Filmoon 1 - Saaho Cusub Cahde

Salaamta

¹ Masiix kin Yeesusuh arhxuk, maxbuushsha kin Bawlos kee ni sacal kin Timoteyosko, yinkixxine Filmoon nottaalih khidma yangaleya

² kee Abfiya ni sacla kee tamaa nottaalih yane dufla abeena kin Arkhibbos, kee ku caredde takatte kaniisa fanah:

³ Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Filmoon kaxano kee imaan

⁴ Inni dhaacodde kotta xunsuusa gedda, umman gedda inni Yalla xamdishita.

⁵ Amayim lel, Maddara kin Yeesus kee umbuka yinqiddise marah lito kaxano kee imaan aabbemhi sabbatah kinni.

⁶ Tamaa nottaalih tangale imaan araxah, umman mecaani Masiixidde linoya meceetih akah taarhago dhaaco aba.

⁷ Ko yi sacalo, yinqiddise marahi afcaado tuscurufemhi sabbatah, ku kaxanooko mango xeden kee aydukumusnan geyeh aniyo.

Bawlos Oneesimosuh aba dhaacimto

⁸ Amayim balih, Masiix araxah liyo mango fidbeh atu abto missilam ku aamaro dhiica hanuk,

⁹ anu, Bawlos, baarra kiyoyak kado lel Masiix kin Yeesusuh arhxiyuk maxbuushsha kiyoyak, kaxanoh araxah ku dhaacimam doora.

¹⁰ Xabshedde aniyuk abba akko ekke yi barha kin Oneesimosti zacabah ku dhaacimak aniyo.

¹¹ Usuk basoh ku mamfacinna, kado laakin rummah kotta kee yotta inkoh yamfice.

¹² Afcaadooko kixiniyo kayya lel malammih kolle adabbik aniyo.

¹³ Anu mece ware warroyshemhi sabbatah umudhdhuweh aniyuk, ku idhdhadde yekkeh yi yakhdamo inneelih kaa defeysham farhe dhaarhe.

¹⁴ Laakin tamaa ku mecaani, ku farhih kibah xaylah takkemko, ku izne hinnim walaa inkim abo mifarhiyo.

¹⁵ Usuk dago waqhte kok barhsimeh sugem, laabud umman geddah kottaalih maro ciloh kinni.

¹⁶ Usuk kamboh garuzzo balih makiiki, garuzzooko aganalle kinni. Fertoh lel yottah yinkixxine sacal kinni. Kado lel usuk ziyaada kottah xiyawto balih kee Maddari araxah sacal koh kinni.

¹⁷ Amaydo, atu ishi zoobattoh yi tublemko, tamaa yotta akah kabbaate dhadhdheekah kaa kabbat.

¹⁸ Usuk umam kok abemko hido lel cida adde teellemko, yottaako esserit.

¹⁹ Anu Bawlos, tayim inni gabah aktubiyuk ane: Anu koh akfalo kiyo. Anu inneh cida kodde liyomuh waanisham lel yi mifarhshishsha.

²⁰ Yoo, yi sacalo, kottaako Maddari araxah kinni kok aksabo farham. Maddari araxah yi afcaado yoh uscuruf.

²¹ Anu kok arhxiyuk aniyomko ziyaada abto kitom aarhigiyuk, yi taabbemih lel eemeneyaako kolle aktubiyuk aniyo.

²² Amayim balih, sin dhaacohi araxah Yalli sinalle yi baaho cag liyomhi sabbatah, gerhenti care yoh isqirrib.

Abayshimat salaamta

²³ Masiix kin Yeesusuh arhxuk yottaalih xabshedde yane Ebafraas, salaamta koh dhirhiyak yane.

²⁴ Amayim balih, yottaalih khidma yangale Markos, Aristarkhos, Deemaas, Luukas salaamat kok yarhxin.

²⁵ Maddara kin Yeesus Masiix nicma ku ufaylih takkoo.