Galaatiya 2 - Saaho Cusub Cahde

Bawlos fartottitih kabbaatime

¹ Affaran kee taman iggidiyak sarrah Barnabaslih, Tiitos inneelih beyeh Yerusaalem fanah ewce.

² Aganalle ewcem waxyi sabbatah kinni. Tamaa Aki-maralle warroyshak iniyo mece ware, tamaa naba marah ulah akah warishem, foyyak arduk anniyemko hido lel foyyak erdeh anniyemko ciloh kinni.

³ Laakin yottaalih yine Tiitos gantah, Giriik barha kuuk yine hanuk, askok-kalum abo manqassabinna.

⁴ Yakko kibah, nanu Masiix kin Yeesusudde lino finja idhdhiteenih garuuza nok aboona ciloh, tamaa zirabti sacul, xololeenih ni fanadde oroben.

⁵ Mece warehi rummi sinah dhawrhumo ciloh, tenah walaa inki gedda akah mangazzayinnino.

⁶ Tamaa xiyaw adde takkale mari — usun miya kinoonimidde anu macal maliyo; Yalli lel feraako fera dhaye maleya — yi fartodde walaa inkim adde moosinnooni.

⁷ Sarreh, tamaa Bithroos askok kalum abe marah mece ware warroysho amaana kaalle akah tomxoyekah, anu lel askok kalum abinnixe marah mece ware warroysho amaana yoh tomxoyeh tanem yublin.

⁸ Askok kalum abe marah fartotta yakko Bithroos araxah yushtuqhuleti, anu gantah Aki-marah fartotta akko yi araxah yushtuqhuleh yane.

⁹ Tamaa camid balih kin Yacqoob, Keefa kee Yohannis lel, tamaa yoh tomxoyeh tine nicma yublin gedda, Barnabas kee yottaalih zooba yekkiinimih mizgi gaba zoobiniya nolle yoxoyin. Nanu Aki-mara fanah nadawo, usun lel tamaa askok kalum abe mara fanah yadawna gaba benne.

¹⁰ Baaxentit xunsusno bisa ni esseren, tayim lel anu inneh abo akah hambereeram kinni.

Bawlos kee Bithroos sittiya wayen

¹¹ Keefa Anthaakiyalle yemeete gedda, yoshshoomeh yineyaako caddalsimo kaalle tinemhi sabbatah, nif kee nifih kaa eqheeweme.

¹² Amayim lel wuli xiyaw Yacqoobko farritimeenih yamiitiinimko basolle, usuk amaa Aki-maraalih beetak yine; usun yemeetin gedda laakin, “amaa askok-kalum yakkoo” yarhxe maraako mashshiiteyaako tenko barhsime.

¹³ Barnabas gantah ten nifaaqhah yamlalawo ciloh, amaa racte Yahuud gantah nifaaqhah kaalih tanemih yimmingidin.

¹⁴ Anu laakin ten abitto tamaa mece warehi rummih araxalle tanem makinam uble gedda, umbuka tenhi nifille Keefak: “Atu, Yahuuddo kito hanuk, Yahuuddo balih akkekkah, Aki-marahi tiya balih tekkeh kinni marak tanitom. Aki-mari Yahuud balih yekkiinih maroona aaginah ten qasbishak tanito?” akko erhxe.

Imaanah yatxiqqiqhiinim

¹⁵ Nanu ninneh ubaakeeko Yahuud kinni kinom kibah, too Aki-mara balih “zambe-lem” makino.

¹⁶ Yakko kibah, xiyawti Yeesus Masiixidde leya imaanah kibah sercat yarhxem abeh miyatxiqqiqhem naarhige. Sercat yarhxem abeyaako walaa inketti yatxaqqaqho makinamhi sabbatah, nanu lel sercat yarhxem abneh akkekkah Masiixih neemeneh natxaqqaqho ciloh Masiix kin Yeesusuh neemene.

¹⁷ Laakin, nanu Masiix araxah natxaqqaqho wagiinemko, ninneh gantah zambi-wannun kiinuk, amaydo, Masiix zambedde xiyaa sayisha tiya kinniho? Maale haye!

¹⁸ Anu dumuseh iniyom malammih ginemko, inneh sercat yagdile tiya kiyom innelle aysibituk ane.

¹⁹ Yallih farhi balih maro ciloh, sercat araxah sercatadde rabeh aniyo.

²⁰ Anu Masiixlih masqalakke takarimeh rabeh aniyo. Masiix kinni yottadde marak yaneti kibah, kamboh yotta maki marak yaneti. Anu ta kado xazottaalih akah marak aniyom lel, tamaa yi kixinah, yottah arhxuk ishe yoxoye Yallih Barhah eemeneh kinni marak aniyom.

²¹ Anu Yallih nicmak foyya akko maaba, amayim lel xaqqi sercat araxah yamiiteh yekkemko, amaydo Masiix foyyah kinni rabem.