Filibbi 4 - Saaho Cusub Cahde

¹ Amaydo, anu kixiniyoh, akah saanah, yi xeden kee yi bor kin yi kaxantoolit kin yi saculo, Maddaradde isbita.

Asuuso, aydukumusnan kee dhaaco

² Ewdiya kee Sintike Maddaralle sittiya geyoona ten dhaacimak aniyo.

³ Yoo, rummaahit zoobattok, kotta gantah ta sayyo xatto ku esserak aniyo. Usun Kaleemes kee aki khidma yottaalih yangale marahi migoc aniinat kitaaballe akko yaneya kee yottaalih, agaggaagalle mece ware yukhdume mara kinon.

⁴ Umman gedda Maddaradde xedenanta; malammih arhxo kiyo, xedenanta.

⁵ Sin xiyaawinna umman tiyah tamadhdhagoo. Maddari kab-yerhxeh yane.

⁶ Ummannim salaat kee dhaacoh, xamdeelih, sinni essero Yallalle kab-ishanta kibah, walaa inkimih manshaaqhalina.

⁷ Umbuka fahaamaako aganalle kin Yallih salaam lel, sin afcaado kee sin niya Masiix kin Yeesus araxah dhawrho kinni.

⁸ Abayshimalle, yi saculo, rumma akkinnannim, xishma-lem akkinnannim, xaqqe akkinnannim, tsitstsiyam akkinnannim, win-arhxinnannim, cirhe aallinnannim, ashshinnannim hido fayla akah eeddam tinniyemko, tayimhi sabbatah exeeseba.

⁹ Inkoh yottaako tudrusiinim kee kabbatteenim kee toobbiinim kee tubliinim abanta, maaxiyot Yalli lel sinlih yakko kinni.

Yallih kelo

¹⁰ Dherh waqhtek sarrah, yottah litin xaaliyo gaxteenih tuscussubiinimhi sabbatah, nabaatih Maddaradde xedenak aniyo. Atin rummah yoh xaalitteenih tinin, laakin caashir luuk mitiniini.

¹¹ Tayim arhxe gedda, yi farhshishsham liyoh maki. Amayim lel, farhe gondodde inniyeh liyomuh yalaggiinim labcaadeh aniyomhi sabbatah kinni.

¹² Inkoh xiyaa farhshishsham yaalliinim aarhigeh, xiyaa dhictam yaalliinim aarhige. Umman ginah farhinnan gondodde, xayi kee safradde, geyto kee waytoolih aaginah yadiinimhi sirre labcaadeh aniyo.

¹³ Tamaa yi yaysiriye tiyahi araxah ummannim abo dhiica.

¹⁴ Yi waqhaaqhac yoolih xazziilitteenimih lel mecem abten.

¹⁵ Atin Filibbiiti xiyawak, anu erherhih mece warehi khidmah Makedooniyaako awcuk iniyo gedda, sinko bextih muttuxuwah yakko kabbatnanah, aki kaniisa yottaalih mangalinnam, atin sinneh taarhigin.

¹⁶ Tessaloniikelle aniyuk gantah inkoh lamma gedda, yi farhshiisha xato yoh dhirhiiten.

¹⁷ Anu tamaa sin muttuxuwahi fire sinah tammango erhxeh kibah, sin muttuxuwa farheh maki.

¹⁸ Yi dhictah yooko fertam kabbaateh aniyo. Tamaa Ebafroditosulle farteenim, basak-yarhxe ure leya, Yalla xedenishah kabbaatimta sadaqhaalih, mece sakaye geyeh aniyo.

¹⁹ Yi Yalli ishi nabne le gadda balih, Masiix kin Yeesus araxah sin farhshishsham inkoh sinah yaxaw kinni.

²⁰ Ni Yalla kee ni Abbah lel umman gedda kee umman gedih nabne takkoo. Amin.

Abayshimat salaamta

²¹ Inkoh Masiix kin Yeesusudde tane umbuka yinqiddise marak salaamat akko yoh erhexa. Yottaalih yane sacul salaamat sinak yarhxin.

²² Yinqiddise mari inkoh, fertoh lel Roomaati naba nugus hi rooshanadde yane mari salaamat sinak yarhxin.

²³ Maddara kin Yeesus Masiix nicma sin ufayelih takkoo.