Efesos 6 - Saaho Cusub Cahde

Cindham kee dhaltoyya

¹ Ko cindhaamo, tayim eeddam kinnik Maddari araxah sinni dhaltoyya oobbaanta.

² Tatiya kinni afti amri wacdeelih: “Ishi abba kee ishi ina xishmat” yarhxe,

³ “Amayim lel meceetih geyto kee baarholle lel dherh cumre taallo ciloh kinni.”

⁴ Abbubo, sinni cindham Maddari adabe kee fawolih ten carishanta kibah, ten mikurrayshina.

Garuuza kee wannun

⁵ Ko Garuuzawo, sinni maddarit baarhotiya mashshi kee arharhoolih, rummah afcaadooko, Masiixih akah abe dhadhdheeniikah ten oobbaanta.

⁶ Afcaadooko Yallih farhi abak Masiix garuuza balih kibah, xiyaw sinah yabloona, xiyaw xedenisha mara balih makkina.

⁷ Xiyawah akkekkah, Maddara yakhdume mara balih mece farhiilih ukhduma.

⁸ Garuzzo yakko tamaa ishi finja-leti, mecaani abinnanti, Maddaraako casbe kabbaato kinam taarhigin.

⁹ Atin lel maddaritik, mashshish xabteenih, amaa ginah akah abanta. Tamaa carshelle yane sin kee tenhi Maddara babbarhishnan malem taarhigin.

Umbuka Yallih dhibat nuwaa

¹⁰ Abayshimalle, Maddari araxah kaa nabnet xayladde isriya.

¹¹ Ibliis siixo akah dessaanaakah dhictoona ciloh, Yallih dhibat nuwaa inkoh ikkitiya.

¹² Ni dhiba reezon, mas-uuliin, tamaa dite kin kaafit caalam yagziye mara kee tamaa carshi makaanonulle geytima uma ufayitlih kibah, xazottat kee biiloolih maki.

¹³ Amaydo, tamaa uma max deeso dhictoona kee ummanim abteenik sarrah daw-tarhxoona ciloh inkoh Yallih dhibat nuwaa ikkitiya.

¹⁴ Amaydo, rummi mooreena mooritteenih, xaqqi dirce tikkitiinih daw-erhexa.

¹⁵ Tamaa salaam mece wari yaxaye anqaraarab lel sinni ibadde kabel balih hashshitanta.

¹⁶ Umbuka tayimhi gondodde lel tamaa uma tiyahi bololta lillig-ishaara akah badishshoona dhictan imaan goobe uqhuca.

¹⁷ Birti qoobic gargertiya hashshitteenih, Yallih waanitta kin Ufayi sef ibbirha.

¹⁸ Ummanimih salaat kee dhaacoh, umman gedda Ufayeh issilliya. Tayimlih lel, curtayyoolih himma-abitteenih umbuka yinqiddise marah dhaaco akah abanta.

¹⁹ Anu waanisha gedda, tamaa mece warehi mashthir fidbeelih warisho ciloh, yottah gantah waani yoh tamaato dhaaco yoh abanta.

²⁰ Amayim lel anu mece wareh arhxiyuk madhdhuwadde yane wakiil kiyomhi sabbatah, tamaa akah yoh eeddaakah fidbeelih waanisho ciloh dhaaco abanta.

Abayshimat salaamta

²¹ Kado lel aaginah aniyom kee ayim abak aniyom taarhagoona ciloh, tamaa kixiniyo sacal, Tikhikos, Maddari ciyyodde umun kin khaddaam, ummannim sinah warisho kinni.

²² Sinalle kaa farak aniyom lel nanu akah naneekah taarhagoona kee afcaado sinah aydukumuso ciloh kinni.

²³ Salaam kee kaxano imaanlih, ni Abba kin Yalla kee Maddara kin Yeesus Masiixko tamaa ni saculuh yakkoo.

²⁴ Tamaa ni Maddara kin Yeesus Masiix alayinnixe kaxanoh yakxine mari lel inkoh nicma geyoonaa.