Fartottit hi Abittot 3 - Saaho Cusub Cahde

Yumunkuse caageeni ure

¹ Taykinna, Bithroos kee Yohannis salaat saaca kin kasit saaca adoxuh maqhdas care fanah aganalle awcuk yinin.

² Wuli yoobokemko taahe yumunkuse xiyawti yine. Tamaa maqhdas caredde oroba mari dhagso akah yaxawna ciloh maaxi yamaato yaaqhuciinih, “Carha mece Caraf” akko yarhxinille kaa hayak yinin.

³ Bithroos kee Yohannis maqhdas caredde oroboona farhak ten yubleyaako dhagso akah yaxawna ten dhaacime.

⁴ Bithroos Yohannislih yekkeh: “Kulux nodde erhex” akko yerhxe.

⁵ Amaa yumunkuse xiyawti lel wulim tenko kabbaato ilaalak tena macalsiite.

⁶ Bithroos lel: “Anu fidda woole dahab maliyo, laakin liyom koh axaye. Naazret Yeesus hi migacalle daw-erhexaaki gerh!” akko yerhxe.

⁷ Sarrah Bithroos mizgi gabadde kaa yibbirheh kaa uguseyaako akkanih kaa iba kee kaa qulxuntat yitrire.

⁸ Bidig-ishiteh uguteyaako lel gerho erherhisheh tenlih maqhdas caredde orobeyaako, helhel-yerhxeh tirtiirak Yalla faylishite.

⁹ Usuk gerhak kee Yalla faylishitak lel xiyaw inkoh kaa yublin.

¹⁰ Usuk tamaa maqhdas careeko “Carha-mece Caraf” akko yarhxinille defeyah dhagso dhaacimsiitak yine tiya kuuk yinem yeysherheerhegin. Kayyalle tekkemih lel bexsiiteenih cibrah raben.

Bithroos maqhdas caredde abe madare

¹¹ Amaa xiyawti Bithroos kee Yohannisidde yirhibbisheh anuk, xiyaw inkoh mangum cibrah rabeenih “Suleymaan gabala” akko yarhxinikke fanah ten gabolle yerdin.

¹² Bithroos xiyaw madare ashshaabbuk tayim yuble gedda: “Israa-eel xiyawo, tayim cibra aaginah sinalle takke? Aymihi tayim ninni xaylah hido ninni Yallih mashshih gerho kaa dhicshishnem balih nottadde kulux-tarhxiinim?

¹³ Abraahim Yalli, Isxaaq Yalli, Yacqoob Yalli, ni abbubhi Yalli, tamaa atin tosxoynih Bilaatos dhirhiyo abayshe gedda kaa nifille xinten Yeesus ishi khaddaam yeynebeh yane.

¹⁴ Atin laakin Quddus kee Xaqqi-wanna xinteenih nabsi-wanna sinah yawco esserten,

¹⁵ Aniina-yaxaye lel tigdifin. Nanu taymih shohoda kino.

¹⁶ Ta xiyawti, atin tabliinih taarhiginya, Yeesus migacah yeemenem kaa tiytirire. Yeesus araxah yamiite imaan lel kaamil kin caafiyat inkoh sin nifille akah yoxoyeh yane.

¹⁷ Kado yi saculo, sinni reezon balih atin gantah sorhadde abteenim aarhige.

¹⁸ Yalli umbuka nobowahi afah abeyaako kaa Masiix waaxelsiito kinam yookomeh warisheh yinem yiskimile.

¹⁹ Amaydo, sin zambi inkoh sinah cakalo ciloh totoobiinih gaxa.

²⁰ Amayim lel curfen waqhti Maddaraako sinah yamaato kee, yookomeh sinah doore Masiix, Yeesus, sinah dhirhiyo ciloh kinni.

²¹ Yeesus carshelle sugo alle tanem lel Yalli quddus kin ishi nobowah afko dherh muddah waanisheh yine ascassab inkoh yakkendah kinni.

²² Moosa yerhxe: ‘Maddara kin Yalli yotta balih kin nabii sin saculko sinah baaho kinni. Atin lel usuk sinah warishinnannim kaa taabboona kitin.

²³ Ta nabii aabbinnixeti lel nabaatih xiyawko yawco kinni.’

²⁴ Inkoh nabii Saamiyeel kee kaa sarralle temeete nobowa inkoh ta zabanhi zacabah waanisheenih yinin.

²⁵ Atin nobowat zara kee sin abbublih abe cahdehi dhaylo kitin. Yalli Abraahimik: ‘Ku zarahi araxah umbuka caalamti diika baraka geyto kinni akko yerhxe.’

²⁶ Sin umaaniiko sin yedebbeh sinadde yabaarako ciloh Yalli ishi khaddaam uguseh sinalle dhirhiye” akko yerhxe.