Filibbi 2 - Saaho Cusub Cahde

Masiix amnonobba hin misaal

¹ Amaydo, Masiixlih tekkiinimih sin aydukumussam tinniyemko, kaxanooko ruftoh litiinim tinniyemko, Quddus kin Ufayelih zoobinoh litiinim teelliinimko, winta kee naxrurtah litiinim teelliinimko,

² inki niya, inki kaxano abitteenih, inkidde temseeneynih, inki bursaale teelliinimko yi xeden yoh taskimilin.

³ sinni nafaacah yakko, yi ware-beeh walaa inkim maabina. Sarreh, amnonobba xabteenih, garo sinneeko naballe ibbirhanta.

⁴ Sinko ummanti ishi nafaaca bisa able wayooki, garin nafaaca gantah yabloo.

⁵ Sin niya lel Masiix kin Yeesus luuk yine niya balih takkoo.

⁶ Usuk Yallaalih lem kinni ummannaha, Yallaalih le leemino yabbarho maaxasabo xaylaha.

⁷ Sarreh, xiyawti xibarah yoobokeh, garuzzi thabiica abiteyaako, foyya ishek abe.

⁸ Ishe yuscundhuweh xiyawti barhahi misle yekkeh yemeete, rabi fanah lel inkinnah masqalak rabo Yallih amre yoobbe.

⁹ Amayimhi idhdhah, Yalli umman tiyahi bukalle xaf kaa isheh, umman migacko naba migac lel akah yoxoyeh yane.

¹⁰ Amayim lel, umman gulub inkoh carshe kee baarholle, baarhot geridde yaneya Yeesus migacah gululluubuwo ciloh kinni.

¹¹ Abba kin Yallahi nabneh lel Yeesus Masiix Maddara kinamah, umman anrab yaalamo kinni.

Caalamti ifo yakkiinim

¹² Amaydo, ko yi kaxantoolito, umman gedda akah tim-izziziiniikah, kado gantah, anu sinlih aniyuk bisa akkekkah, fertoh anu sinlih anniye waya gedda, gilix kee arharhoolih sinni garger akah taybulluyniikah ushtuqhula.

¹³ Amayim lel farhi taalloona kee kayyadde basak-tarhxem abtoona ciloh sinadde ashtuqhuluk yaneti Yalla kinamhi sabbatah kinni.

¹⁴ Ummanim lel angoroozomekkah hido ankeexedekkah abanta.

¹⁵ Amaymih, ta kodhdhayti kee temxeleelefe ijohi addadde, cadale hin Yallih cindham barii kinya tekkiinih, ta caalamalle ifo balih ifishshoona kitin.

¹⁶ Amayim lel, anu tamaa Masiix lellec foyyah mardiyom kee foyyah mixawaliyomuh falito ciloh, atin tamaa aniinat waanitta qath-ishsheenih ibbirhanta.

¹⁷ Tamaa sin imaanhi sadaqha kee khidmalle, sadaqhatah omxoyeh macaba balih xarhitaado gantah kixiniyuk umbuka sinlih xedena.

¹⁸ Amayim balih, atin gantah yottaalih xedenteenih cafadanta.

Timoteyos kee Ebafroditos

¹⁹ Anu gantah sin ware geyeyaako niyaato ciloh, Timoteyos dheh sin fanah dhirhiyo, Maddara kin Yeesusudde cag liyo.

²⁰ Amayim lel, rummah sin mecaanih kayya balih xaalita tiya maliyomhi sabbatah kinni.

²¹ Amayim lel, inkoh sinnimhi nafaaca kinni wagiyaanam kibah, Yeesus Masiixim makinamhi sabbatah kinni.

²² Timoteyos laakin barhi ishi abba akah yaabbeekah, yottaalih yekkeh mece ware yukhdumeyaako, yamfice tiya kinam yuybulluweh yane.

²³ Amaydo, inni gondo ubleh, kayya dheh sinah dhirhiyo cag liyo.

²⁴ Anu lel inneh dago waqhtek sarrah amaato Maddaradde imaan liyo.

²⁵ Yi sacal, yottaalih khidma yangale yi zoobatto kee yottaalih yane dufla abeena kin Ebafroditos, sinalle dhirhiyo exeesebeh aniyo. Usuk yi farhshishsham yi xato atin farten tiya kinni.

²⁶ Usuk inkoh sin yablo mangum sinah hambereereh yane, kaa laxuu toobbiinim yeerhegemhi sabbatah lel xazzanoyeh yane.

²⁷ Rummah lel laxuuteh, rabo kab-yerhxeh yine. Laakin Yalli alle raxmate, xazan xazan bukalle yodde osamko ciloh lel, yottah gantah kibah kayyah bisa maki raxmatem.

²⁸ Amaydo, malammih kaa tablin gedda xedentoona ciloh, yi shaqhla lel daggoyto ciloh, dheh kaa dhirhiyo farheh aniyo.

²⁹ Amaydo, Maddari migacalle umbuka xedenlih kaa kabbata, ta gina-le mara lel xishmatanta.

³⁰ Atin yottah abtan khidmadde sinko ractem yaskamalo ciloh, Masiix ciyyoh arhxuk ishi aniina tillaabisheh rabo farheh yine.