Efesos 5 - Saaho Cusub Cahde

Kaxanodde gerhanta

¹ Amaydo, yinkixxine cindham balih, Yallih misaal kataa mara tika.

² Tamaa Masiix ni yikxineyaako mece ure kee beezza yekkeh nottah arhxuk Yallah ishe akah yoxoyekah, atin kaxanodde gerhanta.

³ Yinqiddise marahi fanadde takko missilam makiiki, uma-xibar, umbuka xaraame hido hirfe sin fanadde xussuume waytoo.

⁴ Yallahi xamde kibah, xoola hido caybe, gudac kin waani eedinnixeya sin fanadde anniye waytoo.

⁵ Uma-xibarli, xaraame kinam abati, hido hirfe leti asnaamah yacbude tiya balih kinya, Masiix kee Yallih nigsinnadde miiraas maleyamah thummut takkoona kitin.

⁶ Tayimhi sabbatah tamaa Yallahi kura kaa aabbinnixe marahi dhaylolle obtamhi sabbatah, foyya kin waanih walaa inketti sin doolabe wayo.

⁷ Amaydo, tenlih zooba makkina;

⁸ amayim lel wuli gedda dite kuuk tinin, kado laakin Maddari araxah ifo tekkiinih tanin. Ifi cindham balih lel gerhanta.

⁹ Amayim lel, ifi fire umbuka mecaani, xaqqe kee rummadde geytimtamhi sabbatah kinni.

¹⁰ Maddara xedenishsham ayim kinam taarhagoona icikkina.

¹¹ Fire hin ditet ciyyodde gaba aalih tassagalliinim hidhdhah, ten iyfiddixa.

¹² Amayim lel, usun suctodde abaanamadde adde waanishaanam gantah xoola kinni.

¹³ Ummanim ifoh timfiddixemko laakin, caddoyta.

¹⁴ Amayim lel, tamaa caddoyinnannim ifo kinamhi sabbatah kinni. Amaydo, yarhxe haye: “Ko dhiineenawo, imbidaaki, rabaako ugut, Masiix lel kolle ifisho kinni.”

¹⁵ Aaginah gedhdhaanam lel kas hin mara balih akkekkah, kas-le mara balih xeelaatih ubula.

¹⁶ Amayim lel ta waqhti uma-tiya kinamhi sabbatah, sinni waqhte sinni nafaacadde ashishanta.

¹⁷ Amaydo, duudit makkinantaaki, Maddari farhi ayim kinam irhiga.

¹⁸ Fasaadadde xiyaa ciddam kinamhi sabbatah, waynidde maskarinantaaki, Quddus kin Ufayeh emmeganta.

¹⁹ Tayim lel mazmuur kee faylat qanna kee nazme, margadde kee afeena sinni afcaadooko Maddarah abak sittiyaalih lel waanishak,

²⁰ Abba kin Yallah, ummannimih, umman gedda ni Maddara kin Yeesus Masiix migacalle lel xamdishitak,

²¹ Masiixih litin mashshih lel sittiyah am-izzizuk abanta.

Sayyo kee baacil

²² Ko sayyo, Maddarah akah tam-izziziiniika balih, sinni baacilih im-izzizanta.

²³ Tamaa Masiix kaniisat amo akah kinniikah, bacli lel numat amo kinni. Masiix lel tamaa kaa nabse kin kaniisahi Gargeereena kinni.

²⁴ Kado, tamaa kaniisa Masiixih akah tam-izzizeekah, amayim balih sayyo ummanimih sinni baacilih yam-azzazoona.

²⁵ Ko baacilo, tamaa Masiix kaniisa akah kixinaakah, teyah arhxuk lel ishe akah yoxoyekah, atin gantah sinni sayyo ikxina.

²⁶ Amayim lel, ishi waanittah layet cakalso akko abeyaako yiythihireh, tee yayqaddaso ciloh;

²⁷ baro, leffac, hido lel amaymih iggidam hin, tinqiddise abar hin naba kaniisa ishi nifille soolisho ciloh kinni.

²⁸ Amayim balih lel, baacilik sinni sayyo sinni nabse balih ten ikxinanta. Ishe kixinti, ishi numa kixina.

²⁹ Tamaa Masiix kaniisah akah abaaka balih, xiyawti ishi nabse bettiishah baclayshankah, ishi nabse nicib tiyah walaa inketti miyane.

³⁰ Amayim lel, nanu kaa nabsehi karim kinomhi sabbatah kinni.

³¹ “Amaydo, xiyawti ishi abba kee ishi ina xabah ishi numaalih inketta yakke, lammik lel inki xazotta yakkin.”

³² Ta mashthir naba tiya kinni; anu tayim Masiix kee kaniisa tablem kinamah arhxuk aniyo.

³³ Yakko kibah, sinko ummanti ishi numa ishe balih yakxanoo, numa lel ishi bacla xishmattoo.