiniikah taarhagoona ciloh, sin waani mulxu-lem tekkeh umman gedda nicma-lem takkoo.

Abayshimat salaamta

⁷ Tikhikos yi ciyyohi zacabah inkoh sinah warisho kinni. Usuk ni yinkixxine sacal, umun kin khaddaam kee Maddari ciyyo yottaalih yakhdume tiya kinni.

⁸ Sinalle kaa farak aniyom lel nanu akah naneekah taarhagoona kee afcaado sinah aydukumuso ciloh kinni.

⁹ Kaalih lel tamaa sinko kin umun kee yinkixxine ni sacal Oneesimos sinalle farak aniyo. Usun talle akkuk tanem inkoh sinah warishoona kinon.

¹⁰ Tamaa yottaalih xabshedde yane Aristarkhos salaamat sinak arhxuk yane. Barnabasak nangalo yakke Markos lel salaamat sinak arhxuk yane. Tati tamaa masxassa akko kabbatten tiya kinni. Usuk sinalle yemeetemko meceetih kaa kabbata.

¹¹ Yustus akko yarhxin Yeesus lel salaamat sinak arhxuk yane. Yallih nigsinnah khidma yottaalih yangale maradde, askok-kalum abeenih, yotta aydukumusak tane Yahuud, ta mara bisa kinni.

¹² Tamaa sinko kin Masiix kin Yeesus garuzzi, Ebafraas, salaamat sinak arhxuk yane. Atin umbuka Yallih farhidde kaamilik thummut tekkiinih, yigmirhe mara tekkinyaako tasbatoona, dhaacoh sinah andufuluk yane.

¹³ Usun sin kee tamaa Lawdikeya kee Hiyerabolisille tanemih arhxuk sirii ginah yushtuqhuleh yanemih shaahid kiyo.

¹⁴ Luukas, tamaa yinkixxine xaakim kee Deemaas salaamat sinak yarhxin.

¹⁵ Tamaa Lawdikeyalle tane sacul kee Nimfa kee tamaa tee caredde takatte kaniisak salaamat akko yoh erhexa.

¹⁶ Ta jawaab sinah tanqirriye gedda, tamaa Lawdikeyaati kaniisadde lel akah tanqirriyeekah abanta. Atin lel tamaa Lawdikeyaako tamiite jawaab iqhriyanta.

¹⁷ Arkhibbosuk lel: “Tamaa Maddari araxah kabbatte ciyyo akah abayishshaakah ab” akko erhexanta.

¹⁸ Anu, Bawlos, ta salaamta inni gabah sinalle aktubiyuk ane. Yi silansil xunsusa. Nicma sinlih takkoo.