Filibbi 1 - Saaho Cusub Cahde

Salaamta

¹ Masiix kin Yeesus garuuza kin Bawlos kee Timoteyosko, tamaa Masiix kin Yeesus araxah yinqiddise mari sinni kaniisat bukalle macalso aba mara kee kaniisadde yakhdume mara Filibbille taneya fanah:

² Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Xamdishitnan kee dhaaco

³ Umman gedda sina xunsuusah inni Yalla xamdishita,

⁴ umman gedda inkoh anu sinah abinnan umman dhaaco xedenak kinni abam.

⁵ Amayim lel, erherhaako kado fanah atin mece warehi warroyishnanadde litin gabat aglehi sabbatah kinni.

⁶ Tamaa sinadde mece abitto erherhisheti aykee Yeesus Masiix lellec fanah abaysho kinamah thummut kiyo.

⁷ Atin inkoh yi afcaadodde taniinimhi sabbatah, umbuka sinah axeesebem rumma kinni. Amayim lel umudhdhuweh iniyo gedda kee mece wareh deeso kee aysabat abak iniyo gedda, atin inkoh ta nicmadde yottaalih gaba tessegelliinih tanin.

⁸ Masiix kin Yeesus kaxanoolih inkoh aaginah sinah saanamah Yalli yi shaahid kinni.

⁹ Sin kaxani irhga kee umbuka kaslih ziyaada ammanguk yammango dhaaco abak aniyo.

¹⁰ Tayim lel, ummanimko tashshem dooritteenih Masiix lellecih tsitstsiyam kee cadale hin mara tekkiinih sugtenyaako,

¹¹ Yallih nabne kee faylah, tamaa Yeesus Masiix araxah geytimta xaqqi daroh temmeegiinih sugtoona ciloh kinni.

Mece warehi amfaddag

¹² Yi saculo, tamaa yottalle tekkem, rummah mece warehi amfaddagah timficeh tanem taarhagoona sinak farha.

¹³ Amaymih, anu Masiixih arhxiyuk umudhdhuweh aniyom, tamaa umbuka naba nugus dhawudhdha caskar kee umbuka aki raace marah timidhdhigeh tane.

¹⁴ Tamaa saculko mango mari lel, yi madhdhuwah Maddaradde imaan abiteenimhi sabbatah, ziyaada fidbeelih mashshi hinnim Yallih waanitta waanishak yanin.

¹⁵ Gari rummah ashshiino kee xarasa, gari lel mece farhih Masiix warroyshak yanin.

¹⁶ Sarrat mari, anu mece warehi deesoh tadde gaxeh aniyom yeerhegiinih, kaxanooko abaanam kinni.

¹⁷ Tamaa afti mari laakin, madhdhuwi bukadde yi biyaakoona loonim yekkeliinih, rummah akkekkah sinni nabsih kaxanoh Masiix warroyshak yanin.

¹⁸ Aymi haye? Zirabah yekkeh, rummah yekkeh, farhe ginah Masiix warreyak yane, anu lel amaymih xedena. Yoo, xedeno kiyo,

Aniina Masiix kinni

¹⁹ amayim lel, tayim sin dhaaco kee Yeesus Masiix Ufayehi xatoh, yi muucah yakko kinam aarhige.

²⁰ Tayim yi naba ilalta kee yi cag kinniyaako, farhemih xoolashshiito makiyo. Kado gantah umman gedda balih, mango fidbeelih, hido aniinah, hido lel rabih, Masiix yi nabsedde yanabo kinni.

²¹ Amayim lel yottah aniina Masiix kinni, rabaanam lel maksab kinni.

²² Anu xazottaalih maro ekkemko, fire-le ciyyo liyo yaanam kinni. Awlihim dooram laakin maarhige.

²³ Ta lamma gondohi fanadde inqirqireh aniyo. Fertoh meceetih yoh tashshem kinamhi sabbatah, yi farhi yadiinih Masiixlih yakkiinim kinni.

²⁴ Laakin anu wafaalih anniyem fertoh sina farhshishsham kinni.

²⁵ Tayimih thummut ekkeh lel, atin imaanah tanaboona kee xedentoona, wafaalih inniyeh sinlih akko kiyom, eerhegeh aniyo.

²⁶ Malammih sinalle amiite gedda, yi sabbatah Masiix kin Yeesusudde litin cafad sinah yammango kinni.

²⁷ Sin ablo amiite gedda, hido dherhille aniyuk, inki ufayelle tisbitiinih, mece warehi imaanah inki afcaadoh andufuluk taniinim aabbo ciloh, sin gerhegerh Masiix mece wareh missilam yakkoo.

²⁸ Farhinnannimih lel tamaa sin didde kin maraako mimashshiitina. Tayim tamaa Yallaako kin, tenah liya, sinah laakin gargerti cado ishaara kinni.

²⁹ Tamaa sinah tomxoyeh tane nicma lel, kayyah taamanoona bisa akkekkah, Masiixih arhxitin gantah waaxelsittoona kinni.

³⁰ Tamaa yottaalih tublin, kado lel yottaalih tanem akko taabbin inki gixlodde nanino.