Galaatiya 1 - Saaho Cusub Cahde

Salaamta

¹ Xiyawko hido xiyaw araxah akkekkah, Yeesus Masiix kee tamaa rabaako kaa uguse Abba kin Yallahi araxah fartotta yekke Bawlos

² kee inkoh yottaalih tane saculko, Galaatiyalle yane kanaayis fanah:

³ Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

⁴ Ni Maddari, ta kado yane uma waqhteeko ni yeyyeece ni Yalla kee ni Abbahi farhih, ni zambeh arhxuk ishe yoxoye.

⁵ Kayyah lel umman gedda kee umman gedih nabne takkoo. Amin.

Aki mece wari miyane

⁶ Tamaa Masiix nicmahi araxah sinah deecime tiya, tayidhdha dheh xabak taniinim kee aki mece warelle afkunuk taniinim cibra yolle tekkih tane.

⁷ Tayim laakin, xiyawko gari Masiix mece ware sawaloona farheenih kinni sin gobbishak yaniinim kibah, aki mece wari yaneh maki.

⁸ Laakin, walaa notta yakko, carsheeko malaykatti ta nanu sinalle warroyishne mece wareeko barhsimtem sinalle warroyshemko, abaaro-le yakkoo.

⁹ Tamaa awwalah akah nerhxeekah, kado malammih arhxiyuk ane: akkinnanti tamaa atin kabbatten mece wareeko barhsime tiya sinalle warroyshemko, abaaro-le yakkoo.

¹⁰ Anu xiyaw cawat wagiyak aniyo woole Yallih cawata? Hido lel xiyaw xedenisho farhak aniyo? Anu kaddih xiyaw xedenisho farhak anniyeedo, Masiix garuzzo akke mirhaarhiyo.

Bawlosuh Yalli akah deecima

¹¹ Yi saculo, tamaa anu sinalle warroyshe mece wari, xiyawko makinam taarhagoona farha.

¹² Yeesus Masiix waxyehi araxah kinni kabbaatem kibah, xiyawko mikabbaatiyo, xiyawko lel milabcaadiyo.

¹³ Basoh Yahuud diin katayak ine gedda, Yallih kaniisa mangum uma ginah hadanak inem kee, aylawo icikkineh inem toobbiinih tanin.

¹⁴ Amaa Yahuud diinille lel yi xiyawadde mango yi barmaleeko ashshiyuk ine, inni abbubhi caydalle lel mango qeera luuk ine.

¹⁵ Yalli inni inahi garbadde aniyuk yi dooreh, ishi nicmah yoh deecimeh,

¹⁶ Aki-marahi addadde kaa zacabah mece ware warroysho ciloh, usuk ishi Barha yi yayballaw farhe gedda, anu walaa inkettaalih mizatteyinniyo.

¹⁷ Yi basolle yine fartottit ablo Yerusaalem fanah gantah mawciyooki, Carabti baarho fanah edeeh, sarrah malammih Dimaashqa fanah gaxe.

¹⁸ Adooxa iggidak sarrah lel Keefa gufo Yerusaalem fanah ewceyaako kaalih koonan kee taman lellectiya suge.

¹⁹ Maddari sacal kin Yacqoobko bextih walaa inki fartotta maballiyo.

²⁰ Ta sinalle aktubiyuk anem zirab makinamah Yalli yi shaahid kinni!

²¹ Sarrah Suuriya kee Kilikiya fanah edee.

²² Yahuudiyalle tine Masiix kanaayis laakin nif kee nifih yi aarhiguk miyiniini.

²³ “Tamaa ni hadanak yineti, tamaa wuli gedda yaylawo farhak yine imaanhi zacabah warroyshak yane” arhxuk bisa aabbuk yinin.

²⁴ Usun lel yi sabbatah Yalla yeynebin.