Fartottit hi Abittot 2 - Saaho Cusub Cahde

Quddus kin Ufaye hi mumut

¹ Bentheqostheeti cid yekke gedda, usun inkoh inki caralle yinin.

² Gar-heeko wuli dhacuma xaaxattah iggid dhaw caranko yemeeteyaako usun adde defeyak yinin care inkoh emeg-ishe.

³ Anrub gira balih akah yumbulluweyaako xazxaazimeh umman tenak defeye.

⁴ Usun lel inkoh Quddus kin Ufayeh yemmeeginyaako Ufayi akah ten dhicshiisheekah aki afofuh waanishoona erherhishen.

⁵ Umbuka caalamti garballe geytima dowalko Yalla mashshitta Yahuud lel Yerusaalemille yemeetiinih yinin.

⁶ Ta dhaw yekke gedda lel mango xiyaw inkidde yemeetiinih, ummanti tenko ishi waanih waanishak ten yoobbiinimhi sabbatah yarhxiinim sorhen.

⁷ Nabaatih bexsiiteenih cibrah rabenyaako tahe yerhxin: “Ta waanishak yane mari inkoh Galiilaako makini kinoonim?

⁸ Aaginah kinni umman tiyak ninni-ninni dik hi waanih waanishak ten aabbuk nanem?

⁹ Nanu Bertiyaati xiyaw, Meedosti xiyaw, Elamiiti xiyaw, Mosobbotaamiyaati xiyaw, Yahuudiyaati xiyaw, Kabbadokiyaati xiyaw, Bontos kee Aasiyaati zoobah xiyaw,

¹⁰ Ferigiyaati xiyaw, Bamfiliyaati xiyaw, Masriiti xiyaw, Kureeneeko kin Liibiyaati wakale kee Roomaako boodimah temeete,

¹¹ Yahuud kee Yahuud diin kabbatte xiyaw inkoh, Kireeteeti xiyaw kee Carab kinon. Ni waanih lel Yalli abe naba ciyyoh zacabah waanishak ten noobbe.”

¹² “Tayim ayim kinni?” sittiyak arhxuk lel cibrah rabeenih akkuk tinem sorhen.

¹³ Aki mari laakin: “Tamari cusub wayni yoocobiinih yiskiriinih kinni yaniinim” arhxuk alle yoosolin.

Bithroos madare

¹⁴ Bithroos laakin amaa inikan kee tamanlih daw-arhxuk, ishi dhaw xaf-isheyaako taginah aalih waanishe: “Yahuudiyaati xiyaw kee inkoh Yerusaalemille martamak, tayim taarhagoona sinalle tanem kinnik, yi waanille cokka alle uxuwa.

¹⁵ Kaddih dhaxiine saaca sagal kinamhi sabbatah atin akah takkaliiniikah ta xiyaw yiskiriinih miyaniini.

¹⁶ Laakin tayim kinni nabii Yoo-eel waanisheh yinem:

¹⁷ ‘Abayshimat lelleecadde tayim takko kinni, yarhxe Yalli: Anu inni Ufaye umman xiyawalle xarho kiyo, sin sayto kee sin dhaylo nabii balih waanishoona kinon, sin gombole mablol yabloona kinon, sin baarrit soono soonitoona kinon.

¹⁸ Inni garuuzalle, inkoh saytiya kee labtiyalle, amaa maxadde inni Ufaye xarho kiyo, usun lel nabii balih warishoona kinon.

¹⁹ Anu agana caranalle bexsishsham, guba baarholle lel cibra kin ishaarar, biilo, gira kee tiki haffa ayballaw kiyo.

²⁰ Tamaa Maddari lellec, carha mece nabaya, yamiitemko basolle ayrotta dattoyto kinni, alsi lel biilolle yambaddalo kinni.

²¹ Sarrah inkoh Maddari migacah deeciminnanti lel gargeerimo kinni.’”

²² “Israa-eel xiyawo, ta waani oobbaanta: Atin sinneh akah taarhigiiniikah, Naazret Yeesus, miyatto kinam Yalli kayyah abeh sin fanadde abe xayla-le abittot, bexsishsham kee ishaararah sin yuybulluweh yane.

²³ Ta awwalko bakitte xagara kee Yalli yookomeh suguse irhgah ta xiyawto atin sercat hin Aki-marahi gabah abteenih masqalakke kaa tinkiinih kaa tisgidifin.

²⁴ Rabi qath-ishsheh kaa tabbarho mirhictamhi sabbatah, Yalli rabit waaxeltaako kaa yeyyeece.

²⁵ Amayim lel kaa zacabah Dawud tahe yerhxeh yinemhi sabbatah kinni: ‘Maddara umman gedda inni nifidde kaa able, usuk yi mizgi gabooko yanemhi sabbatah xumuu-arhxo makiyo.

²⁶ Amaymih yi afcaado xedente, yi anrab lel cililishe, yi xazo lel cagadde marto kinni.

²⁷ Amaymih lel yi rooxe Hadeesadde xabto makito, ku Quddus kinti lel amashmash yablo maki.

²⁸ Atu aniinat arax yi tiyshidhdhigeh tanito, yottaalih tanitomuh lel xedenih yi tamago kito.’

²⁹ Yi saculo, kalxit ni abba kin Dawud rabeh yumuccugem, kaa qabri lel kaafa fanah nottaalih yanem thummut-ekkeh sinlih waanisho dhiica.

³⁰ Amaymih, usuk nabii kuuk yinemhi sabbatah Yalli aalih waanisheh kaako raddamko inketta kaa nugus-kurselle defeysho kinamah akah dhiiwiteh yinem aarhiguk yine.

³¹ Masiix rabaakohi ugut kee kaa nabsi Hadeesadde raaco makinam, amayim balih kaa xazo tamashmasho makinamhi zacabah yookomeh yeerhegeyaako waanisheh yine.

³² Yalli ta Yeesus rabaako uguseh yane, nanu lel tayimhi shohoda inkoh kino.

³³ Kado Yallih mizgaako nabneelih defeyek sarrah, Abbaako lel wacde akah sayeh yine Quddus kin Ufaye kabbaateyaako, atin sinneh abluk kee aabbuk xarheh yane.

^34-35 Dawud isheh carshelle mikorinna hanuk, usuk isheh tahe akko yarhxe: ‘Maddari yi Maddarak, ku nacabtoolitik ku ibih dokka akko koh abandah, yi mizgi gabooko defee’ akko yerhxe.

³⁶ Amaydo, ta atin masqalakke tigdifin Yeesusuk, Yalli inkoh Maddara kee Masiix akko abeh yanem Israa-eel dik inkoh yaarhagoona.”

³⁷ Kado, usun tayim yoobbin gedda, afcaado adde xararteyaako, Bithroos kee aki fartottitik: “Ni saculo, kado ayim abno kino?” akko yerhxin.

³⁸ Bithroos: “Otooba, sin zambi sinah xabbiimo ciloh lel inkoh umman tiyak Yeesus Masiix migacalle inthimmiqha, Quddus kin Ufayehi muttuxuwa lel kabbattoona kitin.

³⁹ Amayim lel ta wacdi inkoh sin cindham kee amaa mirixtalle yane mara, amayim balih Yalli ishelle akah deecima marah kinamhi sabbatah kinni.” akko yerhxe.

⁴⁰ Aki mango waaniilih ten faysheyaako: “Ta kodhdhayti kin ijooko sinne gargera” akko yerhxe.

⁴¹ Amaymih tamaa kaa farto kabbaate mari yinthimmiqhin, adooxa shiix xiyawtiya takkem lel amaa lellecidde adde ositen.

Yeemene marahi zoobino

⁴² Usun lel fartottitti aydaras kee zoobino inkidde katattaak, kinnas gidlo kee assilluuk yisbitiinih yinin.

⁴³ Fartottit mango bexsishsham kee ishaarar abak yinin, umman tenalle lel gilix oobe.

⁴⁴ Inkoh yeemene mari lel inkidde marak yinin, ummannim lel inkidde luuk yinin.

⁴⁵ Usun sinni iraaro kee yabbuxutiinim yeebexiinih amaa solaadi inkoh farhshiisha marah kelak yinin.

⁴⁶ Maaxi yamaato inki afcaadoolih maqhdas care aduuk kee sinni carwadde kinnas agdiluk, xeden kee cado afcaadoolih sinni folo xazziilitak yinin.

⁴⁷ Yalla faylishitak lel umman xiyawko mece kabbat geyak yinin. Tamaa gargeerimtem lel Maddari max-yeenim ten ziyaadishak yine.