Kolossay 1 - Saaho Cusub Cahde

Salaamta

¹ Yallih farhih, Masiix kin Yeesus fartotta yekke Bawlos kee ni sacal Timoteyosko,

² Kolossayalle geytima yinqiddise mara kee umunaat kin saculuk: ni Abba kin Yallaako nicma kee maaxiyo sinlih takkoo.

Xamde kee dhaaco

³ Nanu sinah dhaaco abna gedda ni Maddara kin Yeesus Masiix Abba kin Yallah umman gedda xamde naddabbe.

⁴ Amayim lel, atin Masiix kin Yeesusudde litin imaan kee umbuka yinqiddise marah litin kaxano noobbemko taahe,

⁵ carshelle sinah yinqirribeh yane caghi sabbatah kinni. Ta cag lel tamaa rummi waanitta, mece ware kinyahi araxah toobbiinih tanin.

⁶ Tamaa mece wari sinalle yemeeteya, umbuka caalamalle fire baahak kee amfiddinuk akah yaneekah, tamaa Yallih nicmahi sabbatah rumma adde toobbiinih adde tifhimin lellecko, sinadde gantah amayim balih akkuk yane.

⁷ Tayim sin tuydurusem lel nottaalih yakhdume yinkixxine Ebafraas kinni. Usuk sin idhdhadde umun kin Masiix khaddaam kinni.

⁸ Atin Ufayeh litin kaxano ni tiyshidhdhigem lel kayya kinni.

⁹ Amaymih kinni lel, nanu tamaa noobbe lellecko erherhishneh, kaa farhih irhgah umbuka ufayi xikma kee fahmi araxah tammaagoona dhaacimak, sin zacabah dhaaco abaanam daw-miishino.

¹⁰ Amayim lel, umbuka mece abittoh fire bahtoona kee Yalla aarhigitin tanaboona, Maddarah missil araxah gedhdheenih, meceetih kaa xedenishshoona ciloh kinni.

¹¹ Tamaa nabne le kaa xayla balih, umbuka curtayyo kee sabreelih xedenak, umbuka xaylaalih tasrawna,

¹² amayim balih, tamaa ifodde geytima yinqiddise marahi miiraas nangalo sin dhicshiishe Abbah xamde addabbuk nane.

¹³ Usuk ditet giz-atko ni yeyyeeceh yinkixxine ishi Barhahi nigsinnalle tillaabisheh yane.

¹⁴ Nanu kaa araxah muuca kee zambi xabbot geyneh nane.

Masiix ummanimhi buka kinni

¹⁵ Usuk ambulluwinnixe Yallahi misle, umbuka makhaaliqhoh riish kinni.

¹⁶ Inkoh carshe kee baarholle tanem, tambulluwem kee ambulluyinnixem, hido nigsinnat xaylit kee giz-at, mas-uuliin kee reezon, ummannim kaa araxah kee kayyah kinni tunkhulluqhem.

¹⁷ Usuk ummanimhi basolle kinni, kaa araxah lel ummanim sittiya tabbirhe.

¹⁸ Usuk kaa nabse kin kaniisahi amo kinni. Usuk erherha kinni, ummanimhi amolle yakko ciloh lel rabtemhi riish kinni.

¹⁹ Yalli ishi mige inkoh kayyadde sigisham yikxine.

²⁰ Masqalalle xarhite kaa biilohi araxah salaam abeyaako, inkoh baarholle tanem yakko carshelle tanem kaa araxah isheelih wagarishe.

²¹ Atin tamaa basoh Yallaako yedhdheerheh uma xisaab, uma ciyyo luuk yine marak,

²² kado yinqiddise mara, cagab hin mara kee abar hin mara sinak abeh ishi nifille kab sin isho ciloh, xazotta kin kaa nabsehi rabih sinlih wagareh yane.

²³ Tayim lel rummah atin imaan katattayishsheenih, tamaa toobbin mece warehi rajaako acrhiyekkah, dhishshimteenih tisbitiinimko kinni. Ta mece wari carshi geridde geytimta umbuka makhluuqhulle warreyeh yane. Anu, Bawlos lel mece warehi khaddaam ekkeh aniyo.

Bawlos kaniisah abe khidma

²⁴ Kado sinah arhxiyuk waaxelsiitamah xedena. Kaa nabse kin kaniisah arhxiyuk lel tamaa Masiix waaxeltaako ractem inni xazottah amagiyuk ane.

²⁵ Tamaa Yallaako sinah arhxuk yolle yomxoye asxadaadarti araxah, Yallih waanitta meceetih sin ayshadhdhago kaniisat khaddaam ekke.

²⁶ Dherh mudda kee ijojulle sucuteh suge mashthir lel kado yinqiddise kaa marah yimidhdhigeh yane.

²⁷ Yalli Aki-marahi addalle ta mashthir hi gaddih nabne ayidhdha nabam tena yayshidhdhigem doore. Ta sirri lel sin addadde yane nabnet cag kin Masiix kinni.

²⁸ Nanu umman tiyak Masiixidde kaamil kin tiya akko abneh kab kaa ishno ciloh, umman tiya umman xikmaalih asuusak kee aydurusuk, kayya warroyshak nane.

²⁹ Taymih lel tamaa usuk yi addadde umbuka ishi naba xaylaalih aba ciyyoh andufuliyuk xawalak ane.