Galaatiya 5 - Saaho Cusub Cahde

Masiix finja-le mara nok abeh yane

¹ Finja le mara nakko, Masiix finja-le mara nok abe. Amaydo, malammih garuuzinnat arcotudde misaynantaaki isbita!

² Oobbaanta: Anu Bawlos sinah warishak aniyo, askok kalum kabbatteenimko, Masiix walaa inkim sin yamfaco maki.

³ Askok-kalum kabbaatinnanti lel, amaa sercat kaamilik dhawrho yanqissibem gaxisheh ashhidiyuk ane.

⁴ Sercatah yatxaqqaqho farha marak, Masiixko barhsimteenih tanin; Yallih nicmaako lel terheerhiinih tanin.

⁵ Nanu laakin ninneh, Ufaye araxah, tamaa atxaqqaqhti caghi imaanah hambereeroolih ilaalak nane.

⁶ Masiix kin Yeesusudde lel kaxani araxah yakhdume imaan bisa kibah, askok-kalum abaanam yakko askok-kalum abe wayaanam walaa inkimidde miloyyimta.

⁷ Atin meceetih arduk tinin. Rumma taabbiinimko sin dessem miya kinni?

⁸ Ta gina le ashshaman tamaa sinah deecima kaako maki.

⁹ “Dago ayci cagun kaamilik kinni mulxusam.”

¹⁰ Tayimko barhsimte mablo taalloona makitiinimih Maddaradde imaan liyo. Sin gobbishak yaneti lel, farhe tiya yekkeh, yanqatstsaco kinni.

¹¹ Laakin, yi saculo, anu kaddih askok-kalum zacabah warroyshak anniyeedo, aymih kaddik haddaanimak aniyo? Amayim takkeedo, tamaa masqal andafo ticrhiyeh anniye dhadhdhe.

¹² Tamaa sin gobbisha mari inkinnah sinne xaragaanam farhe dhaarhe!

¹³ Yi saculo, atin finja-le mara takkoona kinni sinah deecimeenim. Sinni finja xazottat caashirih matnaafacinantaaki, kaxani araxah sittiya ukhduma.

¹⁴ Amayim lel umbuka sercat: “Ishi zoobatto ishe balih ikxin” tarhxe inki waanittadde yikmileh yanemhi sabbatah kinni.

¹⁵ Sinne-sinneh sittiyadde arak sittiya bodayteenih, sittiya baktanki selita.

Ufayi daribille kataanta

¹⁶ Anu laakin, “Ufayeh gerhanta, xazottat farhi lel abtoona makitiini” sinak arhxe.

¹⁷ Xazottat farhi Ufayi farhih didde kinni, Ufayi farhi lel xazottat farhiilih didde kinni. Tayim sittiyahi didde kinon. Amaydo, tamaa fadhdhaanam abtoona mirhictaana.

¹⁸ Atin Ufayeh timmirrixiinimko laakin, sercat geridde mitaniini.

¹⁹ Kado, xazottat ciyyo tumbulluwem kinni. Amayim lel: uma-xibar, bacaalagino, kushma,

²⁰ asnaamah yacbudiinim, shirxe, nacabo, ankaaxad, ashshiino, kura, xarasa, sitta-waa, babbarhishnan,

²¹ qina, sakar, cibdaan kee amah iggidam kinni. Tamaa ookomeh akah sin asuuseekah, ta gina lem aba mari Yallih nigsinna yawrashoona makinoonim kado gantah sin asuusak aniyo.

²² Laakin Ufayi daro kaxano, xeden, salaam, sabre, xiyaawinna, mecaani, amaana,

²³ mece-mariino, sinne-yabbirhiinim kinni. Tayimhi didde kin sercat lel miyane.

²⁴ Tamaa Masiix kin Yeesus mari lel, tamaa xazotta tee farhi kee duumeelih masqalak takareenih yanin.

²⁵ Ufayeh marnah yekkemko, gantah Ufayi daribille kataynoo.

²⁶ Ninne-ninneh sittiya kurrayishak, sittiyaalih ashshiinak, amaa ginah falite waynoo.