Cibraan 7 - Saaho Cusub Cahde

Malkitsedeqhti Sheekhino

¹ Malkitsedeq Saalem nugus kee Nabamko Naba Yallih shekh kuuk yine. Abraahim amaa nuguusa dhacumaatih yiscireh gaxak, akah garayeh dhaaco akah abe.

² Abraahim lel ummanimko taman-ya af akah yoxoye. Erherhih, kaa migac hi macna: “Xaqqi nugus” yarhxiinim kinni, malammih lel Saalem nugus kinni, tee macna lel: “Salaam nugus” yarhxiinim kinni.

³ Usuk abba male, ina male, waalido male, waqhti erhedhdhö yakko aniinat abayshima male, laakin Yallih Barhah yimmingideh umman geedit shekh yekkeh mara.

⁴ Abbubti naba tiya kin Abraahim gantah tamaa boylah beye limo nabamko taman-ya af akko akah yoxoyeya, ta xiyawti ayidhdha naba tiya kuuk yinem ubula!

⁵ Tamaa Leewiiko rada mari sheekhino kabbattaya, amaa ten sacul kin xiyawko, taman-ya af bishshiitoona sercatadde amre lon. Yakko kibah, ta mari gantah Abraahimko raddam kinon.

⁶ Malkitsedeq laakin, Leewiiko ooba tiya maki hanuk, Abraahimko taman-ya af kabbaate, amaa wacde luuk yine kayyah lel dhaaco akah abe.

⁷ Dhaaco akah abanti lel cindha tiya kibah naba tiya makinam wagro fadhdham maki.

⁸ Wuli ginah tamaa taman-ya af beytam rabi ilaala mara kinon, wuli gabooko laakin, umman geddah mara tiya kinam akah yishhidinti gantah beya.

⁹ Tamaa isheh taman-ya af kabbaata Leewi gantah Abraahim araxah taman-ya af yoxoye gantah narhxo dhicna.

¹⁰ Amayim lel, Malkitsedeq Abraahim geye gedda, Leewi yoobokeh miyinemhi sabbatah kinni.

Yeesus kee Malkitsedeqhti sheekhino

¹¹ Tamaa xiyaw kabbaaten sercat Leewiiti sheekhinohi araxah kuuk yineya, naqhuse hin tiya kuuk yineh yakkeedo, Haaruun balih akkekkah, Malkitsedeq balih kin aki shekh yamiitem aymih fadhdhishimte?

¹² Sheekhinodde badali yakke gedda, sercatadde gantah badali yakkem fadhdhishimta.

¹³ Tayim kaa zacabah akko waanishenti aki kishooko kinni, ta kishooko walaa inketti mazbaxalle akko yukhdumeh miyaarhige.

¹⁴ Ni Maddari Yahuudaati kishooko radam mudhdhug kinni, ta kishohi zacabah lel Moosa walaa inkim marhxinna.

¹⁵ Malkitsedeqhih iggidin aki shekh yamiite gedda lel tayim meceetih tamadhdhago kinni.

¹⁶ Usuk shekh akah yekkem, tamaa sugte xiyaw dhintohi araxah akkekkah, alayinnixe aniinat xaylah kinni.

¹⁷ Amayim lel: “Malkitsedeq balih, atu umman geedit shekh kito” yerhxeh yishhidemhi sabbatah kinni.

¹⁸ Wuli ginah lel, tamaa basoohit amri rukut tiya kee amficinnixe tiya kuuk yinemhi sabbatah raaceh yane.

¹⁹ Amayim lel, sercat walaa inkimik naqhuse hinam akko abo mirhiicamhi sabbatah kinni. Wuli gabooko laakin, nanu Yallalle akah nandhawwo dhicna, yashshe cag geytimemhi sabbatah kinni.

²⁰ Dhiiwa hinnim laakin kuuk miyine. Tamaa basoh sheekha yakke mari dhiiwa hinnim akkuk yinin.

²¹ Tati laakin tamaa tahe akko yerhxe tiyahi araxah dhiiwaalih kinni shekh yekkem: “Maddari dhiiwiteh yane yaththaacaso lel maki, atu umman geddah shekh kito.”

²² Taymih lel Yeesus yashshe cahdi dhish yekke.

²³ Umman gedih sheekha yekkiinih maraanamko rabi ten deesak tinemhi sabbatah, basoohit sheekha mango mara kuuk yinin.

²⁴ Usuk laakin umman geddah yanemhi sabbatah, umman geddah shekh yekkeh maro kinni.

²⁵ Amayimhi idhdhah, usuk akah tillaabo umman geddah yanemhi sabbatah, tamaa kaa araxah Yallalle yemeete mara, kaamilik gargeero dhiica.

²⁶ Nanu lel ta gina-le, quddus kin, cagab-male, dhaggitinnixe, zambeeko mirix-yerhxe, agana carshelle lel xaf-yerhxe naba shekh ni farhshiisha.

²⁷ Usuk inki geddalle umman gedih umman tiyah ishe yisiddiqhemhi sabbatah, tamaa naba sheekha balih, erherhih ishi zambeh, sarrah lel xiyaw zambeh arhxuk maaxi yamaato sadaqhat yaxaynim kaa mifarhshishsha.

²⁸ Sercat tamaa rukut marak naba sheekha aba, tamaa sercatko sarrah temeete dhiiwat canqara laakin, kaamil kin tiya umman geddah yekke Barhak naba shekh abta.