Biblia Todo Logo
Bìoball air-loidhne

- Sanasan -

Kolossay 3 - Saaho Cusub Cahde


Cusub nabse hashshit

1 Masiixlih rabaako ugutteenih tekkiinimko, tamaa agana Masiix Yallih mizgi gabooko alle defeyeh yanelle tanem wagiyanta.

2 Baarholle tanemille akkekkah, tamaa agana tanemille sinni niya hayanta.

3 Amayim lel atin rabteenih tanin, sin aniina lel Masiixlih Yalladde sucutteh tanemhi sabbatah kinni.

4 Tamaa sin aniina kin Masiix yamidhdhige gedda, amaydo atin gantah nabnedde kaalih tamadhdhagoona kitin.

5 Amaydo tamaa baarhootim kinam sinadde taneya: uma-xibar, cibdaan, bacaalagino, uma farhi kee tamaa asnaamah yacbudiinim kin hirfe igdifanta.

6 Tayimhi sabbatah tamaa kaa aabbinnixe maralle Yallih kura amiituk tane.

7 Atin gantah wuli gedda tayim abak marak tinin.

8 Kado laakin tayim: kura, xurtaame, umaani, waato, uma waani sin afko inkoh asac-ishshoona sinalle tane.

9 Basoohit nabse kaa ciyyoolih asac-ishsheenih taniinimhi sabbatah, sittiyalle mizirabbitina.

10 Ishi khaaliqhih yammangado lel irhgah yucussube cusub nabse saritteenih tanin.

11 Masiix ummannim kee umman tiyah kinni kibah, talle Giriik xiyawto, Yahuuddo, askok-kalum abe tiya, askok-kalum abinnixe tiya, godobotta, Iskuteesti xiyawto, garuzzo kee finja-le mibarhisha.

12 Amaydo, yinqiddise mara kee yinkixxine mara Yalli dooreya, afcaadot naxrurta le mara akah kitiiniikah, mecaani, amnanabbe wayaanam, xiyaawinna kee curtayyo saritanta.

13 Sinne-sinneh sittiya dhicteenih, akkinnanti akkinnan tiyaako yassimingide gedda, sittiyalle xabtaanam. Tamaa Maddari akah sinalle xabeekah, sittiyalle xabtoona sinalle tane.

14 Umbuka tayimhi bukalle lel, tamaa ummannim kaamil kin samarah inkidde yarhuwe kaxano saritanta.

15 Tamaa inki nabse tekkiinih deeco sinah alle tekke Masiix salaam sin afcaadodde reezoo. Xamde lel eddebbaanta.

16 Masiix waanitta gaddaalitteh sinadde sigtoo, umbuka xikmah lel sittiya tuydurusiinih sittiya aydukumusanta. Sinni afcaadooko Yalla xamdishitteenih lel mazmuur, faylat qanna kee nazme abanta.

17 Abinnannimidde lel, waanih yakko abittoh, inkoh Maddara kin Yeesus migacalle abanta. Amaymih lel kaa araxah Abba kin Yallah xamde edebbaanta.


Santo yaamine marahi xawazah

18 Ko sayyo, Maddaradde basak-arhxinnan xibarah sinni baacilih im-izzizanta.

19 Ko baacilo, sinni sayyo ikxina kibah alle masrayna.

20 Ko cindhaamo, Maddari kixinamhi sabbatah ummanimih sinni dhaltoyya oobbaanta.

21 Ko abbubo, niya cidaanak sinni cindham mikurrayshina.

22 Ko garuuzawo, ummanimih baarhot sinni manabottit, tamaa xiyaw sinah yabloona, hido xiyaw xedenishshoona akkekkah, sinni afcaadooko Maddara mashshitteenih ten oobbaanta.

23 Abinnannim, xiyawah aba mara balih akkekkah, Maddarah aba mara balih rummaahit afcaadooko abanta.

24 Amayim lel sinni casbeh amaa miiraas Maddaraako kabbattoona kitiinim teerhegiinih abanta. Atin Maddara kin Yeesus kinni akhdumuk taniinim.

25 Umaani abati tamaa abeh yane umaanih yaffadaw kinni. Yallaalih babbarhishnan miyane.

©2024 Wycliffe Ethiopia

The Seed Company
Lean sinn:



Sanasan