Efesos 2 - Saaho Cusub Cahde

Nicma imaan araxah

¹ Atin sinni uma ciyyo kee zambedde rabteenih tinin.

² Wuli gedda lel ta caalam kee tamaa cashshabti nigsinnah reezanti sarralle gerhak tinin. Usuk tamaa kado Yalla aabbinnixe maradde akhdumuk yane ufaye kinni.

³ Nanu gantah tena balih inkoh ninni xazottahi duume abnak, ninni nabse kee niyat farhi balih marak nine. Beexin mara balih lel kurat cindham kuuk nine.

⁴ Laakin raxmah gaddaale kin Yalli, tamaa akah ni yikxine naba kaxanohi sabbatah,

⁵ nanu ninni uma ciyyoh rabneh nine hanuk, Masiixlih yane mara nok abe. Atin lel nicmah gargeerimteenih tanin.

⁶ Rabaako kaalih ni uguseh lel isheelih Masiix kin Yeesus araxah carshi makaanonulle ni defeyshe.

⁷ Amayim lel tamaa yamiite waqhtedde, Masiix kin Yeesus araxah noh tomxoye mecaanidde anqeesinnixe kaa nicmah gadda ni yayballaw ciloh kinni.

⁸ Atin lel imaan araxah nicmah gargeerimteenih tanin. Tayim Yallih muttuxuwa kibah sin abitto maki.

⁹ Walaa inketti falitamko lel tayim ciyyoh temeetem maki.

¹⁰ Nanu usuk cijaaje mara kinomhi sabbatah, Yalli yookomeh yisqirribe mece abittot abno ciloh Masiix kin Yeesus araxah ni yukhluqhe.

Masiixidde inketta yakkiinim

¹¹ Amaydo, atin basoh xazottah Aki-mara kuuk yine marak, tamaa askok-kalum abe mari: “Askok-kalum abinnixe mara” yarhxiinih sinah deecimak yiniinim xunsusa. Ten askok-kalum lel xazottadde gabah aben tiya kuuk yine.

¹² Amaa waqhtedde atin Masiixko barhsimteenih tiniinim, Israa-eel xiyawadde loyyiimak mitiniinim kee wacdi cahdeeko gerha kuuk tiniinim, ta caalamalle lel cag hinnim Yalla hin mara kuuk tiniinim xunsusa.

¹³ Kado laakin basoh Masiix kin Yeesusko yerheerheh yine marak, Masiix biiloh tendhewwiinih tanin.

¹⁴ Tamaa fanadde tine nacabi qaana ishi xazottah dumuseyaako, inkoh inketta nok abe, usuk isheh ni salaam kinni.

¹⁵ Tamaa lamma kuuk yine marak ishedde cusubih inki xiyaw yakhlaqho ciloh, sercat ishi amrit kee dhintotlih asac-isheyaako salaam abe.

¹⁶ Amaa nacabo yigdifeyaako masqal araxah, inki nabsedde lammik Yallaalih ni wagarishe.

¹⁷ Yemeeteh lel mirixtah yine sinah salaam, tamaa dhayelle yine marah lel salaam warroyshe

¹⁸ Amayim lel nanu lammik inki Ufayeh Abballe namaato dhicnamhi sabbatah kinni.

¹⁹ Amaydo, atin kamboh yinqiddise maraalih dikti mara kee Yallih xawaz kitiininkah, gerha kee godobo makitiini.

²⁰ Masiix kin Yeesus isheh ongolot dhaa akko kin fartottit kee nobowat bukalle siraaxime masarrat kitin.

²¹ Amaa cari inkoh inkidde yangaleh, Maddaradde quddus kin macbad balih yanabe.

²² Atin gantah Ufayeh Yallih sigima takkoona kayyadde inkoh inkidde siraaximak tanin.