Galaatiya 6 - Saaho Cusub Cahde

Sittiya cuuka uyquca

¹ Yi saculo, akkinnanti umaanidde yindhibbirhemko, Ufayi adde yane marak, mece-mariinooti ufayelle kaa edebbaanta. Isheh cakanadde saytak lel xeelassit.

² Sittiyahi cuuka uqhucanta. Taginah Masiix sercat taskamaloona kitin.

³ Akkinnanti walaa inkim maki hanuk, ishedde yekkelemko, ishe doolaba.

⁴ Laakin ummanti ishi ciyyo yamarmaroo, amaymik sarrah, kaa zoobattihimih akkekkah, ishimih falito kinni.

⁵ Amayim lel, ummanti ishi cuuka yaaqhaco kinamhi sabbatah kinni.

⁶ Tamaa Yallih waanitta yadruseti lel umbuka mecemko ishi mudarrislih xazziilitoo.

⁷ Midoolabimina! Ummanti azziriinnanim orbishito kinamhi sabbatah, Yalli digir male.

⁸ Amayim lel ishi xazottah arhxuk yazriyeti, xazottaako liya orbisho kinni. Ufayeh arhxuk yazriyeti laakin, Ufayeko umman geedit aniina orbisho kinni.

⁹ Niya cide waynemko, yamiite waqhtedde orbishno kinomhi sabbatah, mecaani abaanamalle abboohose waynoo.

¹⁰ Amaydo, caashir geyinnan gedda, umman tiyah mecaani abnoo, fertoh lel tamaa imaanah ni sacul kin marah.

Abayshimat asuuso kee baraka

¹¹ Anu inni gabah aaginale naba xuruufuh sinalle aktubiyuk anem ubula.

¹² Askok-kalum abtoona sin xaylisho farha mari, tamaa xazottah yamnanabbo farha mara kinon. Tayim abak yaniinim lel Masiix masqalhi sabbatah haddaanimaanamko ciloh kinni.

¹³ Tamaa askok-kalum abe mari gantah sinneh sercat mirhawrhaana, laakin usun sin xazottah falitoona ciloh, askok-kalum abtoona sinak farhan.

¹⁴ Anu laakin, caalam yottah masqalak akah takarimte, anu lel caalamah masqalak akah takarime Yeesus Masiix masqalko bextih, aki falo yottaako mirix-tarhxoo.

¹⁵ Askok-kalum abaanam yakko, askok-kalum abe wayaanam nafaaca male. Tamficem cusub makhaaliqho kinni.

¹⁶ Inkoh ta arax kataa mara kee Yallih mara kin Israa-eel xiyawah maaxiyo kee raxma takkoo.

¹⁷ Anu inni nabsekke Yeesus xubbur ooqhoceh aniyomhi sabbatah, taymik sarrah walaa inketti yi ayribbishe wayoo.

¹⁸ Yi saculo, ni Maddara kin Yeesus Masiix nicma sin ufayelih takkoo. Amin.