Cibraan 8 - Saaho Cusub Cahde

Yeesus, yashshe cahdih Naba Shekh

¹ Kado tamaa narhxo farhne gondo tatiyä kinni: nanu tamaa carshelle yane naba nabneh nugus-kursehi mizgi gabooko defeyeh yane naba shekh lino.

² Usuk tamaa xiyaw akkekkah Maddari yitkile quddus kin makaano rummaahit Yallahi reedohi khaddaam kinni.

³ Akkinnan naba shekh inkoh muttuxuwa kee sadaqha yaxaw kaalle tinemhi sabbatah, ta naba shekh yakkeedo yaxayem yaallem fadhdhishimta.

⁴ Kado usuk ta baarholle yanniyeedo, tamaa sercat araxah muttuxuwa yaxaye sheekha yaniinimhi sabbatah, usuk shekh akke mirhaarhinna.

⁵ Usun tamaa carshelle tanemhi misle kee silal yakhdume mara kinon. Amaymih kinni Moosa Yallahi reedo yatkalo kab-yerhxe gedda Yalli: “Ummanim tamaa koomalle akah koh yumbulluweekahi xibarah akah abtaakah ab” arhxuk akah yesxessem.

⁶ Kado laakin, Masiix tamaa kalxit khidmaako meceetih tashshe tiya geyeh yane. Amayim lel yashshe wacdelle dhishshimte tiya kinamhi sabbatah usuk fantattoysha afti cahdi yashshe tiya kinamhi sabbatah kinni.

⁷ Ta cahdi gadma hin tiya kuuk yineh yakkeedo, malamma akah wagiyan takale anniye mirhaarhinna.

⁸ Usuk tenadde gadma adde geyeyaako tahe akko yarhxe: “Taykinna, Israa-eel care kee Yahuudaati careelih cusub cahde adde saya maaxi amiituk yane, yarhxe Maddari,

⁹ tamaa gabadde ten ibbirheyaako Masriiti baarhooko ten eyyeece max ten abbublih abe cahde balih laakin maki. Amayim lel, usun yi cahdelle masbatinnoonimhi sabbatah, anu lel macal adde maabitinniyo, yarhxe Maddari.

¹⁰ Ta cahdi Israa-eel careelih abo liyo tiya kinamhi sabbatah, amaa maxak sarrah, yarhxe Maddari: Inni sercat ten xangaladde hayo kiyo, ten afcaadodde lel aktabo kiyo, anu lel ten Yalla akko kiyo, usun lel yi xiyaw yakkoona kinon.

¹¹ Cindha tiyaako naba tiya fanah inkoh yi yaarhagoona kinoonimhi sabbatah, ‘Yalla irhig’ arhxuk zoobatti zoobatto, sacal lel ishi sacal yaydaraso maki.

¹² Ten uma ciyyoh alle raxmato kiyo, ten zambe lel tayek sarrah azzakkaro makiyo.”

¹³ Ta cusub cahdehi zacabah waanisha gedda, tamaa afti tiyak raace tiya akko aba. Raace tiya kee baarroweti lel yalaw gaba dhaye.