Kolossay 2 - Saaho Cusub Cahde

¹ Sin kee tamaa Lawdikeyalle tanemih arhxiyuk, tamaa nif kee nifih yi tubleh sodhdhamah arhxiyuk, aaginale naba gixlo liyom yoh taarhagoona sinak farha.

² Tayim lel, ten afcaado aydukumusnan geyteh kaxanoh inkidde yamadhdhawna, thummut yekkiinih lel kaamil kin fahaamat gadda yeellinyaako, tamaa Yallih mashthir kin Masiix yaarhagoona ciloh kinni.

³ Umbuka xikmah cukrar kee irhga adde sucutteh tanem lel kayya kinni.

⁴ Tayim sinak arhxiyuk anem lel akkinnanti takkeh higgidin waanih sin doolabamko kinni.

⁵ Anu nabseh sinlih anniye wayo kibah, qalbeeko sinlih aniyo. Sin mece xijxijo kee Masiixidde litin imaanhi tiraare ableyaako xedenak aniyo.

Masiix araxah geytimta aniina

⁶ Amaydo, Masiix kin Yeesus Maddara balih akah kabbatteeniikah, kaa araxalle gerhanta.

⁷ Kayyadde rimid dhirhiiteenih carsimtenyaako, tamaa akah tudrusiiniikah imaanalle isbita, xamde lel eymengaanta.

⁸ Akkinnanti Masiix araxah akkekkah, xiyaw kas balih foyya kin doolabah, xiyaw cayda kee caalamti ufayit hi xaylahi araxah sin yabbirhek selitanta.

⁹ Yalli inkoh ishi migeh kaa nabsedde siga.

¹⁰ Atin lel tamaa umbuka reeza kee mas-uuliyahi amo kin kayyah temmeegiinih tanin.

¹¹ Atin lel Masiix araxah yakke askok-kalumuh, tamaa xazotta kin nabse kaleyaako, gabah yakke askok-kalumuh akkekkah, kaa araxah askok-kalum abteenih tanin.

¹² Anthammaqhah kaalih tumuccugin, xaylah rabaako kaa uguse Yallahi ciyyoh teemeniinih atin gantah kaalih ugutten.

¹³ Atin lel, tamaa sinni umaani kee askok-kalum akko akkinnixe xazottah rabeh suge marak, kaalih yane mara sinak abe. Yalli umbuka ni umaani nolle xabe.

¹⁴ Tamaa ni taksiseh ni didde kuuk tine cidat shahaada dhintolle tunkuttubeh tineya kaleh yane. Tayim lel masqalakke yinkiyeyaako kinni asac-isheh yanem.

¹⁵ Mas-uuliin kee reezonko yislibeh kaamil kin sariigalla geyeyaako, umman tiyahi nifille masqal araxah ten xoolayshe.

Walaa inketti limo hinnim sin raacishe wayoo

¹⁶ Amaydo, bettimtam kee tamuccubemih, hido lel cidih hido alsi biloh cid hido lel Sambutti zacabah walaa inketti sin afride wayoo.

¹⁷ Tayim tamaa tamaato lemhi silal kinni, rummah tanem laakin Masiix kinni.

¹⁸ Walaa inketti amnanabbinnixe tiyah yimmingideh malaykutuh yacbudeya limo hinnim sin raacishe wayoo. Tagina leti, tamaa mablol meceetih caddoysho arhxuk, amficinnixe xazottahi niyah xaffuwa tiya kinni.

¹⁹ Ta gina-le xiyaw tamaa amoolih yirhibbishiinih miyaniini. Ta amooko umbuka nabsi muyfuluu kee ramuduh qath-yerhxeh inkidde yindhibbirheh yane. Nabsi lel Yallaako yamiite carsah cara.

²⁰ Atin ta caalamti ufayit hi xaylahi araxah Masiixlih rabteenih tekkiinimko, aymih kinni, ta caalamti mara balih, tee dhintoh tangizziinim?

²¹ Amaa dhinto lel: “Mabbarhin, akko mirhacamin, mirhagin” tarhxem kinni.

²² Ta dhintot lel tamaa xiyaw labcadah tekkem kinamhi sabbatah, inkoh aban gedda talayem kinni.

²³ Ta dhintot lel rummah xiyaw sinneh iraaren diin kee amnonobba hinam higgidah, xirrimotuh nabse dhacumaatih taqhtsicem kinniyaako, xikma lemih higgida. Ta dhintot makko male, xazottat farhih deeso yakko lel mirhiica.