Efesos 4 - Saaho Cusub Cahde

Inkiino Masiix nabsedde

¹ Amaydo, anu Maddari sabbatah maxbuushsha kiyoyak, tamaa akah sinah deecimen deecoh idhdha tekkiinih gedhdhoona sin dhaacima.

² Tayim lel umbuka amnonobbi wayto kee mece-mariinoolih, curtayyoolih kaxanodde sittiya dhiica mara takkiinih abanta.

³ Tamaa Ufayi inkiino lel salaam madhdhuwah tibbirhiinih dhawudhdhoona xawalanta.

⁴ Tamaa sin deecoh tiyä kin inki cagalle akah sinah deecimeeniikah, inki nabse kee inki Ufaye kinni tanem.

⁵ Inki Maddara, inki imaan, inki anthammaq,

⁶ amayim balih, umman tiyahi buka, umman tiyahi araxah, umman tiyadde, umman tiyahi Abba kin inki Yalli yane.

⁷ Tamaa Masiix muttuxuwahi qiyaas balih laakin nicma nottaako umman tiyah tomxoye.

⁸ Amaydo tahe yarhxe: “Usuk aganalle kore gedda, mango maxaabuush isheelih beye, xiyawah lel mango muttuxuwa yoxoye.”

⁹ “Aganalle kore” yarhxiinim, guba baarholle gantah oobeh yinemhi macnaako bextih ayim yakko dhiica?

¹⁰ Tamaa guballe oobeh yineti ummannim yaskamalo ciloh, carshi bukalle koreti kayya kinni.

¹¹ Usuk garoh fartottit, nobowa, mece warroyishsham, kaniisat zan abtam, garoh lel mudarrisiin muttuxuwa akah yoxoye.

¹² Amayim lel, tamaa yinqiddise mari yikkitiinyaako sinni khidma abeenih Masiix nabse carishoona ciloh kinni.

¹³ Nanu lel inkoh imaanah tiya nekkeh, Yallih Barha neerhegeh hamme-le labha nekkeyaako, Masiix migehi qiyaas gufnandah kinni.

¹⁴ Amayim lel, xiyaw siixo kee cijaajinnat araxah doolabimneh, geyinnan mazhabhi xaaxattah, irro balih tuula tawlal goomadhdheh duffuume malino.

¹⁵ Amayim akkekkah, tamaa kaxanodde rumma waanishneh, ummanimih, kayyadde, tamaa amo kin Masiixidde carsimno nolle tane.

¹⁶ Kayyadde, amaa nabsi inkoh, tamaa akah tomxoye umman mayrhabbashah sittiyadde akah yendhebeebesheh yaneekah, umman karima araxah takhdume gedda, kaxanoh yanabeh ishe carisha.

Cusub aniina

¹⁷ Amaydo, atin kamboh tamaa Aki-mara balih amficinnixe sinni niyah tadawna sinalle mitanem, sinah warishah Maddarah lel ashhidiyuk ane.

¹⁸ Usun tamaa tirir ten afcaadohi sabbatah kee tenadde tane sorhahi sabbatah ten fahmi dattoweh, Yallih aniinaako yicrhiinih yanin.

¹⁹ Usun yidinzizinyaako, bacaalagino kee umbukaahimhi hirfeelih cibdaan abaanamah sinne yoxoynih yanin.

²⁰ Atin laakin Masiix zacabah ta gina lem maki labcaddeenim.

²¹ Rummah kaa zacabah toobbiinih tekkiinimko, Yeesusudde yane rummahi araxah lel tudrusiinih tekkiinimko,

²² tamaa basoh akah marak tinin, uma araxalle xiyaa beyta farhih masxite sinni nabse asac-ishanta.

²³ Ufayeh lel sinni niya tuscussubiinih,

²⁴ Yallih misleh rummaahit xaqqe kee anqaddasah yunkhulluqhe cusub nabse saritanta.

²⁵ Amaydo, nanu inki nabsehi karim kinomhi sabbatah, sinko ummanti zirab xabeyaako, ishi zoobattoolih rumma waanishoo.

²⁶ Kurraanta, laakin zambedde misayna; kuradde anitin ayro sinak antabe waytoo.

²⁷ Ibliisih lel caashir akah maaxayna.

²⁸ Garceena kuuk yineti kamboh garace wayooki, akkinnan hin tiyaalih xaziilitam yaallo ciloh, ishi gabah mece ciyyo abak, yakhdamoo.

²⁹ Sin afufko uma waani awce waytooki, tamaa yaabbe marah nicma taxayeh, amaa waqhtedde akah farhshiisha ginah xiyaa carishsha waani waanishanta.

³⁰ Sin muucahi maxah atin akah tumxuttumiinih tanin Yallih Quddus kin Ufaye masxazanina.

³¹ Umbuka cur-tarhxem kee xurtaame kee kura kee andhax kee dhaw, kee waato, umbuka umaaniilih sinneeko asac-ishanta.

³² Yalli Masiix araxah sinalle akah xabeekah, sinne-sinneh mece mara, naxrurta-le mara tekkiinih, sittiyalle xabanta.