Efesos 1 - Saaho Cusub Cahde

Salaamta

¹ Yallih farhih, Masiix kin Yeesus fartotta yekke Bawlosko, Efesosulle geytima yinqiddise mara kee Masiix kin Yeesusuh yeemene mara fanah:

² Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Masiixidde geytimta Yallih baraka

³ Ni Maddara kin Yeesus Yalla kee Abba, umman ufayi barakah Masiixidde carshi makaanolle ni yeybeerekeyah fayla takkoo.

⁴ Nanu kaa nifille kaxanoh yinqiddise mara kee abar hin mara nakko, ta caalam dhishshiimekkah gantah yookomeh ni doore.

⁵ Ishi mece farhi balih Yeesus Masiix araxah kaa dhaylo nakko yookomeh yixiggire.

⁶ Tayim lel tamaa yinkixxine Barhahi araxah noh yoxoye nabne le nicmah, fayla geyo ciloh kinni.

⁷ Kayyadde kaa biilohi araxah muuca, tamaa kaa nicmahi gadda balih lel ni zambehi xabbot geyneh nane.

⁸ Ta nicma lel umbuka kas kee irhgah ni bukalle yeymengeh yane.

⁹ Ishi mece farhi balih lel Masiix araxah abaysheh sugem, ishi farhih mashthir ni yiyshidhdhige.

¹⁰ Tayim lel amaa usuk xagarah leya waqhti gufa gedda, inkoh carshe kee baarholle tanem, umbukaahim inkoh kayyadde tiya takko ciloh kinni.

^11-12 Nanu tamaa yookomeh Masiixidde cag abite marak, kaa nabneh kaa faylishak marno ciloh, ummanim ishi macal balih, ishi farhih fawo balih abati, worosa nakko yookomeh ni dooreh yane.

¹³ Kayyadde atin gantah, rummaahit waanitta, gargerti mece ware toobbiinih, kayyah teemenin gedda, wacde akah sayen Quddus kin Ufayeh tumxuttumin.

¹⁴ Nanu kaa nabne faylishno ciloh, Yalli inkoh ishi mara yayyaacendah, Quddus kin Ufaye miiraas dhishih noh yoxoyeh yane.

Xamde kee dhaaco

¹⁵ Tayimhi zacabah, anu Maddara kin Yeesusudde litin imaan kee inkoh tamaa yinqiddise marah litin kaxano oobbeh aniyomhi sabbatah,

¹⁶ sinah arhxiyuk xamde yaddabbiinim, inni dhaacodde sina xunsuusaanam xabeh maarhige.

¹⁷ Ni Maddara kin Yeesus Masiix Yalli, nabnet Abba kinya, meceetih kaa taarhagoona ciloh kas kee waxyi Ufaye sinah yaxaw dhaaco abak aniyo.

¹⁸ Sin afcaadoh intit ifisheh, tamaa sinah deecime tiyahi cag ayim kinam taarhagoona, tamaa yinqiddise marah tamxawo kin nabne le miiraas ayidhdha gaddaale kinam taarhagoona gantah dhaaco abak aniyo.

¹⁹ Tamaa yaamine marak usuk nottah leya qiyaas hin kaa xaylahi nabne ayim kinam taarhagoona ciloh lel dhaaco abak aniyo. Ta nottadde akhdumuk yane naba kaa xaylih dhic lel,

²⁰ Masiix rabaako uguseh, carshi makaaanolle ishi mizgi gabooko akah defeyshe xayla kinni.

²¹ Ta waqhtedde bisa akkekkah, yamaatole waqhtedde gantah, umbuka reeza kee mas-uuliya, xayla kee giz-at bukalle reezisheyaako, umman tiyahi bukalle kin migac akah yoxoye.

²² Ummanim lel kaa ibahi geridde akah haye. Ummanimhi bukalle yakko ciloh lel kaniisat amo akko abe.

²³ Kaniisa lel kaa nabse kinni, tee kee ummanille ummanim tamagem lel kaa mige kinni.