Galaatiya 4 - Saaho Cusub Cahde

Cindham kee yawrishe mara

¹ Tayim akah arhxem, ta waarish cindhooka kuuk, ummannimhi wanna kinni hanuk, garuzzaako barhsa male.

² Kaa abba abayshe lellec gufandah, dhawrhen kee baclaysheenitti geridde yane.

³ Amayim balih nanu gantah, cindham kuuk nine gedda, ta caalam yagziye ufayit hi garuuza kuuk nine.

⁴ Amaa yikmile waqhti gufe gedda laakin, Yalli ishi Barha fare, usuk numaako yooboke, sercat geridde yooboke.

⁵ Tayim akah abem lel tamaa sercat geridde yane marah wazo yakko, nanu lel Yallih cindham nakko ciloh kinni.

⁶ Atin cindham kitiinimhi sabbatah: “Abba! Wobba!” arhxuk Yalli ishi Barhahi Ufaye ni afcaadodde dhirhiyeh yane.

⁷ Amaydo, atu kamboh garuzza makitooki, barha kito; barha tekkemko lel Yallih araxah waarish kito.

Bawlos Galaatiyaati xiyawah yamsheeqhele

⁸ Basoh, Yalla aarhige wayak tinin gedda, tamaa thabiicaako yallit akkinnixemhi garuuza kuuk tinin.

⁹ Kado laakin, Yalla teerhegiinih tanin, hido lel Yallah yimidhdhigeh yane marak, aaginah kinni tamaa rukut amficinnixe caalam yagziye ufayitille gaxtaanam? Gaxteenih ten garuuza takkoona farhak taniini?

¹⁰ Atin lelleeca kee alsit kee iggidi-waqhtit kee iggidit taynabin!

¹¹ Anu sinah arhxiyuk abe tanto foyya takkemko mashshiiteh aniyo.

¹² Yi saculo, tamaa anu sinah akah immingideekah, atin gantah yottah tammangadoona sin dhaacimak aniyo. Yottak walaa inkim yok maabitiini.

¹³ Anu erherhih mece ware sinalle warroyshem, laxuutemhi sabbatah kuuk yinem taarhigin.

¹⁴ Yakko kibah, tamaa yi laxuu sinah cakana kuuk yine, atin lel yi maynafnafitiini, yi miilaacitiiniiki, Yallih malaykatto balih, Masiix kin Yeesus balih yi kabbatten!

¹⁵ Amaa sin xeden awlalle yedee? Takko dhictam kuuk tineh takkeedo, sin intit gantah teyyeeciinih yoh axaye dhadhdheenimih inneh sinah ashhide!

¹⁶ Hido, anu rumma sinah warisheh sin cange ekkeh anniyeho?

¹⁷ Amaa mari sinadde macal abiteenih yanin, laakin mecaanih maki. Atin tenadde macal abittoona ciloh nottaako sin barhishoona farheenih yanin.

¹⁸ Mecaanih bisa yakko kibah, xiyaadde macal abitaanam mecem kinni, tayim laakin anu sinlih aniyuk bisa akkekkah, umman gedda yakko alle tane.

¹⁹ Ko yi cindha cindhaamo, Masiix sinadde yanabendah, tamaa dhacuma umlaalo balih malammih sinah waaxelsiitak aniyo!

²⁰ Sinlih akah waanishaakah asqayyaro ciloh, kado sinlih anniyeedo amce dhadhdhe. Tayim lel sin zacabah emsheeqheleh aniyomhi sabbatah kinni.

Haagar kee Saarah misaal

²¹ Sercat geridde marno farha marak, atin sercat mitaabbiinih kinniho?

²² Tamaa akah tunkuttubeh taneekah, Abraahim lamma barha luuk yine, wuli tiya garuzzö kin numaako, wuli tiya lel finja-lë numaako kuuk yinin.

²³ Amaa garuzzat barhi xazottat araxah yooboke, tamaa finja-let barhi laakin wacdi araxah yooboke.

²⁴ Tayim misaal kinni: ta sayyo lamma cahde kinon. Inketta Siinaati koomaako tekkeh, garuuzinnah cindham dhalta; ishi lel Haagaar kinni.

²⁵ Kado Haagaar, Carabti baarholle tane Siinaati kooma kinni; ishi cindhamlih garuuzinnadde tanemhi sabbatah lel kaafit Yerusaalem taymissile.

²⁶ Agana tane Yerusaalem laakin finja-lë kinni, ishi lel ni ina kinni.

²⁷ Amayim lel “Dhalinnixe gedmeyo, xeden; dhalaa ablinnixe tiyak lel cililish! Tamaa bacla le tiyaako zibodde racte tiyahi cindham mangon” yarhxiinim tunkuttubeh tane.

²⁸ Kado, yi saculo, Isxaaq balih, wacdi cindham kino.

²⁹ Laakin tamaa amaa gedda xazottat araxah yooboketi, Ufayi araxah yooboke tiya akah hadaneekah, kado gantah amayim kinni.

³⁰ Laakin Kutuub ayim yarhxe? “Garuzza kin numah barhi finja-le numah barhaalih miyawrishemhi sabbatah, amaa garuzza kin numa kee tee barha hadan” yarhxe.

³¹ Amaydo, yi saculo, nanu finja-le numah cindham kinonkah garuzzat cindham makino.